Pagpaniid sa Kalibotan

Mga 17 porsiyento sa mga bata sa Brazil nga 10-13 anyos nahimong biktima sa pagdaogdaog o kaha maoy nanaogdaog.—O ESTADO DE SÃO PAULO, BRAZIL.

Daghang bata karon nga wala pay 12 anyos nadayagnos nga taas ug presyon sa dugo, taas ug kolesterol, may bato sa kidney, ug sakit sa atay. Unsay kasagarang hinungdan? Walay ehersisyo, sobrang pagkaog junk food, ug sobrang pagkatambok.—ABC, SPAIN.

Diha sa aberids ug kita nga pamilya sa United States, ang gasto sa pagpadakog anak nga natawo sa 2008 hangtod sa edad nga 18 maoy “mga $221,190 ($291,570 kon ipasibo sa pagtaas sa palaliton),” sumala sa banabana sa gobyerno.—UNITED STATES DEPARTMENT OF AGRICULTURE, U.S.A.

Dili na Makigdula

Sumala sa usa ka surbi, 20% sa mga ginikanan sa Britanya miingon nga sila “dili na makigdula sa ilang mga anak.” Mga 30% miingon nga makalaay ang pagpakigdula, samtang ang uban walay panahon o walay ideya kon unsay dulaon. Bahin niini, si Propesor Tanya Byron, usa ka clinical psychologist miingon: “Dunay upat ka yawi sa paghimo sa dula nga makalingaw sa mga ginikanan ug mga anak: pagtudlo, pagdasig, pag-ubanay, ug pagsultihanay.” Bisan tuod 1 sa 3 ka ginikanan gustong makigdulag computer games uban sa ilang mga anak, kadaghanan sa mga bata mas gustong magdula nga siya rang usa. Lakip sa mga dula nga gustong dulaon sa 5-15 anyos nga mga bata uban sa ilang ginikanan mao ang dula nga dulaon sa gawas sa balay ug mga board game.

Bedtime Stories

May Web site sa Internet nga nagtanyag ug tabang sa mga amahan nga walay panahon sa pagbasag mga estorya sa ilang mga anak sa dili pa matulog. “Irekord sa kompiyuter ang tingog sa amahan nga nagbasag estorya. Kini dugangag musika ug sound effects ug ipadala ngadto sa bata pinaagig e-mail,” matod sa Daily Telegraph sa Sydney. Apan gikuwestiyon kini sa mga eksperto. Si Dr. Richard Fletcher sa Newcastle University, sa Australia, miingon nga “ang pagbasag estorya makapalig-on sa relasyon sa amahan ug anak.” Ang pagbasa sa amahan sa iyang anak makapasuod kanila kay iya man siyang malingaw ug magakos. Walay kompiyuter ang makahimo niini, matod ni Fletcher.