Balhibo sa Emperor Penguin

ANG emperor penguin hilabihan ka paspas molangoy ug mosulpot gikan sa tubig paingon sa yelo. Sa unsang paagi?

Hunahunaa: Ang emperor penguin magpondog hangin diha sa iyang balhibo. Gawas nga proteksiyon kini batok sa grabeng katugnaw, makatabang usab kini kaniya sa paglangoy nga doble o triple ka paspas. Sa unsang paagi? Ang mga marine biologist nag-ingon nga ang penguin magpagawas ug pinong mga bula-bula nga hangin gikan sa iyang mga balhibo. Inigpagawas niya niini, ang friction diha sa iyang mga balhibo momenos, sa ingon makabuylo siya.

Gitun-an sa mga inhenyero ang mga paagi sa pagpapaspas sa mga barko pinaagi sa paggamit ug mga bula-bula sa pagpamenos sa friction diha sa kasko. Apan sila miadmitir nga naglisod sila sa pagpadayon sa pag-eksperimento kay lisod sundogon ang balhibo sa penguin.

Unsay imong hunahuna? Ang balhibo ba sa emperor penguin mitungha lang pinaagig ebolusyon? O kini ba gidisenyo?