Pagkaluwas Ngadto sa Usa ka Bag-ong Yuta

Kapitulo 16

Unsay Imong Pagabuhaton sa Personal?

Ang desisyon sa pag-alagad kang Jehova dili mahimo ni bisan kinsa alang kanimo. Kon ang imong kapikas sa kaminyoon usa ka matinumanong alagad sa Diyos kana mahimong bililhon kaayong panalangin. Sa susama, kon ang imong mga ginikanan nahigugma kang Jehova maayo ang imong kahimtang. Ang maong kahimtang sa panimalay makahatag ug kadasig sa pagpakig-uban niadtong nagasimba kang Jehova “uban sa espiritu ug kamatuoran.” (Juan 4:23, 24) Apan sa igong panahon kinahanglang ikaw mohimog personal nga desisyon. Tinuod ba nimong gihigugma si Jehova ug buot mahimong iyang alagad? Buot ba nimong mopuyo sa kalibotan diin magalungtad ang pagkamatarong?

² Kon ikaw usa ka ginikanan, tinong buot nimong ang imong mga anak makatagamtam sa panalangin sa kinabuhing walay kataposan ilalom sa Gingharian sa Diyos. Dili ka makagahom kon unsay ilang buhaton dihang sila may igo nang edad sa pagsubay sa kaugalingon nilang dalan sa kinabuhi. Apan ang imong ginabuhat sa personal mahitungod sa matuod nga pagsimba makahimog dakog impluwensiya—sa ikaayo kaha o ikadaot. Kon magpugong ka sa pag-alagad kang Jehova, kana maghikaw sa imong mga anak sa butang nga mahimong ilang labing maayong higayon sa pagsugod sa pagsubay sa dalan ngadto sa kinabuhing dayon. O kon himoon nimo ang pagpahinungod sa Diyos ug dayon dili ka matinagdanon mahitungod sa pagkinabuhi sumala niana, basin kini motultol sa espirituwal nga katalagman alang sa tibuok pamilya, nga ang tanan mahanaw sa dakong kasakitan. Apan kon imong ihatag ang panig-ingnan sa pagkamatinumanon, kon imong tabangan sa personal ang imong mga anak sa pagtuon sa Pulong sa Diyos, kon imong ugmaron diha sa imong kaugalingon ug diha kanila ang gugma kang Jehova ug pagtahod sa iyang makitang organisasyon, kon imong tabangan sila sa pagkaamgo nga sila mapanalipdan pinaagi sa pagbuhat sa kabubut-on sa Diyos, kon imong ipakita kanila sa unsang paagi makaplagan ang kalipay diha sa sagradong pag-alagad, nan imo silang ginahatagag ekselenteng pagsugod sa pagsubay sa dalang motultol sa kinabuhi. Kini posible lamang uban sa pagpanalangin ni Jehova. (Itandi ang 2 Timoteo 1:5.) Iampo kana sa walay hunong. Gikinahanglan usab ang dakong paningkamot sa imong bahin. Apan pagkamapuslanon unya ang sangpotanan!

³ Tingali ang kahimtang giatubang nimo mao nga ang ubang sakop sa inyong pamilya wala mahigugma kang Jehova sama kanimo. Nagasulay ba sila sa pagpaluya kanimo gikan sa “pagkalangkit”? O may laktud bang pagsupak? Unsay imong mahimo sa pagtabang kanila sa pag-ambit sa imong kalipay sa pagsabot sa katuyoan sa Diyos? Kadaghanan ang kababagan mabuntog pinaagi sa pagdapit sa mga sakop sa pamilya sa pag-uban kanimo sa Kingdom Hall sa pagtan-aw sa ilang kaugalingon kon unsay nagakahitabo didto. Samtang atua didto, mahimong ikasulti nila ang usa sa mga ansiano sa pagpatin-aw sa mga pangutana nga tingali ilang nabatonan bahin sa mga tinuohan ug mga tulomanon sa mga Saksi ni Jehova. Apan unsa man kon mopadayon ang pagsupak? Nan kinahanglang suknaon nimo ang imong kaugalingon: ‘Gihigugma ko ba gayod si Jehova ug ang iyang Anak si Jesu-Kristo ug ako ba mapasalamaton nga igo tungod sa tanang butang ilang gihimo alang kanato mao nga ako andam moantos sa kalisdanan sa pagpakita sa akong gugma ug pagkamapasalamaton? Gihigugma ko ba ang akong pamilya nga igo sa paghatag ug hustong panig-ingnan mao nga, kon mahimo, sila usab matabangan sa pagbaton sa mga tagana sa Diyos sa kinabuhing walay kataposan?’—Mateo 10:36-38; 1 Corinto 7:12, 13, 16.

ANG TIMAAN NGA PAGADANGPAN SA KANASORAN

⁴ Ang higayon karon gipaabot ngadto sa katawhan sa bisan diin sa pagpasundayag sa ilang gugma kang Jehova pinaagi sa paghan-ay sa ilang kaugalingon uban sa iyang Mesiyanikong Gingharian. Ang maong kagamhanan mao ang galamiton nga pinaagi niana ang ngalan ni Jehova pagabayawon. Ang atong tinamdan bahin sa Gingharian nagahatag pamatuod kon unsay atong pagbati kang Jehova mismo.

⁵ Gidasig ni Jehova ang propetang si Isaias sa pagsulat: “Ug mahitabo nga nianang adlawa ang gamot ni Isai motindog ingong usa ka timaan alang sa mga katawhan. Kaniya ang kanasoran modangop nga mausisaon, ug ang iyang dapit pahulayan mahimong mahimayaon.” (Isa. 11:10) Ang maong “gamot ni Isai” mao ang hinimayang Ginoong Jesu-Kristo. Sa misugod siya sa pagpatuman sa harianong awtoridad, ingong nagahatag-kinabuhing “gamot” iyang gihatagag bag-ong kusog ang linya sa Mesiyanikong mga hari nga naggikan kang Isai pinaagi sa iyang anak si Haring David. (Pinadayag 5:5; 22:16) Sukad sa 1914 siya “nagatindog na ingong usa ka timaan alang sa mga katawhan,” usa ka dugokan alang sa katawhang nangandoy sa matarong nga kagamhanan. Si Jehova mismo nagpatindog kaniya ingon nga maong Timaan, ang matuod Mesiyanikong Hari.—Isaias 11:12.

⁶ Apan sa unsang paagi ang mga tawo sa yuta makaalirong sa langitnong Hari? Kinahanglang sila hatagag impormasyon gikan sa Bibliya aron makakita kaniya pinaagi sa mata sa pagsabot. Sa pagtultol sa balaang espiritu, ang nahibilin sa espirituwal nga Israel kusog nagatuman niining buluhatona, nga nagamantala sa tibuok yuta sa maayong balita sa natukod Mesiyanikong Gingharian sa Diyos. Ang mga indibiduwal gikan sa tanang nasod nagpatalinghog nga may apresasyon. Sila nangutana sa balaang mga kinahanglanon alang kanila aron mahimong sakop sa Gingharian, nga magpahimulos ug kinabuhing walay kataposan sa Paraisong yuta. Kay natagbaw sa mga tubag nga gitagana sa Bibliya, sila milihok nahiuyon niini ug mibarog sa kiliran sa Mesiyanikong Gingharian ni Jehova. Nahimo ba nimo kana?

‘SILA MAMATI APAN DILI MOTUMAN’

⁷ Tungod sa madasigong kalihokan sa mga Saksi ni Jehova, sila maoy subsob nga ulohan sa estorya sa mga tawo. Apan unsay pagbati niining mga tawhana bahin sa mensaheng ilang ginasangyaw? Ang sanong sa daghan maoy sama sa iya sa kauban ni Ezekiel nga mga bihag sa Babilonya. Mahitungod kanila, si Jehova miingon: “Mahitungod kanimo, Oh anak sa tawo, ang mga anak sa imong katawhan nagasulti sa usag usa . . . nga nagaingon, ‘Umari ka, palihog, ug pamati kon unsay pulong nga nagagula gikan kang Jehova.’ Ug sila manganha kanimo, sama sa pag-anha sa akong katawhan, ug sila molingkod sa imong atubangan ingon nga akong katawhan; ug sila mamati gayod sa imong mga pulong apan sila dili motuman, kay pinaagi sa ilang baba sila nagapahayag sa unodnong mga pangibog, ug ang ilang kasingkasing nagaagpas sa ilang dili-matarong nga panapi. Ug, tan-awa! alang kanila ikaw maoy sama sa usa ka awit mahitungod sa lawasnong mga gugma, sama sa usa nga may matahom nga tingog ug nagatugtog nga maayo sa usa ka kinuldasang tulonggon. Ug sila mamati gayod sa imong mga pulong, apan walay mausa ang magatuman niini. Ug sa diha nga kini matuman—tan-awa! kini mamatuman gayod—sila makaila usab nga ang usa ka manalagna diha sa ilang taliwala.”—Ezekiel 33:30-33.

⁸ Adunay daghang tawo nga nagadayeg sa mga Saksi ni Jehova ug moangay sa ilang mga basahon sa Bibliya. Tingali dawaton pa nila ang tanyag sa libreng pagtuon sa Bibliya sa balay. Ang pipila motambong uban sa ilang mga higala sa espesyal nga mga tigom nga himoon sa mga Saksi. Sa tinuig nga Memoryal sa pagkamatay ni Jesu-Kristo, pananglitan, kasagarang ang gidaghanon sa tumatambong madoble sa gidaghanon sa aktibong mga saksi ni Jehova. Sa pila ka kayutaan, ang tumatambong moabot pag lima ka pilo sa gidaghanon sa mga Saksi. Apan unsay ilang ginabuhat mahitungod sa mga kamatuoran sa Bibliya nga ilang nadungog? Abot sa duha ka milyon ug tunga sa personal nagbutang niini sa kasingkasing ug nagpahiuyon sa ilang mga kinabuhi niana. Apan ang uban nagaisip nga kana mao lamay nindot nga honi, nga makalingaw. Sila nagapabilin sa daplin, tingali nagadasig apan wala magpahinungod sa ilang mga kinabuhi sa Diyos ug wala moapil sa iyang sagradong pag-alagad.

⁹ Unsay maangkon sa pagduhaduha ug paghulat? Tinong dili ang pabor ug panalipod ni Jehova sa umaabot nga adlaw sa panimalos. Aron mahiapil sa maluwas, kinahanglang ihatag ang makapatuong ebidensiya karon nga ikaw ‘mianib kang Jehova’ ug ikaw iya.—Zacarias 2:11; Mateo 7:21.

ILANG GIHIMO ANG HUSTONG DESISYON

¹⁰ Ang tanang nahimong magsisimba ni Jehova ingong mga sumusunod ni Jesu-Kristo mihimog personal nga desisyon sa pagbuhat niana. Kini matuod sa tanan nga manununod sa langitnong Gingharian. Karon ang bililhong higayon bukas aron ang uban makapili, uban ang kalaomang maluwas sa dakong kasakitan ug pagpuyo sa kahingpitan sa yuta. Gihatag ni Hobab ang usa ka panig-ingnang takos nilang pagasundon.

¹¹ Si Hobab maoy bayaw nga lalaki ni Moises. Siya dili usa ka Israelinhon kondili usa ka membro sa tribo sa mga Kenihanon nga nagpuyo sa Midianhong teritoryo. Human madawat sa Israel ang Kasugoan pinaagi ni Moises ug matukod ang sagradong tabernakulo alang sa pagsimba ni Jehova, ang panahon miabot na sa paglakaw paamihanan paingon sa Yutang Saad. Ang haligi sa panganod nga naghawas sa presensiya ni Jehova maoy magauna kanila, nga nagpaila sa ruta nga subayon ug kon asa mokampo. Apan makatabang nga may ikauban sila nga nasayod sa dapit ug kon asa mangita sa mga butang gikinahanglan sa kampamento. Gidapit ni Moises si Hobab nga mokuyog kanila, apan sa sinugdan mibalibad si Hobab, kay naghunahunang maayo pa nga magpabilin uban sa iyang mga paryente sa dapit niyang natawhan. Bisan pa niana, giawhag siya ni Moises sa pagpalandong niana pag-usab ug pagkuyog kanila aron “magsilbing mga mata” alang sa Israel ug sa ingon mahalinya sa pag-ambit sa mga panalanging ihatag ni Jehova sa iyang katawhan. Sa pagkamaalamon kana gibuhat ni Hobab, sumala sa Maghuhukom 1:16.—Numeros 10:29-32.

¹² Adunay mga tawo karon nga gihulagwayan ni Hobab. Bisan pag dili espirituwal nga mga Israelinhon, sila nakig-uban kanila samtang sila nagapanaw paingon sa Bag-ong Kahikayan sa Diyos. Sa pagbuhat niini, kinahanglang putlon nila ang koneksiyon sa kalibotanong mga paryente ug tawhanong mga gobyerno. Sa pagpanguna sa Labawng Moises, si Jesu-Kristo, sila malipayong nagaalagad uban sa nahibilin sa “mga igsoon” ni Kristo, nga nagapangitag bag-ong teritoryo nga masangyawan sa maayong balita. Daghan kanila namalhin sa mga dapit diin dako ang panginahanglan sa magmamantala sa Gingharian, kadaghanan ingong payunir o misyonaryo, nga nagagamit sa ilang panahon sa bug-os sa pagmantala sa Gingharian sa Diyos ingong bugtong tinuod nga paglaom sa katawhan. Daghan pa ang kahigayonan nga makig-ambit sa maong sagradong pag-alagad. Ang kuwalipikadong mga tawo gidapit sa paghimo sa ilang kaugalingon nga andam ug sa ingon makaambit sa mga panalangin nga duyog nianang gipauswagang pag-alagad. Makahimo ka ba niana?

¹³ Mga 180 ka tuig tapos sa paghukom ni Hobab nga mokuyog sa Israel, usa sa iyang mga kaliwat, ang tawong ginganlag Heber, nagpuyo uban sa iyang asawa, si Jael, nga dili halayo sa Megiddo. Si Heber nahibulag sa ubang Kenihanon ug misulod sa malinawong relasyon uban kang Jabin, usa ka Canaanhong hari nga mabangisong nagdaogdaog sa Israel. Sa gibangon ni Jehova si Barak ingong manluluwas sa Israel, ang pangulo sa kasundalohan ni Jabin, si Sisera, nag-andam sa iyang kasundalohan ug sa walo ka gatos ka karro sa gubat uban sa puthawng galab nga gitaod sa ligid. Apan si Jehova nakig-away alang sa iyang katawhan, nga nagpagubot sa kampo sa kaaway, ug ang dakong baha naglubong sa mga karro. Si Sisera mibiya sa iyang karro ug mikalagiw nga nagbaktas paingon sa balongbalong ni Jael ang asawa ni Heber. Sumala sa gilaoman ni Sisera, siya gipasulod ni Jael sa balongbalong.—Maghuhukom 4:4-17; 5:20, 21.

¹⁴ Karon diha na ang pagsulay. Unsay iyang buhaton sa kaaway sa katawhan ni Jehova? Iyang gihabolan si Sisera, gihupay ang iyang kauhaw pinaagi sa gatas ug nagpaabot hangtod siya nahikatulog. Niana siya “mikuha sa lagdok sa balongbalong ug mibitbit sa pakang. Unya siya mihinay sa pagsulod ug gibugsok ang lagdok sa iyang dungandungan ug kana milapos sa yuta, samtang siya nahinanok sa katulog ug gikapoy. Busa siya namatay.” Ang iyang gibuhat nagkinahanglag kaisog, ug gugma kang Jehova ug sa iyang katawhan. Nalangkit usab ang positibong aksiyon ug panlimbasog sa iyang bahin.—Maghuhukom 4:18-22; 5:24-27, 31.

¹⁵ Ingon nga matuod sa ubang dili-Israelinhong magsisimba ni Jehova, si Jael nagahulagway sa “ubang mga karnero” nga nagabuhat ug maayo sa espirituwal nga mga igsoon ni Kristo. Walay sapayan sa koneksiyon sa ilang suod nga mga paryente sa kalibotan ug mga pamunoan niini, ang “ubang mga karnero” dili mouyon sa pagdaogdaog sa katawhan ni Jehova pinaagi sa mga pamunoan sa kalibotan. Ang ilang pag-unong maoy sa Labawng Barak, ang Ginoong Jesu-Kristo, ug sa iyang matuod nga mga sumusunod. Sila nga iya sa Jael nga matang dili personal nga mobakyaw sa kamot batok sa mga pamunoan sa kalibotan, kondili gamiton nila ang bisan unsang magamit sa pagsumpo sa panlimbasog sa pagdaogdaog sa mga alagad ni Jehova. Sila dili magpugong sa pagpahibalo nga sila nahiuyon sa katuyoan ni Jehova sa paglaglag sa tanan niyang kaaway.

¹⁶ Walay panahong usikan. Kon ikaw may pagtuo kang Jehova ug sa iyang Mesiyanikong Gingharian ug kon imong gipahiuyon ang imong kinabuhi sa mga kinahanglanon sa Bibliya, nan, nga walay langan, kana ipasundayag. Ibanaag ang espiritu sa Etiopianhong eunuko nga gitaho sa Buhat kapitulo 8. Dihang iyang nasabtan kon unsay gikinahanglan gikan kaniya, siya nangutana kang Filipe, kinsa misaysay kaniya sa maayong balita mahitungod kang Jesus: “Unsay nagapugong kanako nga mabawtismohan?” Ug siya gituslob gilayon sa tubig.

¹⁷ Tungod kay nahimo na ang maayong pagsugod, sa matag adlaw lig-ona ang imong relasyon kang Jehova, nga mangitag mga paagi sa pagpadapat sa bug-os pa sa iyang Pulong nganha sa imong kinabuhi, ug makig-ambit sa labing bug-os nga mahimo sa bililhong buluhaton sa pagmantala sa Gingharian nga ginabuhat sa kataposang mga adlaw niining sistema sa mga butang.

[Mga Pangutana nga Pagatun-an]

1. Unsang desisyon ang pagahimoon sa personal?

2. (a) Nganong ang tinamdan sa usa ka ginikanan bahin sa pag-alagad kang Jehova hinungdanon ilabina? (b) Unsa ang lima ka butang mahimo sa mga ginikanan sa paghatag sa ilang mga anak ug maayong pagsugod?

3. (a) Kon imong mahibalag ang pagsupak sa mga membro sa pamilya, unsay mahimong buhaton? (b) Apan unsa man kon magpadayon ang pagsupak?

4. Sa unsang paagi atong ikapakita nga tinuod natong gihigugma si Jehova?

5. (a) Sa Isaias 11:10, unsay gitagna alang sa atong adlaw? (b) Unsay kahulogan niini?

6. (a) Unsay nakapahimo sa mga tawo sa pagtigom palibot sa usa ka langitnong Hari? (b) Ingong resulta sa ‘pagdangop nga mausisaon’ ngadto sa “timaan,” unsay nahibaloan sa mga tawo?

7. Unsang sanong ngadto sa mensahe sa Bibliya ang natagna sa Ezekiel 33:30-33?

8. Sa unsang paagi ang pila ka tawo nagahatag ebidensiya nianang maong tinamdan?

9. Inay sa pagduhaduha ug paghulat, unsay pagabuhaton sa maalamong mga tawo?

10, 11. (a) Kinsa si Hobab, ug unsang pagdapit ang gipaabot ngadto kaniya? (b) Sa unsang paagi atong nasayran kon unsang desisyon ang iyang gihimo?

12. (a) Kinsa karong adlawa ang sama kang Hobab, ug sa unsang mga paagi? (b) Unsang pagdapit karong adlawa ang sama sa kang Moises ngadto kang Hobab?

13. (a) Kinsa si Jael, ug unsa ang posisyon sa iyang bana bahin sa mga alagad ni Jehova? (b) Sa unsang paagi naatubang ni Jael ang usa ka pagsulay?

14. Unsang desisyon ang gihimo ni Jael, ug kadto mihatag ug ebidensiya sa unsa?

15. Sa unsang paagi ang mga tawo karong adlawa nagapamatuod nga sila sama kang Jael?

16, 17. (a) Unsang panig-ingnan nga angay natong sundon ang nahitala sa Buhat kapitulo 8? (b) Tapos niana unsay angay natong ipadayon sa pagbuhat?