Kon Suod Ka Na sa Usa sa Kaatbang nga Sekso

ANG PROBLEMA

Duna kay higala nga nakasabot kaayo nimo. Mag-estorya mo ug bisan unsa. Tingali moingon ka, ‘Higala ra mi,’ pero mao pod kaha kanay hunahunaon sa imong bana o asawa kon mahibalo siya nga tagdugay mong mag-estorya?

Seguro suod na mo kaayo ug kinahanglang mohimo ka nag aksiyon. Pero tagda una kon nganong ingon niana ka na ka suod kaniya.

MGA HINUNGDAN

Dunay nakulang. Ang tinuod, malipay ta kon hatagan tag atensiyon sa usa sa kaatbang nga sekso. Mora tag bayawon kay dunay nagtagad nato, ug kini mopabati nato nga kita madanihon. Kay dugaydugay nang minyo, basig mosugod ka pagbati nga ang imong higala maoy nakatagana niana. Apan timan-i: Kon ang maong panginahanglan natagana sa tawo nga dili nimo kapikas, moresulta kinig dili maayo. Kon makigsuod ka sa dili nimo kapikas, imong gipahuyang ang imong relasyon sa imong kapikas. Sa ato pa, imo siyang gihikawan sa gugma nga para lang kaniya.

• Pangutan-a ang imong kaugalingon, ‘Unsa nga panginahanglan ang natagbaw sa akong higala nga angay lang tagbawon sa akong kapikas?’

Daling maagni. Ang Bibliya nag-ingon nga ang mga minyo makasinatig “kasakitan.” (1 Corinto 7:28) Pananglitan, tingali mobati ka nga gipasagdan o wala hatagig importansiya sa imong kapikas, o kaha naghambin ug kasuko tungod sa usa ka problema nga wala masulbad. Tingali ang imong kapikas naglikay-likay sa paghisgot bahin sa mga problema mao nga maglagot ka ug daling maagni sa atensiyon sa uban. Ang ubang magtatambag nag-ingon nga ang paglikay sa paghisgot sa dagkong mga problema mahimong moresulta ug dili malipayong kaminyoon o kaha panagbulag.

• Pangutan-a ang imong kaugalingon, ‘Duna bay problema ang akong kaminyoon nga nakaagni nako sa pagpakigsuod sa dili nako kapikas?’

ANG IMONG MAHIMO

Ilha ang kapeligrohan. Ang Bibliya nag-ingon: “Makabutang ka bag kalayo sa imong dughan nga dili masunog ang imong sinina?” (Proverbio 6:27, Good News Translation) Ang tinuod, ang pagpakigsuod sa usa sa kaatbang nga sekso kon minyo ka na makadaot. (Santiago 1:14, 15) Angayng palandongon dili lang kon unsay posibleng mahitabo kondili kon unsa nay nahitabo. Dihang magpakita kag espesyal nga atensiyon sa usa ka tawo, imong gihikawan ang imong kapikas sa atensiyon nga para lang kaniya.

Hunong na sa pag-ilusyon. Basin maghanduraw ka kon unsay imong kinabuhi kon kining tawhana ang imong naminyoan. Tingali imo nang gikomparar ang maayo niyang mga hiyas kontra sa kahuyangan sa imong kapikas​—dili kana husto! Hinumdomi usab nga ang imong gibating kalipay karon sa dihang maghunahuna ka sa imong higala tingali mao usab ang imong gibati sa sinugdan sa tawo nga imong gipakaslan.​—Prinsipyo sa Bibliya: Jeremias 17:9.

Pagbutang ug limitasyon. Ang mga tawo magtaod ug alarm sa ilang sakyanan o balay aron dili sila makawatan. Mahimo usab nimo kana diha sa imong kaminyoon. Ang Bibliya nag-ingon: “Ampingi ang imong kasingkasing.” (Proverbio 4:23) Sa unsang paagi? Sulayi kini:

• Iklaro sa uban nga ikaw minyo na​—tingali pinaagig pagdispley ug letrato sa imong kapikas diha sa trabahoan.​—Prinsipyo sa Bibliya: Genesis 2:24.

• Angayng magtakda kag mga limitasyon sa dihang makiglabot sa usa sa kaatbang nga sekso. Pananglitan, dili maayong iestorya nimo kaniya ang problema ninyong magtiayon o makigpangaon sa gawas sa usa ka kauban sa trabaho nga kaatbang sa sekso.

• Kon suod ka na sa usa sa kaatbang nga sekso, ihunong kana. Kon dili ka makahimo niana, pangutan-a ang imong kaugalingon kon ngano. Imbes depensahan nimo ang imong relasyon niining tawhana, depensahi ang imong kapikas ug paghimog mga paagi sa pagpreserbar sa inyong kaminyoon.​—Prinsipyo sa Bibliya: Proverbio 5:18, 19.