Kon Dili Ka Na Malipayon sa Imong Kaminyoon

ANG PROBLEMA

Ikaw ug ang imong kapikas halos parehas ug gusto​—niadtong wala pa kamo magminyo. Pero karon, tungod sa mga problema, ang inyong relasyon nagkadaot nga nagpabati kaninyo nga magkauban sa selda imbes magkasangga.

Duna kay mahimo sa pagpauswag sa inyong relasyon. Apan tagda una kon nganong tingali dili ka na malipayon.

MGA HINUNGDAN

Migawas na ang tinuod. Ang adlaw-adlawng rutina sa pagtrabaho, pagpadakog mga anak, ug pagpakiglabot sa mga ugangan makapatibhang sa kalipay sa kaminyoon. Dugang pa, ang wala damhang mga problema​—tingali pinansiyal nga problema o pag-atiman sa masakitong membro sa pamilya​—mahimong makadaot sa kaminyoon.

Kabingkilan nga daw dili mahusay. Dihang trato pa, sila magpakabuta sa ilang mga apan. Pero inigkaminyo na, ilang makita nga lahi kaayo silag paagi sa pagpakigsulti, pagdumalag kuwarta, ug pagsulbad ug problema. Ang diperensiya nga sa una madala-dala ra karon dili na maagwanta.

Bugnaw ka nag tinagdan. Paglabay sa panahon, ang dili makalimtang mga sulting sakit o aksiyon ug daghang wala masulbad nga mga away-away makapabugnaw sa tinagdan sa usag usa, o grabe pa, ang bana o asawa matukmod sa pagpakigsuod sa tawo nga dili niya kapikas.

Ang imong mga pagdahom dili realistiko. Ang uban mosulod sa kaminyoon sa pagtuo nga nakita na gyod nila ang tawo nga para gayod kanila. Bisag daw nindot kanang pamation, mahimong moresulta kanag kadaot. Dihang motungha na ang problema, ang ilang gihandom nga maayo kaayo sila nga pagkaparis mapusgay, nga makapahunahuna kanila nga sila nasayop sa pagpili.

ANG IMONG MAHIMO

Hunahunaa ang maayong hiyas sa imong kapikas. Sulayi kini: Isulat ang tulo ka maayong hiyas sa imong kapikas. Dala-dalaha kini nga lista nga tingali imong gisulat diha sa likod sa letrato sa inyong kasal, o sa cellphone. Pagatan-awa kini agig pahinumdom kon nganong imo siyang gipakaslan. Ang paghunahuna sa iyang maayong hiyas makahatag ug kalinaw ug makatabang nimo sa pagpalabay sa inyong mga away-away.—Prinsipyo sa Bibliya: Roma 14:19.

Pagdeyt sab mo. Sa wala pa mo magpakasal, tingali mogahin mog panahon nga magkauban. Kamo naghinamhinam sa inyong panagdeyt, ug gahinan gayod ninyo kinig panahon. Unsa kaha kon inyo kining himoon karon? Pagplano kon asa kamo manuroy nga morag nagdeyt mo. Kini makapasuod ninyo ug makatabang sa pagsagubang sa wala damhang mga problema.—Prinsipyo sa Bibliya: Proverbio 5:18.

Isulti ang imong gibati. Kon nasakitan ka sa gisulti o sa gibuhat sa imong kapikas, makapalabay ka ba niini? Kon dili, ayaw pagbalos pinaagig pagpakigbungol. Kalmadong ipakigsulti dayon kini kaniya, kon posible niana mismong adlawa.—Prinsipyo sa Bibliya: Efeso 4:26.

Timbang-timbanga ang imong pagbati ug ang intensiyon sa imong kapikas. Lagmit kamong duha walay intensiyon sa pagpasakit sa usag usa. Pasaligi siya niini pinaagi sa kinasingkasing nga pagpangayog pasaylo. Dayon estoryahi ninyo kon unsay inyong himoon aron dili kamo makapasakit sa usag usa nga wala tuyoa. Sunda ang tambag sa Bibliya: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa.”​—Efeso 4:32.

Magmarealistiko sa imong mga pagdahom. Ang Bibliya nag-ingon nga kadtong magminyo “makaagom ug kasakitan.” (1 Corinto 7:28) Kon mahitabo kini, ayaw dayon pag-ingon nga pakyas ang imong kaminyoon. Hinunoa, paningkamoti ninyo nga masulbad ang mga away-away ug ‘padayon sa pag-antos sa usag usa ug kinabubut-on nga magpasaylo sa usag usa.’​—Colosas 3:13.