Dihang Mohapak ang Trahedya

SA KALIT lang, halos tanan—dato man o pobre—makaatubang ug trahedya.

ANG BIBLIYA NAG-INGON:

“Ang lumba dili alang sa mga matulin, ni ang gubat alang sa mga gamhanan, ni ang pagkaon alang sa mga maalamon, ni ang mga bahandi alang sa mga masinaboton, ni ang pabor alang kanilang adunay kahibalo; tungod kay ang panahon ug ang wala damhang panghitabo modangat kanilang tanan.” —Ecclesiastes 9:11.

Ang pangutana karon dili kon makaatubang ka bag trahedya kondili kon unsay imong himoon dihang ikaw makaatubang ug trahedya. Pananglitan:

• Komosta kon nawala ang tanan nimong kabtangan tungod sa kalamidad?

• Komosta kon nadayagnos ka nga dunay makamatay nga sakit?

• Komosta kon namatyan ka ug minahal?

Ang mga Saksi ni Jehova, nga nagpatik niining magasina, nagtuo nga ang Bibliya makatabang nimo dili lang sa pagbangon gikan sa trahedya kondili naghatag usab kinig lig-ong basehanan sa paglaom. (Roma 15:4) Tagda kining tulo ka kasinatian.