HOBAB

[lagmit, Pinangga].

Bayaw nga lalaki ni Moises; anak ni Reuel (Jetro) ug usa ka Midianhon, sa tribo sa mga Kenihanon. (Num 10:29; Ex 3:1; Huk 1:16) Sa dihang miabot ang panahon nga mobalhin ang mga Israelinhon gikan sa rehiyon sa Bukid sa Sinai paingon sa Yutang Saad, gihangyo ni Moises si Hobab nga mokuyog kanila aron magsilbing “mga mata,” o ingong usa ka giya, alang sa nasod tungod kay siya suheto man sa maong dapit. Bisan tuod sa sinugdan si Hobab midumili, dayag nga siya mikuyog ra sa mga Israelinhon, kay ang iyang mga kaliwat, ang mga Kenihanon, nanimuyo man sa Kamingawan sa Juda sa H sa Arad ug giingong nagpuyo pa gihapon sa maong dapit sa panahon ni Saul ug David.​—Num 10:29-32; Huk 1:16; 1Sa 15:6; 27:10; 30:​26, 29.

Apan, ang Masoretikong teksto sa Maghuhukom 4:11 nagpaila kang Hobab ingong ugangang lalaki ni Moises. (NW, Yg, Ro, Da, JP, Mo, AT) Busa ang ngalan nga Hobab lagmit nagtumong sa duha ka magkalahi nga indibiduwal, nga mao, ang ugangang lalaki ni Moises ug ang iyang bayaw nga lalaki. Dili kini imposible tungod kay ang ugangang lalaki ni Moises gihatagan man ug labaw pa sa usa ka ngalan.​—Itandi ang Ex 2:16-22; 3:1.

Sa laing bahin, kon ang Hobab mao lamang gayod ang ngalan sa anak nga lalaki ni Reuel ug busa mao lamang ang ngalan sa bayaw nga lalaki ni Moises, nan ang paghisgot kang Hobab ingong ugangang lalaki ni Moises nagkahulogan nga si Hobab gilantaw ingong hawas sa iyang amahan nga si Reuel, kinsa lagmit nga patay na niadtong tungora.​—Tan-awa ang JETRO; KENIHANON.