Dugang Pagpasiugda sa Bibliya!
1. Sa sinugdan, para kang kinsa gipatik Ang Bantayanang Torre, ug para kang kinsa ang The Golden Age?
1 Sa Oktubre 1, 1919, gipatik ang unang gula sa magasing The Golden Age. Kini nahimong hinungdanon kaayong galamiton sa buluhatong pagsangyaw. Ngano? Tungod kay kini gidisenyo ilabina alang sa publiko. Dili ingon niana Ang Bantayanang Torre, nga sulod sa daghang katuigan giisip ingong magasin nga sa katibuk-an alang sa “gamayng panon.” (Lucas 12:32) Ang mga magmamantala sa Gingharian madasigon kaayong midawat sa bag-ong publikasyon nga sulod sa daghang katuigan ang naapod-apod nga kopya sa The Golden Age mas daghan pa kay sa naapod-apod nga Ang Bantayanang Torre.
2. Unsay ngalan sa The Golden Age karon, ug unsay katuyoan niini sukad sa sinugdan?
2 Ang magasin nga The Golden Age gipatik aron ipakita sa katawhan nga ang tinuod nga kasulbaran sa mga problema sa katawhan mao ang Milenyal nga Pagmando ni Kristo, nga tinuod nga magpahinabo ug bulawanong yugto alang sa katawhan. Sa misunod nga katuigan daghang kausaban ang gihimo diha sa The Golden Age aron sa pagtagbaw sa lainlaing mga panginahanglan sa mga tawo. Sa 1937, ang ngalan niini giilisan ug Consolation. Sa 1946 kini nahimong Pagmata!, ang ngalan nga atong nailhan karon.
3. Ang Pagmata! nahimong gamhanang galamiton sa katumanan sa unsang tagna?
3 Sukad sa unang pagpatik niini, kining magasina nakatabang gayod sa dakong pagpamatuod nga ginahimo sukad sa 1919. (Mat. 24:14) Apan, tungod sa pagkadinalian sa atong panahon, morag maalamon nga mohimog dugang kausaban sa Pagmata!
4. (a) Unsay kinahanglang buhaton sa usa ka tawo aron matagoan siya sa “adlaw sa kasuko ni Jehova”? (b) Sumala sa Pinadayag 14:6, 7, unsay giawhag sa “manulonda nga naglupad sa kinatung-an sa langit” nga buhaton sa tanan?
4 Milyonmilyong tawo ang ganahang mobasa sa Pagmata! tungod kay naghisgot kini ug nagkadaiyang sekular nga mga topiko sa makapadani nga paagi. Sa walay duhaduha ang kadaghanan niadtong tigtambongan sa Memoryal kada tuig maoy mga tigbasa sa Pagmata! Bisan pa niana, kon ang usa naglaom nga tagoan sa “adlaw sa kasuko ni Jehova,” nagkinahanglan siyag tabang sa paghimog dugang pa kay sa pagkahimo lamang nga tigbasa sa atong mga publikasyon.—Sof. 2:3; Pin. 14:6, 7.
5. (a) Sugod sa Enero 2006 nga Pagmata!, unsay labawng ipasiugda? (b) Lagmit mapalihok ang daghan sa pagbuhat sa unsa, ug agig katumanan sa unsang tagna?
5 Busa, sugod sa Enero 2006, ang Pagmata! labaw nga magpasiugda sa Gingharian sa Diyos. Kini mas prangkang magdasig sa mga magbabasa sa pagdangop sa Bibliya alang sa kasulbaran sa ilang mga problema ug labawng magpasiugda sa katin-awan sa Bibliya labot sa mga panghitabo karon. Niining paagiha, ang mga magbabasa mas makasabot sa kahulogan sa mga panghitabo karon ug tingali mapalihok sa ilang mabasa sa pagkat-on ug dugang bahin kang Jehova.—Zac. 8:23.
6, 7. (a) Sa unsang paagi hikayon ang Pagmata! sa paagi nga daghan ang magpadapat sa 1 Tesalonica 2:13? (b) Unsa ka subsob nga patikon ang Pagmata!, ug pila ka pinulongan ang maapektohan sa maong kausaban?
6 Ang Pagmata! magpadayon sa paghisgot ug mga topiko nga makapainteres sa tanan. Apan, labawng ipasiugda ang Bibliya. (1 Tes. 2:13) Tungod kay Ang Bantayanang Torre naundan ug laglom nga impormasyon bahin sa Bibliya ug ang Pagmata! maghisgot ug dugang materyal nga pinasukad sa Bibliya, morag dili na kinahanglanon ang pagpadayon sa pagpatik sa Pagmata! ug kaduha sa usa ka bulan. Busa, sugod sa Enero 2006 nga gula, ang Pagmata! patikon ingong binulan nga magasin. Tungod niini mapayano gayod ang preparasyon, paghubad, ug pagpadala sa atong literatura.
7 Kining maong kausaban mag-apektar sa mga 40 porsiyento sa mga pinulongan nga niana gipatik ang Pagmata! Sa kadaghanang pinulongan, ang Pagmata! gipatik na nga binulan o kas-a sa tulo ka bulan. Walay kausaban sa pagpatik sa Ang Bantayanang Torre.
8. Sa unsang paagi mahimong gamiton sa mga magmamantala ang Pagmata! duyog sa Ang Bantayanang Torre?
8 Mahimong itanyag sa mga magmamantala ang gula sa Pagmata! matag bulan uban sa bisan hain sa duha ka gula sa Ang Bantayanang Torre nianang bulana. Kadtong motanyag sa Pagmata! makagamit sa mao gihapong gula sa tibuok bulan nga dili na kinahanglang usbon ang ilang presentasyon sa tungatunga sa bulan, sama sa ginahimo karon.
9. Unsa gihapoy papel sa Pagmata!
9 Sukad sa unang gula niini niadtong 1919, ang magasin nga nailhan ingong The Golden Age, Consolation, ug karon Pagmata! adunay hinungdanong papel diha sa buluhatong pagsangyaw. Atong iampo nga padayon untang panalanginan ni Jehova ang pagpang-apod-apod sa magasin sa rebisadong disenyo niini ug nga kini makatabang sa mas daghan pang tawo gikan sa “tanang kanasoran ug mga tribo ug katawhan ug mga pinulongan” nga modangop sa Gingharian sa Diyos ingong ilang bugtong paglaom.—Pin. 7:9.