Unsa nga dalan o paagi sa pagkinabuhi ang gusto nimong sundon sa imong mga anak?
PARA SA MGA GINIKANAN
8 Ehemplo
KON UNSAY IPASABOT
Ang mga ginikanan nga maayog ehemplo nagpadapat sa ilang gitudlo. Pananglitan, dili nimo madahom nga mosultig tinuod ang imong anak kon madunggan niya nga moingon ka, “Sultihi siya nga wala ko,” dihang dili ka gustong makig-estorya sa tawong nangita nimo.
“Ang pamilyar nga panultihon nag-ingon, ‘Buhata kon unsay akong gisulti, dili kon unsay akong gihimo.’ Pero dili kana epektibo sa mga anak. Sila samag mga espongha (sponge) nga makasuhop o makasundog sa tanan natong gisulti ug gihimo, ug sultihan ta nila kon wala nato ipadapat ang atong gitudlo.”—David.
PRINSIPYO SA BIBLIYA: “Ikaw nga nagwali, ‘Ayawg pangawat,’ nagapangawat ka ba?”—Roma 2:21.
KON NGANONG IMPORTANTE
Ang mga anak nga gagmay pa ug bisan ang mga tin-edyer mas maimpluwensiyahan sa ilang mga ginikanan kay ni bisan kinsa—lakip na sa ilang mga isigkabatan-on. Sa ato pa, ikaw ang dunay pangunang responsibilidad sa paggiya sa imong mga anak sa hustong dalan. Siyempre, maposible na kon ipadapat nimo kon unsay imong gitudlo kanila.
“Puwedeng balikbalik natong tudloan ang atong anak ug maghunahuna kon namati ba siya, pero sa usa lang ka higayon nga wala nato ipadapat ang atong gitudlo, mamatikdan na niya. Bisag para nato dili sila makamatikod, mamatikdan sa mga anak ang tanan natong ginahimo.”—Nicole.
PRINSIPYO SA BIBLIYA: “Ang kaalam nga gikan sa langit . . . dili salingkapaw.”—Santiago 3:17.
KON UNSAY IMONG MAHIMO
Susiha ang imong mga prinsipyo. Unsa nga mga kalingawan ang imong ginatan-aw? Giunsa nimo pagtratar ang imong kapikas ug mga anak? Kinsay imong mga higala? Buotan ba ka sa uban? Ikaw ba ang klase sa tawo nga gusto nimong masundog sa imong mga anak?
“Ako ug ang akong bana dili makaako sa pagtudlo sa among mga anak sa mga butang nga wala namo mahimo.”—Christine.
Pangayog pasaylo kon masayop ka. Ang imong mga anak nahibalo nga dili ka perpekto. Pinaagi sa pagsultig “sorry” kon kinahanglan—sa imong kapikas o mga anak—makatudlo ka nilag importanteng leksiyon bahin sa pagkamatinud-anon ug pagkamapainubsanon.
“Kinahanglang madunggan sa atong mga anak nga giangkon nato ang atong sayop ug mangayo tag pasaylo. Kon dili nato na himoon, dili sab sila moangkon sa ilang mga sayop.”—Robin.
“Ingong mga ginikanan, kita ang dunay pinakadakong impluwensiya sa atong mga anak, ug ang atong ehemplo ang pinakaepektibong paagi sa pagtudlo kay ila ning makita sa tanang higayon. Sama nig libro nga may daghang leksiyon nga makat-onan.”—Wendell.