Pagbungkag sa Karaang Babag

ANG panagkadaiya ug kadaghan sa pinulongan sa kalibotan—mga 7,000—makapalisod sa biyahe, negosyo, edukasyon, ug gobyerno. Problema kini bisan sa unang panahon. Pananglitan, mga 2,500 ka tuig kanhi, sa pagmando ni Haring Ahasuero (lagmit si Xerxes I), ang mga Persianhon magpasag mga balaod sa tibuok gingharian, “gikan sa India ngadto sa Etiopia, 127 ka probinsiya, ngadto sa matag probinsiya nga gisulat diha sa kaugalingong mga letra niining mga probinsiyaha ug ngadto sa matag tawo diha sa kaugalingong pinulongan niini.”a

Karon, kadaghanang organisasyon—bisan mga gobyerno—dili mosulay sa paghimo nianang lisod nga buluhaton sa paghubad. Apan, dunay usa ka organisasyon nga nakahimo niini. Ang mga Saksi ni Jehova nagpatik ug mga magasin, naggamag mga audio ug video, ug daghang libro—lakip ang Bibliya—sa kapig 750 ka pinulongan. Kini naglakip sa mga 80 ka sign language. Ang mga Saksi nagpatik usab ug lainlaing grado sa Braille para sa mga buta.

Dugang pa, ang mga Saksi ni Jehova wala maghimo niini aron makakuwarta. Sa pagkatinuod, ang ilang mga maghuhubad ug uban pang trabahante pulos boluntaryo. Nganong naningkamot man sila sa paghubad ngadto sa daghan kaayong pinulongan, ug giunsa nila kini paghimo?