Kapitulo 17
Usa ka Lahing Tinamdan Bahin sa Pagkamasinugtanon
SA daghang katuigan una pa malaglag ang Jerusalem pinaagi sa mga taga-Babilonya, gipasidan-an ni Jehova ang mga Hudiyo kon unsay umaabot, ug kon ngano. Sila nagsunod sa kiling sa ilang gahiang kasingkasing inay nagmasinugtanon sa Diyos.—Jeremias 25:8, 9; 7:24-28.
2 Si Jehova dili mopugos kang bisan kinsa sa pag-alagad kaniya, apan, sa makataronganon, gipangayo niya ang pagkamasinugtanon sa tanang nagatinguha sa iyang pag-uyon ug sa mga panalangin sa kinabuhi nga duyog niana. Tapos sa pagluwas sa Israel gikan sa Ehipto, sila gisultihan ni Jehova: “Kon inyong sugton ang akong tingog ug bantayan ang akong tugon, nan kamo mahimong akong linaing kabtangan gikan sa tanang ubang katawhan, tungod kay ang tibuok yuta ako man. Ug kamo mismo alang kanako mahimong usa ka gingharian sa mga saserdote ug usa ka balaang nasod.” (Exodo 19:5, 6) Human ipahayag sa Diyos ang iyang mga kinahanglanon alang kanila ug ilang madungog ang pagbasa sa “basahon sa tugon,” sa kinabubut-on ilang gidawat ang responsabilidad nga duyog sa maong relasyon uban sa Diyos.—Exodo 24:7.
3 Ugaling, wala gayod magdugay nga misugod pagkadayag ang espiritu sa pagkamasukolon. Ang mga anak sa Israel sa dayag wala magsalikway sa ilang pagtuo kang Jehova; apan, sa paglapas sa iyang kasugoan, daghan ang misulay sa pagsagol sa Ehiptohanong mga buhat uban sa pagsimba ni Jehova. (Exodo 32:1-8) Sa ulahi ang pipila nagsaway sa mga lalaking gigamit ni Jehova ingong iyang makitang mga hawas. (Numeros 12:1-10; 16:1-3, 31-35) Ingong usa ka nasod, ang Israel nagpakitag kakulang sa pagtuo sa paglihok pinasukad sa Pulong sa Diyos, tungod kay nahadlok sa tawo. (Numeros 13:2, 31-33; 14:1-4; Hebreohanon 3:17-19) Dihang ang mga sayop dili tinuyo, ang mapaubsanong mga mahinulsolon nakabatog kapasayloan. Apan latas sa siyam ka siglo ang nasod tinuyong wala manumbaling sa unang balaang kinahanglanon, dayon sa lain, ug sa subsob sa daghan niana nila. Ang mga butang ilang gibuhat ug ang sangpotanan nahitala sa Bibliya ingong pasidaan alang kanato.—2 Cronicas 36:15-17; 1 Corinto 10:6-11.
4 Sa mga adlaw ni Jeremias, tapos ihatag ang masubsob nga mga pasidaan bahin sa daotang sangpotanan sa ilang paggawi, gibutang ni Jehova sa atubangan sa mga Hudiyo ang usa ka panig-ingnan—ang mga Rechabita. Kini sila mga dili-Israelinhon, mga kaliwat ni Jehonadab nga nagpasundayag nga siya bug-os nahiuyon sa dili pagtugot ni Jehu sa pakig-indig kang Jehova. Ang maong Jehonadab (o, Jonadab) ingong patriarkang pangulo sa tribo sa mga Rechabita nagsugo kanila sa paglikay sa bino sa panahong walay katinoan, sa dili usab pagpuyo sa mga balay o sa pagpanguma apan sa pagpuyo sa mga balongbalong ingong mga laag. Sa ingon sila nagkinabuhi sa ligdong, yanong kinabuhi, nga nahigawas sa pagpatuyang ug sa mga bisyo sa kinabuhing siyudadnon, samtang nagsimba kang Jehova uban sa mga Israelinhon, nga sa ilang taliwala sila nagpuyo.
5 Sanglit ang mga Hudiyo wala mamati kang Jehova, ang Unibersohanong Soberano, madahom bang sundon sa mga Rechabita ang ilang tawhanong katigulangan? Sila misunod, ug sa sulundang paagi. Bisan tuod ang mga Rechabita midangop sa Jerusalem dihang ang Babilonyanhon ug Siryanhong kasundalohan misulong sa Juda, sila nagpadayon sa pagpuyo sa mga balongbalong. Apan unsa ka lig-on ang ilang hukom nga dili mohikap ug bino, bisan pag ang katawhan nga sa ilang taliwala sila nagpuyo gitugotan sa pag-inom niana? Gisugo ni Jehova si Jeremias nga ipadala ang mga Rechabita ngadto sa kan-anan sa templo, ipagawas ang duha ka kopa sa bino ug imbitahon sila sa pag-inom. Sila midumili. Ngano? Lagmit ilang gipabilhan ang debosyon sa ilang katigulangan ngadto kang Jehova, ilang nasabtan ang iyang mahigugmaong kabalaka sa ilang kaayohan, ug busa ilang gisugot ang iyang sugo. Si Jehova nahimuot sa maong maayong panig-ingnan sa pagkamasinugtanon nga nagpadayag sa kakulang sa pagkamasinugtanon sa mga Hudiyo kang Jehova.—Jeremias 35:1-11.
6 Adunay mga tawo karong adlawa nga sama sa mga Rechabita. Kini sila mao ang “ubang mga karnero” sa Ginoo. Kon sila moinom ba ug bino dili mao ang isyu karong adlawa. (Itandi ang 1 Timoteo 5:23.) Kini personal nga butang basta sila dili mahimong kusog nga mga palainom o tingali palahubog. (Proverbio 23:20; 1 Corinto 6:9, 10) Apan bililhon ang diyosnong pagkamasinugtanon. Kasukwahi sa Kakristiyanohan, nga mao ang antitipikal apostatang Israel, ang modernong-adlawng Rechabita nga matang nagapakita pinaagi sa ilang lihok nga sila nasayod sa bili sa diyosnong pagkamasinugtanon. Sa unsang paagi sila nakabatog kaayohan?
7 Tungod sa ilang debosyon, si Jehova mihatag sa mga Rechabita ug saad nga may gamhanan matagnaong kahulogan sa atong adlaw, nga miingon: “Tungod kay inyong gisugot ang sugo ni Jehonadab nga inyong katigulangan ug nagapadayon sa pagbantay sa tanan niyang sugo ug nagabuhat sumala sa tanang iyang gisugo kaninyo, busa kini ang giingon ni Jehova sa mga panon, ang Diyos sa Israel: ‘Dili maputol gikan kang Jonadab ang anak ni Rechab nga usa ka tawo sa pagbarog sa akong atubangan sa tanang panahon.’” (Jeremias 35:18, 19) Sila nahiapil sa mga naluwas sa pagkalaglag sa Jerusalem sa 607 W.K.P. Ug ang matang nga ilang gilandongan maluwas sa umaabot nga pagkalaglag sa Kakristiyanohan ug sa tanang ubang bahin sa kalibotan nga sa pagkaindependente nagasunod sa iyang mga paagi, nga wala moila sa pagkasoberano ni Jehova.
NGANONG ANG PAGKAMASINUGTANON TINGALI DILI SAYON
8 Daghang tawo ang malisdan sa pagkakat-on sa pagkamasinugtanon. Sila nagtubo sa kalibotan diin ang tanan ‘nagabuhat kon unsay gusto.’ Tingali gusto nila ang ilang nakat-onan mahitungod sa kinabuhi ilalom sa Gingharian sa Diyos. Apan kon ang ilang kaisipan malubog tungod sa garbo, basin sila mosinta sa pipila sa mga kinahanglanon sa Diyos o dili makaangay sa paagi sa paghatag niini kanila. (Proverbio 8:13; 16:18) Si Naaman, ang pangulo sa kasundalohan sa Sirya sa mga adlaw sa propetang si Eliseo, nagbaton sa maong suliran.
9 Si Naaman may sakit nga sanla. Apan tungod kay ang usa ka dalagitang Israelinhong binihag maisogong mipahayag sa iyang pagtuo nga si Naaman mamaayo kon siya moadto unta sa propeta ni Jehova si Eliseo, si Naaman mipanaw paingon sa Israel. Uban ang mga kabayo ug mga karro sa gubat siya miadto sa balay ni Eliseo. Karon, si Naaman usa ka iladong tawo ug iyang gidahom nga si Eliseo mogula sa pagsugat kaniya ug dayon mohimo sa seremonyas, nga mosangpit kang Jehova ug mopalihok sa iyang kamot ngadto nganhi ibabaw sa gisanla nga unod hangtod kadto mamaayo. Inay hinuon, gisugo lamang ni Eliseo ang mensahero sa pagsulti kaniya sa pag-adto sa Subang Jordan ug pagkaligo sa pito ka beses.—2 Hari 5:1-12.
10 Ang garbo ni Naaman natandog. Siya milakaw nga masuk-anon. Apan tapos mangatarongan kaniya ang iyang mga sulugoon, siya nagpaubos nga matinuohon. “Niana siya midulhog ug misalom sa Jordan sa pito ka panahon sumala sa pulong sa tawo sa matuod nga Diyos; tapos niana ang iyang unod nahibalik sama sa unod sa usa ka batang lalaki ug siya nahinlo.” Si Naaman nakombinsir nga si Jehova mao ang bugtong matuod nga Diyos, ug iyang naamgohan nga, bisan pa sa iyang unang reaksiyon, ang mga direksiyong gihatag ni Eliseo gikan gayod sa Diyos.—2 Hari 5:13-15.
11 Nakita ba nimo tingali ang pila ka kinaiya ni Naaman diha sa imong kaugalingon? Sama sa ubang dili-Israelinhon nga nagpakitag pagtuo, si Naaman gigamit sa Kasulatan sa paghulagway sa “ubang mga karnero” nga nagakuyog sa matuod nga pagsimba. Silang tanan, kay natawo sa sala, sa nangagi masakiton sa espirituwal. Silang tanan nagtinguha sa tabang sa dinihogang ulipon nga matang ni Jehova ug unya milihok nga masinugtanon pinasukad sa gitudlo kanila sa maong “ulipon” gikan sa Pulong sa Diyos. (Mateo 24:45) Ang pipila sa usa ka panahon walay pagpabili sa tanang Kasulatanhong tambag nga gihatag kanila—sama sa panginahanglan sa pagtambong nga regular sa mga tigom sa kongregasyon, sa bili sa pagkabulag sa kalibotan o sa Kristohanong bawtismo sa tubig. Sila nagpugong sa pagpahinungod ug sa bawtismo sa tubig tungod kay ang ilang kasingkasing misukol sa panginahanglan nga ‘dumilian ang kaugalingon’ aron mahimong sumusunod ni Kristo. Sa pila ka kaso ilang gisaway ang paagi sa paghatag kanila sa tambag pinaagi sa mga tawong may katungdanan sa kongregasyon. Apan sa igong panahon ang tanang mahimong “ubang mga karnero” sa Ginoo kinahanglang makatuon sa bili sa pagpaubos ug sa mahigugmaong pagkamasinugtanon.—Santiago 4:6; Mateo 16:24.
MGA SUGO NGA MAKAAYO KANATO
12 Samtang atong mailhan si Jehova ug ang iyang mga paagi, kita makapabili unsa ka matuod ang mga pulong iyang gipamulong ngadto sa iyang mga alagad sa mga panahong nangagi: “Ako, si Jehova, mao ang imong Diyos, ang Usang nagatudlo kanimo sa pagpahimulos, ang Usang nagapalakaw kanimo sa dalan nga imong pagalaktan. Unta kon ikaw magapamati sa akong mga sugo!” (Isaias 48:17, 18) Ang tim-os nga tinguha ni Jehova mao nga ang iyang katawhan makalikay sa katalagman ug makatagamtam sa kinabuhi pinaagi sa pagpamati sa iyang mga sugo. Siya nasayod sa atong pagkagama ug kon unsay mohatag kanatog tiunay nga kalipay. Kita iyang gipasidan-an batok sa paggawi nga makapadaot kanako o makadaot sa atong relasyon sa uban.
13 Kadtong nagapamati sa iyang pasidaan batok sa pakighilawas ug sa panapaw nahigawas sa emosyonal nga kasamok, sa sakit ug sa pinaangkang mga anak nga ipatungha niini. (1 Corinto 6:18; Hebreohanon 13:4) Pinaagi sa pagpadapat sa tambag sama nianang anaa sa 2 Corinto 7:1, sila nagapabiling nahigawas sa pagkagiyan sa tabako ug sa ubang droga nga nagadaot sa panglawas sa usa ug mahimong mosangpot sa sayo nga pagkamatay. Ang iyang sugong ‘likayi ang dugo’ nagatabang sa iyang mga alagad sa paglig-on sa ilang pagsalig kaniya ingon nga mao ang Usa nga gisandigan sa tanan nilang kalaoman sa umaabot nga kinabuhi, ug kini nagapanalipod kanila batok sa makalilisang nga mga sakit nga ikapakaylap sa mga abono sa dugo.—Buhat 15:28, 29.
14 Basta kita ania sa kalibotan, adunay usa ka tinong gidak-on sa kinahanglang pakigkontak kanila. Apan si Jehova nagapasidaan kanato nga dili isandig ang atong mga paglaom niini, nga dili mahimong bahin niini. Siya nahibalo kon unsay umaabot sa kalibotan. Pagkabinuang ang paggugol sa kinabuhi sa usa sa paglig-on sa butang pagagub-on sa Diyos! Daotan pa, kadtong nagabuhat niana makadiskobreng ilang mabatonan usab ang dulnganan sa kalibotan nga maoy ilang gidebotohan sa ilang mga kinabuhi. Busa, pagkamapuslanon ang tambag nga gihatag sa Anak sa Diyos: Pangitaa ang Gingharian sa Diyos! Unaha kana sa imong kinabuhi!—1 Juan 2:17; Mateo 6:33.
15 Uban ang bug-os nga kaamgohan sa kon unsay atong gikinahanglan, si Jehova nagaandam sa iyang katawhan alang sa kinabuhi diha sa iyang matarong nga bag-ong sistema sa mga butang. Ang pagkamasupilon sa bahin ni Adan mitultol sa tawhanong pagkadili-hingpit, pagkawala sa kinabuhing walay kataposan ug pagkapalagpot gikan sa Paraiso. Tinong kon buot natong mahiapil niadtong mabulahan sa butang giwala ni Adan, kinahanglang ihatag nato ang ebidensiya nga kita nagapamati kon mosulti ang Diyos. Ug sa unsang paagi siya mosulti kanato panahon sa Milenyo nga umaabot, samtang ang katawhan pagadad-on sa kahingpitan? Pinaagi sa Mesiyanikong Gingharian. Ang maong kagamhanan magbaton ba usab ug makita yutan-ong mga hawas? Oo. Ang Hari magbaton ug mga alagad niya nga mao “ang mga prinsipe sa tibuok yuta.” (Salmo 45:16; itandi ang Isaias 32:1, 2.) Pinaagi sa mahigugmaong pagkamasinugtanon sa maong mga prinsipe, ang katawhan magpasundayag sa pagpasakop ngadto sa ilang langitnong Hari.
16 Sa pagpangandam alang sa maong panahon, si Jehova karon nagataganag pagbansay pinaagi sa iyang makita teokratikanhong organisasyon. Sulod sa mga kongregasyon siya nagapatindog ug mga tawong tigulang sa espirituwal, o mga ansiano. Sila nagatagana sa gikinahanglang pagdumala sa mga tigom sa kongregasyon ug nagapanguna sa pagsangyaw sa mensahe sa Gingharian. Sila nagatabang sa tanang buot moalagad kang Jehova sa pagtuon kon unsaon sa pagpadapat sa mga prinsipyo sa Bibliya diha sa ilang mga kinabuhi ug sila mahigugmaong nagapasidaan batok sa mga lit-ag nga makadaot sa relasyon sa usa uban sa Diyos. Ang mga Saksi ni Jehova sa tibuok kalibotan nakaamgo usab nga ang pagpamati sa mga direksiyon sa mga ansiano sa subsob mosangpot sa pagkaluwas sa kinabuhi panahon sa mga bagyo, mga linog ug mga pagsilaob sa armadong kapintasan. Ang kongregasyon dili iya sa mga ansiano; kini iya sa Diyos. Ang mga ansiano wala moangkong sila inspirado. Apan, sumala sa Kasulatan, ang Diyos nagagamit kanila sa pagpanguna, ug ang pagkamasinugtanon kanila nagapasundayag sa pagtahod sa kahikayang gigamit ni Jehova sa pag-andam sa iyang mga alagad aron maluwas sa iyang Bag-ong Sistema.—Buhat 20:28; Hebreohanon 13:17.
17 Bisan pa niana, ang tinguha nga mahiapil sa mga maluwas sa umaabot nga kalaglagan sa kalibotan dili mao lamang ang nagadasig sa maong pagkamasinugtanon. Adunay labaw pa. Unsa man? Ang pagpabili sa kinabuhi ug sa tanang tagana nga gihimo sa Diyos sa pagsustento niini. Ang pagpasalamat sa iyang mga gasa nga nagapatugob sa atong mga kinabuhi—ang katakos sa pagpangatarongan, ang pagpabili sa katahom ug sa espirituwal nga mga prinsipyo, ang katakos nga makaila ug makasimba sa atong Maglalalang. Gawas pa, ang pagkaamgo sa dakong gugma sa bahin mismo sa Diyos nga nagdasig kaniya sa paghatag sa iyang kaugalingong Anak sa pagtugyan sa iyang kinabuhi ingong halad aron kita makabaton ug higayon nga mabuhing walay kataposan.
18 Alang niadtong nakaila pag-ayo sa Diyos, ang pagkamasinugtanon dili ingong dili makapahimuot nga katungdanan. Ang tukmang pagsabot sa iyang mga katuyoan ug mga kinahanglanon, uban sa pagsinati sa maayong sangpotanan sa pagpadapat niini, wala magpaduhaduha kanila nga ang pagbuhat sa mga butang sa paagi sa Diyos mao ang bugtong makataronganon ug maalamong dalan. Ilang giila nga kini maoy panalipod. Kini usab usa ka paagi sa pagpakita sa ilang gugma sa Diyos. Sila nahimuot pag-ayo sa pagsugot kaniya.—1 Juan 5:3; Salmo 119:129.
[Mga Pangutana nga Pagatun-an]
1. Nganong gitugot ni Jehova nga laglagon sa mga taga-Babilonya ang Jerusalem?
2. (a) Sa makataronganon, unsang mga kaayohan ang nagasalig sa pagkamasinugtanon ngadto sa Diyos? (b) Sa unsang paagi ang Israel nahisulod sa relasyong may pakigtugon uban kang Jehova?
3. (a) Sa unsang mga paagi tapos niadto gipasundayag sa Israel ang espiritu sa pagkamasukolon kang Jehova? (b) Nganong ang maong mga hitabo gitala diha sa Bibliya?
4. (a) Kinsa ang mga Rechabita? (b) Unsang mga obligasyon ang gipahamtang ni Jehonadab diha kanila?
5. Sa unsang paagi ang mga Rechabita sulundan sa pagkamasinugtanon?
6. (a) Kinsa karong adlawa ang sama sa mga Rechabita? (b) Kinsa ang antitipo o katumanan sa masupilong Israel?
7. (a) Unsang makapadasig nga saad ang gihimo ni Jehova ngadto sa mga Rechabita? (b) Unsang paglaom ang ginatanyag alang sa modernong-adlawng matang nga Rechabita?
8. Nganong daghang tawo malisdan nga magmasinugtanon?
9. (a) Sa unsang paagi nahitabo nga si Naaman nakigkita kang Eliseo? (b) Unsay iyang gidahom, apan unsay nahitabo?
10. (a) Unsay sanong ni Naaman? (b) Unsa sa kataposan ang nakadasig kaniya sa pagsugot? (c) Unsa ang sangpotanan?
11. (a) Sa unsang mga paagi ang “ubang mga karnero” gihulagwayan ni Naaman? (b) Unsang hinungdanong mga pagtulon-an ang kinahanglang matun-an natong tanan?
12, 13. (a) Nganong ang pagkamasinugtanon sa mga sugo ni Jehova makaayo kanato? (b) Sa unsang paagi kini ikailustrar?
14. Sa unsang paagi kita makabatog kaayohan pinaagi sa pagpangita pag-una sa gingharian inay sa pagkalangkit sa atong kaugalingon nga dili kinahanglanon sa kalibotan?
15. (a) Aron mahiapil niadtong makabaton pag-usab sa butang giwala ni Adan, unsay kinahanglang matun-an nato sa pagbuhat? (b) Sa unsang paagi si Jehova mosulti kanato panahon sa Milenyo?
16. Nganong ang pagkamasinugtanon ngadto sa mga ansiano usa ka panalipod karon, ug sa unsang paagi kini maayong pagpangandam alang sa kinabuhi sa Bag-ong Kahikayan sa Diyos?
17. Unsay angay magdasig kanato nga magmasinugtanon?
18. Dihang atong mailhan pag-ayo ang Diyos, unsay atong pag-isip sa pagkamasinugtanon kaniya ug sa iyang organisasyon?