Hardinero sa Kahanginan sa Tropikal nga Kalasangan
ANG tanang hardinero nahibalo nga ang hustong pagpananom nagdepende sa pagsabod ug mga binhi sa hustong dapit ug sa hustong panahon. Apan makapatingala kay ang usa sa labing epektibo nga pagsabod ug binhi diha sa kalasangan ginahimo magabii—ug gikan sa kahanginan. Ang mga hardinero sa kahanginan nga nagahimo niini mao ang mga kabog.a
Pagsabwag sa Liso
Ang kadaghanan sa mga kabog manglupad magabii sa pagpangitag mga kahoy nga lami ug mga bunga o bulak nga daghag dugos. Samtang maningaon, hilison sa mga kabog ang unod ug ikalibang ang sapal ug liso. Sa pagtapos sa ilang pagpananom, ilang mapertilisar ang bulak pinaagig pollen samtang maniba sa dugos nga ilang kinaham.
Sanglit ang mga kabog lagyog abot sa ilang pagpanglupad magabii, dako kaayong luna ang ilang masabwagag mga liso. Ug kay ang makaon nga liso maapil man ug kalibang, ang kinalibang magsilbing abono sa liso. Busa, daghang matang sa tanom sa lasang nagdepende sa kabog aron ang mga bulak niini mapertilisar o ang mga liso niini makatag.
Sanglit layo silag maabot, ang mga kabog kinahanglang eksperto sa nabigasyon ug hait ug panan-aw. Sa ngitngit, mas maayo silag panan-aw kay sa tawo. Makaila pa gani silag pipila ka kolor. Ug sila manglupad dili lang magabii kondili bisan pod ug adlawan.
Kinabuhi Ingong Pamilya
NAHIBALO KA BA? Lahi sa ubang matang sa kuwaknit, ang kabog mangitag pagkaon, dili pinaagig echolocation (pagpagawas ug signal nga mobandag balik kanila), kondili pinaagig panan-aw ug panimaho. Ang ilang dagkong mata dakog tabang sa ilang kinabuhi magabii
Ang kabog sa Samoa usa ray pares sa tibuok niyang kinabuhi. Naobserbahan nga dunay ubang matang sa kabog nga ang baye maayong moatiman ug anak, nga magdaladala niini sulod sa pipila ka semana ug magpasuso hasta sa maghamtong. Dunay duha ka matang sa kabog diin ang baye manawag ug “mananabang” sa pagtabang kaniya sa pagpanganak.
Ikasubo, daghang kabog nameligrong mapuo, nga ang usa sa hinungdan niini mao ang pagkadaot sa ilang puy-anan. Sa kaislahan sa South Pacific, ang pagkapuo sa kabog makahatag ug dakong kadaot kay ang ubang matang sa tanom sa maong mga isla nagdepende sa kabog sa pagpertilisar sa mga bulak niini pinaagig pollen. Dayag nga ang buluhaton niini nga mga hardinero sa kahanginan hinungdanon kaayo.
a Ang mga kabog makita sa Africa, Asia, Australia, ug sa ubang isla sa Pasipiko.