Ang Hunahuna sa Bibliya

Unsay Tumong sa Ginikanan?

HAIN niini nga gusto nimong mahimo ang imong anak?

A. Carbon copy nimo.

B. Rebelde nga gustong mahimong kasukwahi nimo.

C. Responsableng hingkod nga makahimog maayong mga desisyon.

Ang ubang ginikanan mopili sa C, pero morag gusto pod nila ang A. Ilang ipugos ang ilang mga sukdanan diha sa ilang anak, pananglitan, ilang but-an ang ilang anak kon unsang karera ang iyang kuhaon. Ang resulta? Sa dihang ang anak makabaton nag igong kagawasan, mosimang siya sa laing direksiyon. Sa kasukwahi, ang mga ginikanan nga mopili sa A makabaton hinuon ug anak nga sama nianang sa B.

Kon Nganong Dili Magsilbing Gawngan ang mga Anak

Gusto nimo nga ang imong tin-edyer mahimong responsableng hingkod nga makahimog maayong mga desisyon. Apan unsay imong himoon aron mahimong ingon niana ang imong anak? Kini ang tinuod: Dili magsilbing gawngan nimo ang imong anak. Palandonga kining duha ka rason.

1. Paggalong sa anak dili-Kasulatanhon. Gilalang ni Jehova nga Diyos ang tawo nga dunay kagawasan sa pagpili. Gitugotan niya ang tawo sa pagpili sa dalan nga iyang subayon, maayo man o daotan. Pananglitan, sa dihang naghambin si Cain ug grabeng kasuko sa iyang igsoong si Abel, si Jehova miingon kaniya: “Kon magbuhat ka ug maayo, dili ba adunay pagbayaw? Apan kon dili ka magbuhat ug maayo, adunay sala nga naghupo sa ganghaan, ug ikaw ang gipangandoy niini; ug makabuntog ka ba niini?”—Genesis 4:7.

Matikdi nga bisag gihatagan ni Jehova si Cain ug klarong tambag, wala niya pugsa siya sa pagsunod niini. Si Cain kinahanglang mopili kon magpadaog siya sa iyang kasuko o dili. Ang leksiyon? Kon wala gani gawngi ni Jehova ang iyang mga linalang, labaw nang dili pod nimo angayng gawngan ang imong mga tin-edyer.a

2. Ang paggalong sa anak dili maayog resulta. Handurawa nga gipugos ka sa usa ka tindero sa pagpalit. Kon siya magsigeg pamugos, dili na hinuon ka ganahang mopalit. Bisag kapaliton ka, dili ka na lang mopalit kay naglagot ka na niya. Gusto ka nang molakaw.

Ingon niana ang mahitabo kon imong ipugos ang imong sukdanan, tinuohan, ug mga tumong ngadto sa imong anak. Dawaton kaha na niya? Lagmit dili! Sa pagkatinuod, mahimong dili maayog resulta ang imong paagi, ug mosupak na hinuon siya sa imong mga sukdanan. Sagad, dili gyod magsilbi kon gawngan sa ginikanan ang anak. Busa unsay imong himoon?

Imbes gawngan ang kinabuhi sa imong tin-edyer, sama niadtong bata pa siya, tabangi siya sa pagkakita nga mapuslanon ang pagbuhat kon unsay husto. Pananglitan, kon Kristohanon ka, ipakita kaniya kon nganong ang pagsunod sa mga prinsipyo sa Diyos makahatag kaniyag dakong kalipay.—Isaias 48:17, 18.

Samtang imong ipadapat kini, ipakita nga sulondan ka. Himoa ang imong kaugalingon nga matang sa tawo nga maoy gusto nimong sundon sa imong anak. (1 Corinto 11:1) Ayawg usab-usaba ang imong mga sukdanan. (Proverbio 4:11) Kon ang imong anak dunay gugma sa Diyos ug sa iyang mga sukdanan, makahimo siyag maayong mga desisyon, bisag sa panahong wala ka.—Salmo 119:97; Filipos 2:12.

Tudloi ang mga Anak ug mga Kahanas

Sama sa gihisgotan sa panid 2, dili lang nimo mamatikdan nga moabot ang adlaw nga ang imong anak “mobiya sa iyang amahan ug sa iyang inahan.” (Genesis 2:24) Ingong ginikanan, paneguroa nga duna siyay makat-onang mga kahanas nga iyang gikinahanglan aron mahimo siyang responsableng hingkod. Palandonga kining pipila ka kahanas nga imong ikatudlo kaniya, samtang anaa pa siya sa imong poder.

Mga Buluhaton sa Balay. Makamao ba ang imong anak moluto? manglaba ug mamalansa? manghinlo ug manghipos sa iyang kuwarto? magmentinar ug moayog sakyanan? Kon ang imong anak makakat-on niining mga butanga, makahimo na siya sa pagdumalag panimalay sa umaabot. Si apostol Pablo miingon: “Akong nakat-onan, bisan unsa man ang akong kahimtang, nga magmakontento.”—Filipos 4:11.

Pagpakiglabot sa Uban. (Santiago 3:17) Ang imo bang anak maayong makiglabot sa uban? Makamao ba siyang mohusay ug mga away-away sa kalmadong paagi? Gibansay ba nimo siya sa pagtahod sa mga tawo ug sa pagsulbad sa mga away-away sa malinawong paagi? (Efeso 4:29, 31, 32) Ang Bibliya nag-ingon: “Pasidunggi ang tanang matang sa mga tawo.”—1 Pedro 2:17.

Pagbadyet ug Kuwarta. (Lucas 14:28) Makatabang ka ba sa imong anak sa pagtuon ug pangabuhian, pagbadyet, ug sa dili pagpangutang? Imo ba siyang gitudloan sa pagtigom aron dunay ikapalit sa mga butang nga gikinahanglan ug dili magdalidalig palit ug magmakontento? (Proverbio 22:7) Si Pablo misulat: “Kon kita adunay makaon ug ikabesti, kita magmakontento na.”—1 Timoteo 6:8.

Ang mga anak nga nagsubay sa hustong mga sukdanan ug nakakat-on ug mga kahanas, andam na inigkahingkod nila. Nakab-ot sa ilang ginikanan ang ilang tumong!—Proverbio 23:24.

[Footnote]

NAKAPAMALANDONG KA BA?

● Unsay imong tumong ingong ginikanan?—Hebreohanon 5:14.

● Unsay responsibilidad sa imong anak inigkahingkod niya?—Josue 24:15.

[Mga hulagway sa panid 25]

Hain niini nga gusto nimong mahimo ang imong anak?

Carbon copy nimo . . .

Rebelde . . .

Responsableng hingkod