Kapitulo 22
Ayaw Pangandoy sa Butang Nabiyaan!
ANG pagkatuman sa tagna sa Bibliya sa walay-sipyat nagapakita nga kita karong adlawa anaa sa ganghaan mismo sa mahimayaong bag-ong sistema sa mga butang sa Diyos. Sa dili madugay mahanaw na ang daotang kalibotan, ug duyog niana ang kaguol sa kasingkasing, kapakyasan ug kasub-anan nga gipahinabo niana. Ang yuta mabalhin nga usa ka Paraiso nga niana ang mga magsisimba sa matuod nga Diyos makapahimulos sa hingpit tawhanong kinabuhi sa walay kataposan. Mahitungod sa pagkatino sa iyang mga saad mahitungod niining mga butanga, si Jehova miingon ngadto kang apostol Juan: “Isulat mo, tungod kay kining mga pulonga kasaligan ug matuod.” (Pinadayag 21:1-5) Ugaling, bisan pag daw katingad-anan, ang pipila ka tawo nga nahibalo niining mga kamatuorana mibalik ngadto sa paagi sa kinabuhi sa kalibotan nga ginaingon sa Diyos iyang pagalaglagon. Pagkamakapasubo! Nganong ilang gibuhat kana?
2 Sa dihang una nilang nadunggan ang maayong balita mahitungod sa Gingharian sa Diyos ug kon unsay buhaton niini, malipayon nilang gidawat kana. Apan hinungdanon usab ang pag-uswag ngadto sa Kristohanong kahamtong, pinaagi sa pagpalalom sa pagsabot sa usa sa Pulong sa Diyos ug pagtinguha sa mga paagi sa bug-os nga pagpadapat niini sa kaugalingong kinabuhi. (Hebreohanon 6:1, 11, 12) Kon tungod sa kakulang sa pagpabili may dili manumbaling sa pagbuhat niini, siya dili mopadayon sa pag-isip nga bililhon sa pribilehiyo sa pag-alagad sa Diyos. Ang maong tawo mahimong gilaayan sa pagpaabot sa pisikal nga mga panalangin nga gisaad sa Diyos, samtang napakyas sa pagpabili sa iyang panginahanglan sa espirituwal nga pagtubo ug sa kahinungdanon sa pagpakig-ambit sa bug-os pa kutob sa mahimo sa buluhaton sa pagwali ug paghimog tinun-an nga gihatag kanato sa Diyos nga buhaton karon. Ang pagtagbaw sa mga tinguha sa materyal nga mga kabtangan ug sa butang mopatim-awng makalingaw tingali mokuha sa dugang ug dugang niyang panahon. Iyang mabutang ang espirituwal nga intereses sa ikaduhang dapit. Dili dayon dihadiha, kondili sa inanay, siya nagabalik sa kalibotan.—1 Timoteo 6:9, 10.
3 Ang usa ka tawo tingali moingon nga buot niyang maluwas ngadto sa “bag-ong yuta,” nga mopuyo sa kalibotan diin nagapabilin ang pagkamatarong. Apan ang pagpili ba niya sa iyang mga kauban nagapaluyo sa iyang ginasulti? Siyempre, sa kada adlaw adunay dili-kalikayang pakigkita sa mga tawo nga wala mag-alagad kang Jehova—sa trabaho, sa tunghaan, sa pagpamalit, bisan sa balay. Apan panahon sa mga pahulay sa trabaho, una ug human sa pagtungha, dihang magatelepono o magaduaw sa mga higala, panahon sa lulinghayaw, kinsa ang iyang ginapili nga kauban? Mohatag ba gayod kanag kalainan? Ang Bibliya nagapasidaan: “Ayaw pagpalimbong. Ang daotang mga panagkauban makadaot sa mapuslanong mga batasan.” (1 Corinto 15:33) Apan unsa man ang “daotang mga panagkauban”? Mohatag bag kalainan nga ang pila ka tawo wala magsimba kang Jehova, nga sila nagabuhat lamang sa butang daw matarong sa ilang mga mata? Pinasukad sa ato nang nakat-onan, kita nahibalo nga kanang matanga sa mga tawo dili maluwas ngadto sa “bag-ong yuta.” Si bisan kinsa nga dili kaayo magtagad sa mga sukdanan ni Jehova dihang magapilig mga higala sa dili madugay makakaplag nga sila mahibalik sa kalibtoan nga sa ilang hunahuna sa nangagi ila nang gibiyaan. Apan ang mga pasidaang nahitala sa Kasulatan makapanalipod kanato batok nianang panggawi kon kana atong ibutang sa kasingkasing.—1 Corinto 10:11.
“GISULAT ARON SA PAGPASIDAAN KANATO”
4 Sa giluwas ni Jehova ang Israel gikan sa pagkaulipon sa Ehipto, dako gayod kadtong kahupayan alang kanila! Ang mapintas nga pagdaogdaog nga ilang naagoman sa pagkamatay ni Jose naghimo sa Ehipto nga daw mainit nga hurnohan nga niana sila gitambog. (Exodo 1:13, 14; Deuteronomio 4:20) Apan unya si Jehova nagpahinabo sa napulo ka bunal, o mga hampak sa Ehipto. Nadayag ang kalainan tali sa matuod nga Diyos ug sa mga diyosdiyos sa Ehipto. Busa, sa mibiya ang Israel sa yuta, “ang dako nagsagol nga panon” sa dili-Israelinhon mikuyog kanila, samang karong adlawa ang “dakong panon” nagabulag gikan sa kalibotan ug nakig-uban sa nahibilin sa espirituwal nga Israel. (Exodo 12:38) Apan unsay nahitabo sa kampo wala madugay tapos sa Exodo?
5 Ang Kristohanong disipulong si Esteban misaysay: “Sa ilang mga kasingkasing sila mibalik sa Ehipto.” Kadto maoy pila ra ka bulan tapos sa pagluwas kanila. (Buhat 7:39, 40) Unsay mihatag nianag ebidensiya? Ilang gibuhat ang usa ka bulawang baka—ang butang naandan nila sa Ehipto—ug gipahayag nga sila maghimo sa “usa ka pangilin alang kang Jehova.” Apan sila nagsundog sa mga Ehiptohanon. (Exodo 32:1-6) Si Jehova nasuko sa hilabihan kanila. Ang ilang panggawi maoy laktud nga pagsupak sa Kasugoan nga gihatag sa Bukid Sinai. Kaliboan ang nawad-an sa ilang kinabuhi. Nganong nahitabo kadto? Bisan tuod sila nahibalo sa mga sugo ni Jehova, dayag wala nila maugmad ang pagpabili sa kasingkasing alang niana ug sa kamatuorang ang matuod nga Diyos maoy nanguna kanila.
6 Sa mibiya sila sa Ehipto, ang Israel ug ang “nagsagol nga panon” nga mikuyog kanila nasayod nga kadto ang hustong buhaton. Apan sa paglabay sa usa ka tuig sila wala pa makaabot sa Yutang Saad; sila wala pay mga balay sa “yuta nga nagaagos ang gatas ug dugos.” Silang tanan may igong makaon sa pisikal nga paagi, ug ilabinang may espirituwal nga kadagaya. Ang haliging panganod ug kalayo mihatag ug makanunayong ebidensiya nga si Jehova maoy nanguna kanila. Sa Dagat nga Pula ug sa Bukid Sinai ilang nakita ang makalilisang nga ebidensiya sa gahom ni Jehova. Ang tugon sa Kasugoan mihatag kanilag espirituwal nga sustento ug represko. Kadto mitagana usab ug daghan nga ilang mabuhat sa personal, nga nagpakita kanila kon diin sila kinahanglang magpasibo sa ilang panggawi, ilang panghunahuna, ilang mga motibo, aron kini makapahimuot kang Jehova. Apan inay sa pagpabili sa tanang gibuhat ni Jehova alang kanila, sila misugod sa pagpangandoy sa pisikal nga mga butang ilang nabatonan sa Ehipto. Ang mahakogong pangandoy mitultol sa kalaglagan alang sa daghan.—Numeros 11:4-6, 31-34.
7 Wala madugay tapos niadto, si Moises nagpadalag mga tawo sa pagpangespiya sa Yutang Saad. Sa ilang pagbalik silang tanan miuyon nga kadto tinuod “nagaagos sa gatas ug dugos.” Apan napulo sa mga espiya nahadlok sa katawhan didto ug nahadlok sa ilang kinutaang mga siyudad. Sila wala mosalig kang Jehova sa tibuok nilang kasingkasing ug ilang gipakurog ang mga kasingkasing sa uban tungod sa kahadlok. Sa makausa pa ang ilang mga hunahuna nahibalik sa Ehipto, ug sila naghisgot sa mga plano sa pagbalik didto. Tungod sa kakulang nila sa pagtuo, kadtong enterong kaliwatan sa 20 anyos sa edad ug mas gulang pa sa kataposan nangamatay sa kamingawan, nga wala gayod makasulod sa Yutang Saad.—Numeros 13:27-33; 14:1-4, 29.
8 Kapin ug 400 ka tuig nga nangagi, kanang samang leksiyon gipasiugda sa laing kahimtang. Ang pag-umangkon ni Abraham si Lot nanimuyo sa Sodoma, usa ka siyudad nga daotan sa moral apan mauswagon sa materyal. Hilabihan ang imoralidad sa Sodoma ug sa distrito niana nga gihukom ni Jehova nga kana laglagon, nga dili na gayod matukod pag-usab. Ang mga manulonda gipadala sa pagluwas kang Lot ug sa iyang panimalay. Sa gipasidan-an ni Lot ang iyang umaabot nga mga umagad-nga-lalaki, sa ilang mga mata “siya nahisamag tawo nga nagtiawtiaw.” Apan kadto dili tiawtiaw. Sa kaadlawon ang mga manulonda nagdala sa madali kang Lot ug sa iyang pamilya sa gawas sa siyudad ug gisultihan sila sa pagkalagiw nga walay paglingi. Ang ilang kinabuhi nagdepende sa pagkamasinugtanon. Si Lot ug ang duha niya ka anak babaye mituman sa gisulti kanila ug naluwas. Apan ang asawa ni Lot lagmit nagpanuko sa pagbulag sa materyal nga mga butang nabiyaan. Sa paglingi, siya nawad-an sa iyang kinabuhi, kay nahimong haligi sa asin. Ato bang gibutang sa kasingkasing ang kahulogan niana? Aron dili nato masayloan ang punto, giapil kana ni Jesus sa pasidaan bahin sa pagkadinalian sa pagkalagiw gikan sa daang sistema sa atong adlaw. Maoy dihang nagpasidaan batok sa sobra nga kabalaka sa materyal nga mga butang nga siya pintok miingon: “Hinumdomi ninyo ang asawa ni Lot.” (Genesis 19:12-26; Lucas 17:31, 32) Unsay makapanalipod kanato batok sa mga kapeligrohang naglit-ag sa mga Israelinhon ug sa asawa ni Lot?
“PAGTINGUHA SA LABI PANG MAAYONG DAPIT”
9 Sa paglikay nga maimpluwensiyahan sa paglingi, kinahanglang atong ugmaron ang pagpauswag sa pagtuo sa butang anaa sa unahan. Ang Hebreohanon 11:1 nagahubit sa pagtuo ingong “ang tinong pagpaabot sa mga butang gilaoman, ang dayag nga pasundayag sa mga kamatuoran bisan pag wala makita.” Kini usa ka pasalig o garantiya, samag dokumento, nga atong mapanag-iya ang gisaad sa Diyos. Ang pagtuo gipasukad sa gamhanang ebidensiya, ug ingong resulta kita may lig-ong mga katarongan sa pagtuo sa butang dili makita sa pisikal nga mata. Kini dili pagkamotuo dayon, o kaandam motuo tungod lamang kay ang butang daw maayong pamation. Sa pagbatog tinuod nga pagtuo, kinahanglang kita magmatinagdanon nga igo nga masinati sa personal sa ebidensiya nga mao ang pasikaranan niana. Kinahanglan usab nga atong palandongon pag-ayo kon sa unsang paagi ang atong makat-onan malangkit sa atong kinabuhi mismo ug ugmaron ang tiunay kinasingkasing nga pagpabili niana.
10 Nabatonan ni Abraham ang maong pagtuo. Ingong sangpotanan, sa pagmando ni Jehova gibiyaan ni Abraham ang mauswagong siyudad sa Ur sa Kaldea ug mibalhin ngadto sa halayong Canaan, usa ka yuta nga wala pa gayod niya makita sukad. Didto siya nagpuyo ingong usa ka langyaw, nga wala moanib ngadto sa bisan hain sa mga siyudad-gingharian alang sa kasegurohan. “Siya nagpaabot sa siyudad nga may tinuod nga mga patukoranan [Mesiyanikong Gingharian ni Jehova], nga ang magtutukod ug magbubuhat niana nga siyudad mao ang Diyos.” Kon siya nagpadayon sa pagpangandoy sa kinabuhi sa Kaldea, pihong siya mobalik unta. Hinunoa, siya “nagtinguha sa labi pang maayong dapit, nga mao, ang iya sa langit.” (Hebreohanon 11:8-16) Kadto maoy dili lamang sa pila ka tuig, o bisan sa napulo o kawhaan ka tuig, nga nagtinguha si Abraham sa maong “labi pang maayong dapit.” Siya nagpadayon sa pagtinguha niana hangtod sa iyang kamatayon, 100 ka tuig o kapin pa tapos sa iyang pagbiya sa Ur. Siya wala yanong moingon nga siya may pagtuo; iyang gipakita kana pinaagi sa iyang mga buhat. Ingong sangpotanan segurado ang iyang ganti. Tino kaayo ang kalaoman sa pagkabanhaw alang kaniya nga, sumala sa giingon ni Jesus, ‘alang sa Diyos, si Abraham buhi.’—Lucas 20:37, 38; Santiago 2:18.
11 Apan komosta ang anak ni Abraham si Isaac, ug ang anak ni Isaac si Jacob? Sila wala gayod makatilaw sa paagi sa kinabuhi sa Kaldea. Apan wala nila isipa kadto ingong katarongan sa pagsusi kon sama kadto sa unsa. Sa dihang ilang nasayran gikan sa ilang mga ginikanan ang mga saad ni Jehova kadto ilang gibutang sa kasingkasing. Ilang giugmad ang pagtuo nga sama kang Abraham. Sila, usab, “nagtinguha sa labi pang maayong dapit.” Ang Diyos wala maulaw kanila.—Hebreohanon 11:9, 16, 20, 21; Genesis 26:24, 25; 28:20-22.
12 Sa laing bahin, ang igsoon ni Jacob si Esau wala magpabili sa espirituwal nga mga butang. Siya naminyog mga babaye nga dili magsisimba kang Jehova. Inay mahalon ang sagradong mga butang, iyang gibaligya ang iyang katungod sa pagkapanganay ilis sa usa ka pagkaon. (Genesis 25:29-34; 26:34, 35; Hebreohanon 12:14-17) Siya tawong buot sa pisikal nga katagbawan karon. Ang anak babaye ni Jacob, si Dina, nasugamak usab sa seryosong suliran. Ngano? Tungod kay gusto niyang makig-uban sa paganong “mga anak babaye sa yuta.”—Genesis 34:1, 2.
13 Kon, sama kang Abraham, Isaac ug Jacob, ikaw tinuod “nagatinguha sa labi pang maayong dapit,” alang sa kinabuhi ilalom sa Mesiyanikong Gingharian ni Jehova, ayaw itugot nga ikaw maganoy balik sa kalibotan. Hinumdomi, ang kalibotan wala magtanyag sa malungtarong kaugmaon. “Apan ang nagabuhat sa kabubut-on sa Diyos magapabilin sa walay kataposan.” Ug kana nga kinabuhi sa tugob makapatagbaw!—1 Juan 2:17.
[Mga Pangutana nga Pagatun-an]
1. (a) Unsang mga panalangin ang anaa sa unahan alang sa matinumanong mga alagad sa Diyos? (b) Apan, unsay gibuhat sa pipila ka tawo?
2. (a) Sa paglikay sa maong sangpotanan, unsay pagabuhaton sa usa ka tawo tapos unang makakat-on sa kamatuoran? (b) Kon mapakyas siya sa pagbuhat niini, unsa ang tingali naglabi sa iyang hunahuna, ug uban ang unsang sangpotanan?
3. (a) Nganong peligroso ang pagpilig mga higala sa mga tawo nga dili magsisimba ni Jehova? (b) Kanus-a ba mahimong hipalgan sa usa ka tawo nga siya relaks nga makig-uban sa maong mga tawo?
4. (a) Unsang matang sa kinabuhi ang nabatonan sa Israel sa Ehipto tapos mamatay si Jose? (b) Nganong ang “dako nagsagol nga panon” mikuyog sa Israel dihang sila giluwas gikan sa Ehipto? (c) Sa unsang paagi ang maong matagnaong drama natuman sa atong adlaw?
5. (a) Wala madugay tapos sa pagluwas kanila, sa unsang paagi sila ‘mibalik sa Ehipto’? (b) Nganong kadto nahitabo?
6. (a) Unsang mga tagana ang gihimo ni Jehova alang kanila sa kamingawan? (1 Corinto 10:3, 4) (b) Nganong ang pipila misugod sa pagpangandoy sa butang ilang nabatonan sa Ehipto?
7. (a) Dihang ang mga espiya nagdala sa ilang mga taho, nganong ang mga tawo naghisgot sa pagbalik sa Ehipto? (b) Unsa ang sangpotanan? (Hebreohanon 3:17, 19)
8. (a) Aron si Lot ug ang iyang pamilya maluwas dihang laglagon ang Sodoma, unsay kinahanglang ilang buhaton? (b) Nganong ang asawa ni Lot nahimong haligi sa asin? (c) Unsang pasidaang mensahe ang nasulod niini alang kanato?
9. Unsa ang pagtuo, ug sa unsang paagi atong maugmad kini?
10. (a) Sa unsang paagi si Abraham mihatag ug ebidensiya sa iyang pagtuo, ug sa unsang gidugayon? (b) Sa unsang paagi kita nahibalo nga ang iyang gibuhat maoy matarong?
11. Sa unsang paagi gipakita ni Isaac ug Jacob nga sila, usab, may pagtuo?
12. Unsay miagak kang Esau ug Dina ngadto sa seryosong mga suliran?
13. (a) Sama sa unsa ang kinabuhi alang sa mga tawo nga bahin sa kalibotan karong adlawa? (b) Unsay manalipod kanato batok sa pagkaganoy balik niana?