Si Jonas ug ang Dakong Isda

TAN-AWA ang tawo nga anaa sa tubig. Kanang isda molamoyay na kaniya! Nahibalo ba ikaw kon kinsa kining tawhana? Ang iyang ngalan mao si Jonas. Tan-awon ta kon giunsa niya paghidangat sa maong tumang kalisdanan.

Si Jonas maoy usa ka manalagna ni Jehova. Dili pa dugay human sa kamatayon ni Eliseo nga si Jehova nagsulti kang Jonas: ‘Umadto ka sa Ninive. Ang katawhan didto daotan kaayo, ug buot kong makigsulti ka kanila bahin niini.’

Apan si Jonas dili gusto moadto. Misakay siya sa usa ka sakayan dili paingon sa Ninive. Si Jehova wala mahimuot ug siya mipatungha sa usa ka dakong bagyo. Ang mga sakayanon nangalisang nga malunod ang ilang sakayan. Misinggit sila sa ilang mga diyos alang sa panabang.

Sa kataposan, si Jonas mitug-an kanila: ‘Magsisimba ako kang Jehova nga nagbuhat sa langit ug sa yuta. Ug milikay ako sa buluhaton nga gisugo ni Jehova kanako.’ Busa ang mga sakayanon nangutana: ‘Unsay among buhaton kanimo aron sa pagpahunong sa bagyo?’

‘Ilabay ako sa dagat,’ nag-ingon si Jonas. Ang mga sakayanon dili buot mobuhat niini, apan ang bagyo nag-anam kagrabe nga sa kataposan ilang gilabay si Jonas. Sa gilayon, ang bagyo mihunong.

Si Jonas gilamoy sa usa ka dakong isda. Apan wala siya mamatay. Sulod sa tulo ka adlaw ug tulo ka gabii siya diha sa sulod nianang isda. Si Jonas nasubo kaayo nga wala siya magsugot kang Jehova ug moadto sa Ninive.

Si Jonas nag-ampo kang Jehova alang sa tabang. Unya gisugo ni Jehova ang isda nga isuka si Jonas sa mamalang yuta. Human niana, si Jonas miadto sa Ninive. Wala ba kini magtudlo kanato nga hinungdanon atong buhaton ang bisan unsang isugo ni Jehova?