Ang 10 ka Hampak

TAN-AWA ang mga hulagway. Ang matag usa nagpakita sa hampak nga gipahamtang ni Jehova sa Ehipto. Sa unang hulagway imong makita si Aaron nga nagbunal sa Suba sa Nilo sa iyang sungkod. Sa iyang pagbunal, ang tubig sa suba nahimong dugo ug ang tanang isda nangamatay.

Sunod, gipahitabo ni Jehova nga mokawas ang mga baki sa Suba sa Nilo. Milukop sila sa tanang dapit, ug sa dihang nangamatay sila ang yuta nangabaho kanila.

Unya si Aaron mibunal sa yuta sa iyang sungkod, ug ang abog nahimong mga tagnok. Kini maoy gagmay molupad nga mga tagnok nga mamahit. Ang mga tagnok ang ikatulong hampak sa yuta sa Ehipto.

Ang nahibiling mga hampak nagsakit lamang sa mga Ehiptohanon, dili sa mga Israelita. Ang ikaupat nga hampak mao ang dagkong mga langaw nga mihugpa sa mga balay sa tanang Ehiptohanon. Ang ikalimang hampak maoy diha sa mga mananap. Daghang baka ug karnero ug kanding sa mga Ehiptohanon nangamatay.

Sunod, si Moises ug Aaron mikuha ug mga abo ug nagsaliyab kanila ngadto sa hangin. Kini mipahinabo sa grabeng mga hubag sa mga tawo ug sa mga mananap. Kini ang ikaunom nga hampak.

Human niana, si Moises nag-isa sa iyang kamot ngadto sa langit, ug si Jehova mipadala sa kinangil-aran nga bagyong yelo sa kasaysayan sa Ehipto.

Ang ikawalong hampak mao ang usa ka dakong duot sa mga dulon. Ilang gikaon ang tanan nga wala madaot sa yelo. Ang ikasiyam hampak mao ang kangitngit. Sulod sa tulo ka adlaw ang mabagang kangitngit mitikyop sa yuta, apan ang mga Israelita may kahayag.

Sa kataposan, ang Diyos misugo sa iyang katawhan sa pagwisik sa dugo sa usa ka nating kanding o karnero sa ilang mga pultahan. Unya ang manulunda sa Diyos miagi ibabaw sa Ehipto. Iyang gipatay ang mga panganay sa mga tawo ug sa mga mananap diha sa tanang balay diin walay dugo sa mga pultahan. Kini ang ika-10 nga hampak.

Tapos ning hampaka, si Paraon misulti sa mga Israelita sa pagbiya. Niana gayong gabhiona sila misugod sa ilang pagbaktas paggawas sa Ehipto.