Sinulat sa Bungbong

UNSA ang nagakahitabo dinhi? Ang hari sa Babilonya nakadapit sa usa ka libo inilang mga tawo alang sa usa ka dakong kumbira. Gigamit nila ang bulawang mga kopa ug ang salaping mga kopa ug ang mga panaksan nga kinuha sa templo ni Jehova sa Jerusalem. Apan sa kalit, ang mga tudlo sa kamot sa usa ka tawo mitumaw ug misugod sa pagsulat sa bungbong. Ang tanan nangalisang.

Si Belsasar, ang apo ni Nabucodonosor, mao ang hari karon. Iyang gitanyagan ang iyang maalam nga mga tawo sa daghang mga gasa kon sila makatug-an sa kahulogan sa nasulat. Apan, walay maalam nga mga tawo nga makahimo sa pagbasa sa sinulat o makatug-an sa kahulogan niini.

Ang inahan sa hari nakabati sa kabanha ug misulod sa dakong lawak kan-anan. ‘Palihog ayaw kalisang,’ misulti siya sa hari. ‘Adunay tawo sa imong gingharian nga gihimo ni Nabucodonosor nga pangulo sa tanan niyang maalam nga mga tawo. Ang iyang ngalan maoy Daniel. Siya makatug-an kanimo unsay kahulogan niining tanan.’

Busa diha gilayon, si Daniel gipaatubang. Midumili siya sa pagdawat sa bisan unsang gasa. Misulti siya kon giunsa ni Jehova kausa niana sa pagpapahawa kang Nabucodonosor sa pagkahari tungod kay siya mapahitas-on kaayo.

‘Apan ikaw,’ misulti si Daniel kang Belsasar, ‘nahibalo sa tanan nga nahitabo kaniya, ug sa gihapon ikaw mapahitas-on sama kaniya. Ikaw nag-inom pinaagi sa mga kopa ug mga panaksan gikan sa templo ni Jehova. Ikaw nagdayeg sa bakak nga diyos inay kang Jehova. Kini ang hinungdan ang Diyos nagpadala sa usa ka kamot nga mosulat niining mga pulonga.’

‘Kini mao ang nahisulat,’ miingon si Daniel: ‘ME’NE, ME’NE, TE’KEL ug PAR’SIN.’

‘Ang ME’NE nagkahulogan nga ang Diyos nagkuto sa mga adlaw sa imong gingharian ug taposon kini. Ang TE’KEL nagkahulogan nga ikaw gitimbang diha sa timbangan ug nakaplagan nga walay hinungdan. Ang PAR’SIN nagkahulogan nga ang imong gingharian gihatag ngadto sa mga Medianhon ug sa mga Persianhon.’

Nianang maong gabii ang mga Medianhon ug ang mga Persianhon misugod sa pag-atake sa Babilonya. Ilang nailog ang siyudad ug napatay si Belsasar. Unsa may nahitabo karon sa mga Israelita? Atong masusi sa dili madugay. Apan una atong tan-awon unsay nahitabo kang Daniel.