Ang Sinulat sa Kamot sa Bungbong Nakita Ba Nimo Kini?

“Gikan sa iyang kaugalingong kamot malantaw ang iyang kalumpagan, . . .

Sama sa sinulat sa kamot sa bungbong.”

NIINING mga pulonga, gibatbat sa ika-18ng siglong taga Irlandiya nga magsusulat si Jonathan Swift ang magbabangko. Gihugopan sa mga kliyente nga gustong mobawi sa kuwarta, iyang namatikdan nga haduol na ang iyang kataposan. Sa daghang kasiglohan, ang ekspresyong ‘sinulat sa kamot sa bungbong’ nagpasabot ug haduol nga katalagman.

Apan ang orihinal nga ‘sinulat sa kamot sa bungbong’ mitungha kapin sa 2,500 ka tuig kanhi. Ug ang tulin nga katumanan niini mibag-o sa lakat sa kasaysayan. Aron dugang matuki ang sinugdan sa ekspresyong ‘sinulat sa kamot sa bungbong,’ mobali kita sa basahon sa Bibliya sa Daniel. Makatabang kini kanato sa pagtan-aw sa bili sa mga pasidaan nga anaa sa Kasulatan, ug kini angay mopalihok kanato sa pagpamati sa kritikal nga pasidaan sa atong adlaw.

Gikan sa Kinapungkayan sa Gahom

Gabii kadto sa Oktubre 5, 539 W.K.P. Ang mga pumoluyo sa Babilonya nanag-inom ug nanagsayaw. Bisag ang mga kaaway nga mga Medianhon ug mga Persianhon anaa sa mga ganghaan niini, ang siyudad daw luwas sa kapeligrohan. Ang mga bungbong niini malig-on kaayo, busa naglipaylipay ang tanan. Gani, ang kagahob sa nanagkombira nagpaila sa mga manunulong nga makalahutay ang siyudad sa hataas nga panahon!

Diha sa dakong luna sa iyang palasyo, ug sa walay duhaduha sa dakong garbo, gilantaw si Haring Belsasar ang dagkong mga tawo nga iyang gipatawag alang sa maong okasyon. Iyang gisugo ang iyang mga ulipon sa pagdala sa mga sudlanang bulawan ug salapi nga gikuha sa iyang apohan, si Haring Nabucodonosor, gikan sa templo ni Jehova sa Jerusalem sa mga katuigang milabay. ‘Gikan niining mga sudlanan manag-inom kita sa kahimayaan sa atong mga diyos!’ Hayan maoy gipamulong ni Belsasar.​—Daniel 5:1-4.

Ngadto sa Bug-os nga Pagkalaglag

Sa kalit lamang, nangluspad si Belsasar tungod sa kahadlok. Didto, sa atubangan sa lamparahan duol sa bungbong, mitungha ang usa ka kamot ug nagsulat ug upat ka yano apan tanghagaong mga pulong. Niadtong gutloa, nahunong ang musika ug pagsayaw. Nalisang ang hari ug ang iyang mga tuhod nangurog. Unsay kahulogan niini nga tilimad-on? Tawga ang mga maalamon ug ang mga astrologo! Ang si bisan kinsa nga makahubad niini nga sinulat pasidunggan.​—Daniel 5:5-7.

Ang tanan ginerbiyos nga naghulat sa mga maalamon sa pagsulti. Apan naglibog sila. Unsa ang lalom nga kahulogan niana nga ‘sinulat sa bungbong’? Walay nangahas sa pagbatbat, ug labi pang nalisang ang hari.​—Daniel 5:8, 9.

Nakadungog sa nahitabo, ang reyna misulod sa hawanan sa palasyo. Iyang gipahinumdom kang Belsasar nga diha sa gingharian adunay usa ka dumuluong nga tawong maalamon nga napamatud-an ang iyang katakos. Busa, gipatawag si Daniel. Sa maisogon, iyang gipahinumdoman ang hari sa nahitabo kang Nabucodonosor sa miaging mga katuigan. Dayon, gisultihan ni Daniel si Belsasar sa mahitabo kaniya, nga nag-ingon:

“Mao kining sulata ang gisulat: MENE, MENE, TEKEL ug PARSIN.

“Mao kini ang kahulogan sa pulong: MENE, giihap sa Diyos ang mga adlaw sa imong gingharian ug gitapos kini.

“TEKEL, ikaw gitimbang diha sa timbangan ug nakita nga kulangan.

“PERES, ang imong gingharian gibahin na ug gihatag sa mga Midianhon ug sa mga Persianhon.”​—Daniel 5:10-28.

Kalit nga Katumanan

Naghulat ba si Belsasar sa pagtan-aw kon tukma ba ang mga pulong ni Daniel? Atong tan-awon kon unsay sunod nga nahitabo ug tagdon ang mga hitabo nga may labaw pa kay sa makasaysayanhong kahulogan.

Ang mga panon sa Medo-Persia nanagkalot ug mga kanal aron sa pagpatipas sa Suba sa Euprates nga nagaagos sa siyudad sa Babilonya. Naghulat si Haring Siro ning gabhiona aron matuman ang iyang plano, nga naglaom nga luagan sa mga Babilonyanhon ang ilang pagbantay tungod kay gabii na. Karon, nabuksan na ang mga kanal. Dihang mihunas ang tubig sa gipasimang nga suba, milinya ang mga sundalo sa mga pangpang sa suba.

Niadtong gabhiona ang mga ganghaan sa siyudad sa suba gipasagdang bukas, tingali tungod sa sobrang pagsalig. Gisulong sa mga sundalo sa Medo-Persia ang siyudad sa kalit lamang. Nakasulod ang usa ka panon sa kasundalohan sa palasyo sa hari, ug gipatay si Belsasar. Ang dakong imperyo sa Babilonya napukan.​—Daniel 5:30.

Usa ka Kalaglagan nga Sama ka Kalit

Ang pagkatukma sa interpretasyon ni Daniel nag-ilustrar sa pagkaseryoso sa mga pasidaan sa Bibliya. Sa ulahi ang mga pulong nga gisulat ni apostol Pablo nagpakita nga adunay kalit ug dakong mga hitabo pa nga moabot. Diha sa iyang dinasig nga sulat sa mga Kristohanon sa taga Tesalonica, siya misulat: “Sa diha nga ang mga tawo magkanayon: ‘Ania na ang kalinaw ug kasegurohan!’ sa kalit moabot kanila ang pagkalaglag maingon sa pagbati sa kasakit nga moabot sa babaye nga talianak; ug sila dili makaikyas.”​—1 Tesalonica 5:3.

Apan sama nga naluwas si Daniel ug ang mga Hudiyo dihang nahulog ang Babilonya, busa posibleng maluwas niining umaabot nga kalaglagan sa kamot sa Diyos. Sa unsang paagi? Pinaagi sa pagpabiling matukawon sa espirituwal ug sa ingon matagamtam ang panalipod ni Jehova. “Apan, mga igsoon,” miingon si Pablo, “wala kamo diha sa kangitngit, nga tungod niana pagahikalitan kamo sa pag-abot sa maong adlaw maingon sa kawatan.”​—1 Tesalonica 5:4.

Gipunting ni Pablo ang “adlaw ni Jehova,” ang panahon sa balaang pagpangilabot sa tawhanong kalihokan pinaagi sa Mesiyanikong Gingharian. (1 Tesalonica 5:2) Kanus-a nato mapaabot kining ‘sinulat sa kamot sa bungbong’​—ang mga timaan nga nagapasidaan kanato niini nga pagpangilabot? Ang mas una pa nga tagna, nga natala sa Daniel kapitulo 2, maoy motubag sa atong pangutana.