Kapintasan Apektado Kitang Tanan

KINSAY wala maapektohi sa kapintasan? Kini kanunay natong makita diha sa mga balita sa telebisyon. Mahadlok kita niini diha sa kadalanan ug sa trabahoan, ug makasinati niini ang mga bata diha sa eskuylahan. Bisan diha sa balay nga trinangkahan, diin ang mga tawo sagad mobati nga layo sa peligro, minilyon—ilabina mga babaye—mobati gihapog kahadlok. Gani sa ubang nasod, mga 70 porsiyento sa kababayen-an nagreport nga gidagmalan sa ilang bana o puyopuyo.

Diha sa daghang nasod, ang mga tawo mahadlok sa bayolenteng mga kagubot sa politika o katilingban o bisan sa terorismo. Tungod niini, daghang nasod ang naggamit ug mga gadyet sa surveillance, ilabina kadtong nahimong target sa terorismo.

Busa ang industriya sa video surveillance mikusog—bisan pa sa pagkahugno sa ekonomiya sa tibuok kalibotan. Kinsay nagbayad niining tanan? Kita, pinaagi sa mga buhis ug ubang bayranan. Ug ang gastos modako pa gyod kon ang mga pamaagi sa seguridad mas high-tech ug mas mahal.

Ang makatugaw nga mga epekto sa kapintasan angayng makapahinuklog kanato—sa atong pamatasan ug tinuohan. Hisgotan sa sunod nga mga artikulo kining mga pangutanaha: Sa unsang paagi ang media nakaamot sa pagdaghan sa kapintasan? Unsay makaimpluwensiya sa atong tinamdan bahin sa kapintasan? Unsay atong himoon aron mapanalipdan kita batok sa dili maayong impluwensiya?