Gikan sa Among mga Magbabasa

Ang Makalilisang nga Inkwisisyon

Ingong edukador ug amahan, akong nakaplagang ang inyong mga artikulo makaiikag ug matulon-anon. Dihang nahiabot ako sa mga artikulong “Ang Makalilisang nga Inkwisisyon” ug “Sa Unsang Paagi Kadto Nahimo?” (Oktubre 22, 1986 sa Cebuano), akong gibasa uban ang linaing tuyo sa pagpangitag mga sayop ug daotang mga atake sa Iglesya Katolika (nga niana ako sakop). Wala akoy nakit-ang impormasyong misupak sa makasaysayanhong kamatuoran, ug nagpaluyo kanako akong nabatonan ang akong akademikanhong mga pagtuon sa Pontific Bolivar University of Medellín, ang Universal Encyclopaedia nga sinulat ni César Cántu, ug ang The History of the Catholic Church nga sinulat sa Lasallistang si Eugenio León.

F. J. V., Colombia

Walay Diborsiyo?

Ako dili mouyon sa inyong hunahuna nga ang Bibliya nagatugot sa inosenteng kapikas sa pagminyo pag-usab. (Hunyo 8, 1986, panid 12, potnot sa Cebuano) Si bisan kinsang mobulag sa lain angay magpabiling tagsaanon o kaha makig-uli. (1 Corinto 7:10, 11) Ang usa angay maandam mopasaylo sa kapikas.

O. A. F., Nigeria

Ang pagpasaylo angay kon ang usang nakasala tinuod maghinulsol. Bisan pa niana, sa Mateo 19:9 si Jesus miingon: “Ako magaingon kaninyo nga si bisan kinsa nga mobulag sa iyang asawa, gawas sa hinungdan sa pakighilawas, ug maminyog lain makasala sa pagpanapaw.” Kini nagapailang kon ang inosenteng kapikas makabaton sa diborsiyo pinasukad sa hinungdan sa pakighilawas, siya libreng magminyo ug lain nga dili maisip nga panapaw. Sa 1 Corinto 7, si Pablo nagatumong sa panagbulag inay sa Kasulatanhong diborsiyo.—ED.

Mga Kombensiyon sa Polandiya

Naangayan namo ang artikulo mahitungod sa Polakong mga kombensiyon, apan daw inyong gipasiugda ang daghang hugaw sa mga estadyum sa Polandiya. Kami nakakita usab sa ingon sa Tinipong Bansa, apan ang inyong artikulo mihatag sa impresyong ang maong mga kahimtang makita lamang sa Polandiya.

Usa ka Pundok sa mga Polako, Tinipong Bansa

Ang mga pahayag bahin sa kausaban sa mga kahimtang sa mga estadyum ngatanan gipahayag sa palaumagian sa balita, sa usa ka administrador sa estadyum, ug sa usa ka giya sa paglibot. Ang maong mga pahayag wala gamita sa paghatag ug hulagway sa Polandiya kondili sa pagpakita sa mas maayong kahimtang nga mahimong mahitabo sa usa ka estadyum kon ang usa ka pundok sa mga tawo magbuhat nga nagkahiusa. Kini nakita sa mga kombensiyon sa mga Saksi ni Jehova sa tibuok kalibotan.—ED.

Hockey ug Imoralidad

Tungod lang kay si Tom Edur mibiya sa hockey tungod sa mga Saksi ni Jehova wala magpasabot nga kinahanglang inyong daoton ang tibuok nga dula. Ang tanang hockey wala mapuno sa hinobrang pag-inom ug panapaw, ug kini tinong labaw pang nahigawas sa droga kay sa ubang dula.

N. L., Tinipong Bansa

Si Tom Edur wala magdaot sa hockey ingong usa ka dula, nga miingon pa gani: “Ako nagkalipay gayod sa pagdula ug nagadula gihapon panagsa alang sa kalingawan.” Apan iya gayong nadiskobrehang daghang propesyonal nga magdudula, diha sa silinganan nga niana sila naladlad, nag-inom nga hinobra ug nagbuhat sa panapaw, ug siya inanay naimpluwensiyahan nianang tanan. Ang mga batan-on karong adlawa nagaisip sa mga bituon sa dula ingong ilang mga bayani, ug makapasubo gayod nga ang nagkadaghan sa maong mga bituon maoy daotang mga panig-ingnan kon bahin sa paggamit sa tabako, hinobrang pag-inom ug alkoholikong ilimnon, pag-abusar sa mga droga, ug imoral nga panggawi. Bisan pag ang kahimtang sa kalibotan sa mga dula sama ra diha sa ubang bahin sa katilingban, ang panig-ingnan sa mga bituon sa dula mao ang dunay dakong epekto diha sa mga batan-on. Among gilaoman ang pagpasidaan sa mga batan-on ug sa uban sa moral nga mga kapeligrohan nga nalangkit sa pagtinguha sa karera diha sa propesyonal nga mga dula.—ED.