Ang Porma sa Kabhang sa Kinhason

ANG kabhang dakog tabang aron ang kinhason makapabiling buhi sa lisod kaayong palibot, nga dili maunsa sa bug-at nga presyur sa tubig. Tungod sa kalig-on sa kabhang, ang mga inhenyero naaghat sa pagtuon sa porma ug estruktura niini aron sa paghimog mga sakyanan ug mga bilding nga makahatag ug proteksiyon sa nagsakay ug nagpuyo niini.

Hunahunaa: Gitun-an sa mga inhenyero ang duha ka porma sa kabhang​—bivalve (kabhang nga mag-akob) ug espayral nga kabhang.

Kon bahin sa bivalve, ilang nadiskobrehan nga tungod sa kulod-kulod sa kabhang, ang presyur o puwersa nga moigo sa kabhang mopaingon sa bisagrahan ug sa baba niini. Pero lahi ang espayral nga kabhang kay ipaagi niini ang presyur ngadto sa kinatung-ang parte ug diha sa bukahan. Ipaagi niining duha ka klase sa kabhang ang presyur nga moigo niini ngadto sa kinalig-onang parte, busa kon mabuak man ugaling ang kabhang, dili ra maunsa ang kinhason.

Ang mga tigdukiduki naghimo usab ug stress test sa pagtandi sa tinuod nga mga kabhang ug sa simple ug artipisyal nga mga kabhang nga nahimo pinaagig 3-D printer. Ang resulta nagpakita nga ang komplikadong porma sa tinuod nga kabhang halos doble ang kalig-on nga makasagang sa presyur kon itandi sa simpleng mga porma.

Bahin sa kon asa magamit kini nga panukiduki, ang Scientific American nag-ingon: “Kon magdrayb ka sa umaabot ug sakyanan nga pormag kabhang, makakuha kinig atensiyon ug gidisenyo nga makapanalipod sa nagsakay niini.”

Unsay imong hunahuna? Ang porma ba sa kabhang mitungha pinaagig ebolusyon? O kini ba gidisenyo?