Ang Kasinatian ni Ricardo ug Andres

Ang pagtuon sa Bibliya dunay talagsaong gahom sa pagbag-o sa kinabuhi. Tagda pananglitan si Ricardo ug Andres.

RICARDO: Sa 15 anyos pa lang ko, miapil na kog gang. Dakog impluwensiya nako ang akong bag-ong mga higala. Gani, gusto kong maprisog 10 ka tuig! Morag binuang na paminawon. Pero sa among lugar, kadtong mapriso dayegon ug tahoron. Ug gusto kong maparehas nila.

Nasulayan nako ang tanang buhat sa gang apil ang pagdroga, pagpakigsekso, ug kapintasan. Usa ka gabii niana, apil ko sa pinusilay. Abi nakog mamatay ko, pero nakaikyas ko. Human niana, seryoso kong naghunahuna sa akong kinabuhi ug mga tumong, ug nakadesisyon kong magbag-o. Pero unsaon nako na paghimo? Kinsay motabang nako?

Kadaghanan sa akong mga paryente dili malipayon. Daghan silag problema, gawas lang sa pamilya sa usa nako ka uyoan. Mga maayong tawo sila, ug nagsunod sa mga prinsipyo sa Bibliya. Gani, sa ilaha nako nakat-onan nga Jehova ang ngalan sa Diyos. Busa wala madugay human sa pinusilay, nag-ampo ko kang Jehova. Gisangpit nako ang iyang ngalan ug nangayog tabang niya. Nakurat na lang ko kay pagkasunod adlaw, naay Saksi ni Jehova nga nanuktok sa pultahan! Sukad adto siyay nag-Bible study nako.

Wala madugay nakaatubang kog dakong pagsulay. Pirme kong tawgan sa akong mga higala kanhi aron makig-uban nila. Bisag lisod, mibalibad ko. Determinado kong magpadayon sa pagtuon sa Bibliya. Maayo na lang nga ako tong gihimo! Nabag-o gyod ang akong kinabuhi, ug mibati kog tinuod nga kalipay.

Nahinumdom ko nga miampo ko kaniadto nga gusto nakong maprisog 10 ka tuig aron respetohon ingong membro sa gang. Maong mihangyo ko sa Diyos nga unta makaalagad ko niya bisag 10 lang ka tuig sa bug-os panahon aron makatabang pod ko sa uban. Gitubag gyod sa Diyos ang akong pag-ampo kay nakaalagad ko sa bug-os panahon sulod na sa 17 ka tuig! Ug wala gyod ko mapriso.

Pero kadaghanan sa akong mga higala kanhi napriso sulod na sa daghang katuigan. Ang uban patay na. Dihang mahinumdom ko sa akong kaagi, mapasalamaton kaayo ko sa akong mga paryenteng Saksi. Andam silang malahi sa uban aron magkinabuhi subay sa gitudlo sa Bibliya. Mas dako kog pagtahod nila kay sa akong mga kauban sa gang kaniadto. Labaw sa tanan, mapasalamaton ko sa Diyos kay gitudloan ko niya sa pinakamaayong paagi sa pagkinabuhi.

ANDRES: Natawo ko ug nagdako sa pobreng lugar diin komon ang droga, pagpangawat, pagpatay, ug prostitusyon. Palahubog ug adik sa cocaine ang akong papa. Pirme silang mag-away ug magsinakitay ni Mama.

Bata pa lang ko, nakakat-on na kong moinom ug magdroga. Naa ra ko pirme sa mga karsada. Mangawat ko ug mamaligya sa akong kinawat. Sa nagkadako na ko, naningkamot ang akong papa nga magkasuod mi pero sa sayop nga paagi. Gitudloan ko niya kon unsaon pagpasulod ug droga ug ubang ilegal nga produkto sa among nasod ug sa pagpamaligya niini. Daghan kaayo kog kuwarta ug dali ra ning kitaon. Dayon usa ka adlaw, dihay mga polis nga miabot sa balay. Gidakop ko nila, ug nasentensiyahan kog lima ka tuig nga pagkapriso sa kasong attempted murder.

Usa ka buntag, nadunggan nako sa loudspeaker sa prisohan nga gidapit ang mga piniriso sa panaghisgot sa Bibliya uban sa mga Saksi ni Jehova. Nakadesisyon kong motambong. Nakita nako nga sakto ang ilang gitudlo, maong nagpa-Bible study ko. Wala nila pagaana ang giingon sa Bibliya, hinuon gipatin-aw nila ang taas nga mga sukdanan sa Diyos sa kon unsay maayo ug daotan.

Wala madugay, nakaamgo ko nga dili nako kayang magbag-o kon way motabang nako, ilabina kay gihulga ko sa akong kaubang mga piniriso nga wala ganahi sa akong ginahimo. Maong nag-ampo ko kang Jehova nga hatagan kog kusog ug kaalam, ug gitabangan ko niya. Imbes magpadala sa mga hulga, nakabaton pa gani kog kaisog nga sangyawan ang ubang piniriso.

Dihang mogawas na ko sa prisohan, gikulbaan kaayo ko ug gusto pa gani kong magdugay sa prisohan! Pagbiya nako, daghang piniriso ang mibabay nako. Ang uban mahigalaon pa ganing miingon, “Ayoayo, Pastor.”

Kon wala pa ko magpatudlo sa Diyos, ambot ug unsa nay gidangatan sa akong kinabuhi. Nagpasalamat gyod ko sa Diyos nga iya kong gimahal ug wala isipa nga wala nay pulos.a