“Sulati si Anton!”
● Usa ka tin-edyer nga Saksi ni Jehova nga ginganlag Anton nagpuyo sa hilit nga baryo sa Schelkan sa Stavropol’ Kray, Russia. Sa bata pa, siya nadayagnos nga may Duchenne muscular dystrophy—dili matambalang sakit diin ang kaunoran paspas kaayong madaot ug sagad motultol sa kamatayon sa dili pa mag-20 anyos. Pag-edad ni Anton ug nuybe, dili na siya makalakaw o makabarog.
Sa dihang si Yevgeny ug ang iyang asawa nga si Diana miduaw sa usa ka kongregasyon sa mga Saksi, ilang nakaila si Anton. “Si Anton luya kaayo sa pisikal,” matod ni Diana, “apan lig-on sa espirituwal. Sanglit ang iyang magulang nga lalaki namatay nianang sakita sa edad nga 19, si Anton nahibalo nga dili na siya magdugay. Bisan pa sa iyang sakit, siya malipayon ug positibo.”
Si Diana ug ang iyang bana nagdasig kang Anton sa pagpauswag sa iyang ministeryo pinaagig pagsulat sa mga tawo sa ubang hilit nga mga baryo. Sa 2005, siya mihimog 500 ka sulat ug gipadala kana sa mga adres sa duol nga mga baryo. Apan naguol siya kay walay mibalos bisag usa. Bisan pa niana, si Anton nagpadayon sa pagsulat ug kanunayng nag-ampo alang sa giya kon sa unsang paagi siya mahimong epektibong ministro bisan pa sa iyang kahimtang.
Usa ka adlaw niana, samtang nagbasag mantalaan, iyang nabasa ang sulat sa usa ka masakitong babaye nga nagkinahanglag pagdasig. Gisulatan siya ni Anton, ug ang usa ka bahin nianang sulata giimprenta sa maong mantalaan: “Bisag dili na matambalan ang akong sakit, ang pagbasag Bibliya nakatabang kanako nga makabatog positibong panglantaw sa umaabot. Gusto kong makadawat ug mga sulat ug kanunay kong maghulat niana.”
Kay natandog, ang babaye nagpadalag sulat sa mantalaan. Kana giimprenta ubos sa ulohang “Sulati si Anton!” Ang babaye mipahayag ug apresasyon sa makapadasig nga mga pulong nga gisulat ni Anton gikan sa Bibliya ug midugang: “Tabangan nato si Anton! Sulati siya. Nagkinahanglan siyag pagdasig!” Ang adres ni Anton gilakip pag-imprenta.
Ang mga sulat nangabot sa post office sa ilang baryo—mga 30 kada adlaw! Kini naggikan sa lainlaing dapit sa Russia, maingon man sa kanasoran sa Baltic, Germany, ug bisan sa France. Siya nakadawat ug gatosan ka sulat gikan sa mga magbabasa sa maong mantalaan. “Nalipay kaayo si Anton!” nahinumdom si Diana. “Gatosan na ka tawo ang mahimo niyang sulatan bahin sa iyang nakat-onan gikan sa Bibliya.”
Kapin sa usa ka tuig nga si Anton nakigsulat niadtong misulat kaniya, ug iyang gipadayag kanila ang kamatuoran sa Bibliya. Ang iyang kamot anam-anam nga dili na makahimo sa pagsulat, busa iya na lang kining idiktar. Niadtong Septiyembre 2008, si Anton namatay sa edad nga 20. Bisag luya kaayo sa pisikal, ang pagtuo ni Anton sa Diyos ug ang iyang gugma sa ministeryo nakadasig kaniya sa pagtabang sa daghang tawo.