KABOG

[Heb., ʽatal·lephʹ].

Usa ka sus-an ug molupad nga hayop nga, kon walay dagkong mga pako nga panit, kaamgid sa ilaga. Ang Kasulatan nagklasipikar sa kabog ingong lakip sa mahugawng molupad nga mga linalang nga dili pagakan-on sa mga Israelinhon. (Lev 11:19; Deu 14:18) Mga 20 ka nagkalainlaing espisye sa mga kabog (Chiroptera) ang makaplagan sa Israel karong adlawa.

Sa maadlaw ang mga kabog kasagarang mobatog nga magtuwad diha sa mangitngit nga mga langob o sa biniyaang mga tinukod, unya sa pagkakilumkilom kini mogula aron mangitag pagkaon panahon sa kagabhion. Kon kini mobatog nga tinagdaghan sa usa ka dapit, kini nga dapit manimahong anghit. Sa pipila ka langob ang tai sa mga kabog baga na kaayo, nga mahimong gamiton ingong abono. Walay duhaduha nga tungod sa batasan sa kabog nga mobatog diha sa mangitngit nga mga dapit nga ang manalagnang si Isaias naghisgot bahin sa pagsalibay sa mga diyos nga bulawan ug plata ngadto sa mga kabog. Ang mangitngit ug mahugaw nga dapit mao ang angay sa maong mga idolo, inay ang dungganon ug prominenteng mga dapit nga gibutangan niini sa ilang nalimbongang mga magsisimba.​—Isa 2:20.