Pagmata!—Usa Ka Magasin nga Naghisgot sa Lainlaing Interes sa Publiko
Kining magasina sa sinugdan nagdala sa titulong The Golden Age. Ang unang isyu pinetsahag Oktubre 1, 1919. Kini maoy usa ka magasin nga nagataho sa daghang natad sa tawhanong panlimbasog. Kini nagapukaw sa mga tawo sa panghitabo sa kalibotan ug nagpakita kanila nga ang tinuod nga sulbad sa suliran sa katawhan mao ang Milenyal nga Pagmando ni Kristo, nga sa pagkatinuod magapasulod sa usa ka “bulawanong kapanahonan” alang sa katawhan. Ang desinyo sa hapin sa magasin nakaagig mga kausaban, apan ang mensahe nagpabilin. Ang The Golden Age gidesinyo aron iapod-apod sa publiko, ug sa daghang tuig ang sirkulasyon niana mas daghan kay sa The Watch Tower.
Sugod sa isyu sa Oktubre 6, 1937, ang titulo giusab ngadto sa Consolation. Kini haom kaayo tungod sa pangdaogdaog nga nasinati sa daghan ug sa kasamok nga niana ang kalibotan nalangkit niadtong Gubat sa Kalibotan II. Hinuon, ang kahupayan nga gitanyag sa magasin maoy usa ka butang nga nakadani lamang niadtong may tinuod nga gugma alang sa kamatuoran.
Sa isyu sa Agosto 22, 1946, ang titulong Pagmata! gisagop. Ang pasiugda gibutang sa pagpukaw sa mga tawo ngadto sa kahinungdanon sa mga panghitabo sa kalibotan. Ang magasin migamit sa naandang mga tinubdan sa balita, apan kana may kaugalingon usab nga mga koresponsal sa tibuok kalibotan. Ang balanse, praktikal halalom nga mga artikulo sa Pagmata! nga nagahisgot sa daghan kaayong mga ulohan nagdasig sa mga magbabasa sa pagtagad sa labing importanteng mensahe niining magasina, sa ato pa, nga ang mga panghitabo sa kalibotan nagatuman sa tagna sa Bibliya, nga nagpakitang kita nagkinabuhi na sa kataposang mga adlaw ug sa dili madugay ang Gingharian sa Diyos magadala sa walay kataposang mga kaayohan alang niadtong nakakat-on sa pagbuhat sa kabubut-on sa Diyos. Kining magasina usa ka epektibong instrumento sa tibuok-yutang pagmantala sa maayong balita sa Gingharian sa Diyos ug usa ka tulay ngadto sa mas halalom nga materyal sa pagtuon ingon sa gihan-ay diha sa Ang Bantayanang Torre ug sa hinapinang mga libro.
Sayo sa 1993, ang Pagmata! giimprinta sa 67 ka pinulongan, 13,240,000 ka kopya kada isyu.