MAULIAN KAHA ANG ATONG PLANETA?
HANGIN
KINAHANGLAN nato ang hangin, pero dili lang sa pagginhawa. Giprotektahan pod sa hangin ang atong planeta gikan sa makadaot nga radyasyon sa adlaw. Kon walay hangin, bugnaw gyod kaayo ang temperatura sa tibuok kalibotan.
Unsay Nahitabo sa Hangin?
Tungod sa polusyon sa hangin, nameligro ang kinabuhi dinhi sa yuta. Sumala sa World Health Organization, usa ka porsiyento lang sa populasyon sa kalibotan ang nakaginhawag preskong hangin.
Ang polusyon sa hangin maoy usa sa mga hinungdan sa sakit sa baga, kanser sa baga, ug sakit sa kasingkasing. Kini pod ang hinungdan sa sayong pagkamatay sa mga 7,000,000 ka tawo kada tuig.
Atong Planeta—Gidisenyo nga Maulian
Ang atong planeta naay natural nga abilidad nga padayong makasuplay ug hinlong hangin para sa tanang buhing linalang sa yuta. Pero mahitabo lang ni kon dili grabe ang polusyon. Konsideraha ni nga mga pananglitan:
Nahibalo ta nga gina-absorb sa lasang ang carbon dioxide sa hangin. Pero gamay lang ang nahibalo nga mas labaw pa diay ang ginahimo sa mga bakhawan (mangrove) nga nanubo duol sa dagat. Ang mga bakhawan maka-absorb ug halos lima ka pilo nga carbon dioxide kompara sa mga lasang.
Base sa dili pa dugayng mga pagtuon, naay dagkong mga lumot sama sa kelp nga mo-absorb ug carbon dioxide. Ang mga blade sa kelp naay mga bladder nga punog hangin, mao nga molutaw kini paingon sa lawod. Inig-abot niini sa lawod, ang mga bladder mobuto ug ang kelp nga punog carbon dioxide maunlod ilalom sa dagat. Ug dayon magpabilin ni ilalom sa dagat sulod sa gatosan ka tuig.
Dihang nag-lockdown panahon sa COVID-19 nga pandemic, nakita ang abilidad sa atmospera nga maulian gikan sa grabe kaayong polusyon. Niadtong 2020, ang mga pabrika ug sakyanan halos wala kaayoy gipagawas nga polusyon, maong paspas nga nahinlo ang hangin. Sumala sa “2020 World Air Quality Report,” kapin sa 80 porsiyento sa mga nasod nga miapil sa report ang miingon nga naa silay mas hinlong hangin wala madugay human magsugod ang lockdown.
Ang Paningkamot sa mga Tawo Karon
Ang pagbisikleta makatabang nga mamenosan ang polusyon sa hangin
Padayong giingnan sa mga gobyerno ang mga kompaniya nga menosan ang polusyon sa hangin. Ang mga scientist padayon pod nga nangitag bag-ong mga paagi sa pagwala sa polusyon. Pananglitan, ang usa ka paagi mao ang paggamit ug mga bacteria aron ang mga hugaw himoong dili makahilo nga substansiya. Dugang pa, ang mga eksperto misugyot nga mas maayong maglakaw o magbisikleta ang mga tawo imbes nga magdrayb, ug maningkamot nga menosan ang ilang paggamit ug koryente sa balay.
Ang ubang gobyerno naghatag sa mga tawo ug modernong lutoan aron mamenosan ang polusyon sa hangin, pero daghan gihapon ang wala makabaton niana
Pero labaw pa ang kinahanglang himoon, sumala sa 2022 nga report nga giusa sa lainlaing internasyonal nga ahensiya, sama sa World Health Organization ug sa World Bank.
Ang report nag-ingon nga niadtong 2020, mga 33 porsiyento sa populasyon sa kalibotan ang naggamit ug mga lutoan ug mga pamaagi sa pagluto nga makadugang sa polusyon. Sa daghang lugar, gamay lang ang makapalit ug bag-ong stove o makagamit ug mga alternative fuel.
Mga Rason nga Molaom—Ang Giingon sa Bibliya
“Kini ang giingon sa matuod nga Diyos, si Jehova, ang Maglalalang sa kalangitan ug . . . ang Usa nga nagpahimutang sa yuta ug sa abot niini, ang Usa nga naghatag ug gininhawa sa katawhan ibabaw niini.”—Isaias 42:5.
Ang Diyos ang naghimo sa hangin nga atong giginhawa ug sa mga natural cycle nga nagahinlo sa hangin. Ug naa siyay dakong gahom ug gugma sa katawhan. Busa makasalig ta nga iya gyong wad-on ang polusyon sa atong hangin. Tan-awa ang artikulong “Ang Diyos Nagsaad nga Maulian ang Atong Planeta.”