Kingdom News Num. 34

Nganong Puno Kaayog Suliran ang Kinabuhi?

Posible ba ang walay-suliran nga paraiso?

NAGAKASAMOT ANG SERYOSONG MGA SULIRAN—NGANO?

Ang mga tawo kanunayng dunay suliran. Bisan tuod daghan ang nagtuo nga masulbad kini sa modernong teknolohiya, ang seryosong mga suliran nagakasamot.

Krimen: Dili daghan ang mibating luwas nga maglakaw diha sa kadalanan o bisan gani maglingkod sulod sa ilang kaugalingong mga balay. Sa usa ka Uropanhong nasod, hapit 1 ka tawo sa matag 3 maoy biktima sa krimen niining bag-ohay pang tuig.

Kalikopan: Labi ug labi pang nagakaylap ang hugaw sa hangin, yuta, ug tubig. Sa nagakaugmad nga mga nasod, unkuwarto sa mga tawo ang walay mabatonang hinlo nga tubig.

Kawalad-on: Dunay mas daghang kabos ug gigutom nga mga tawo kay sukad masukad. Kapin sa 90 porsiento sa mga tawo sa pipila ka nasod ang nagkinabuhi sa kawalad-on; 30 porsiento sa mamumuo sa kalibotan, mga 800 ka milyon, walay trabaho o walay igong trabaho—ug ang gidaghanon nagatubo.

Gutom: Bisan pag ikaw mismo dunay igong makaon, ang nagakadaghang minilyon wala. Sa mga nasod nga dili-ugmad, matag tuig labing menos 13 ka milyong tawo, kadaghanan mga bata, ang mamatay gumikan sa mga epekto sa gutom.

Gubat: Gatosan ka libo ang namatay niining bag-o pang etnikong kapintasan. Ug sa ika-20ng siglo, ang mga gubat nakakalas sa kinabuhi sa kapin sa usa ka gatos ka milyong tawo.

Ubang mga Suliran: Sa mga gihisgotan sa itaas, idugang ang nagakagrabeng pagkahugno sa pamilya, daghang pinaangkan, nagakadaghang walay puloy-anan, kaylap nga pag-abuso sa droga, nagadagsang nga imoralidad. Sa tukma, usa ka kanhing membro sa gabinete sa T.B. nag-ingon: “Adunay daghan ra kaayong mga ilhanan . . . nga ang buhilaman nagakadunot.” Sa ulahing 30-ka-tuig nga yugto, ang populasyon sa T.B. mitubo ug 41 porsiento, apan ang mapintas nga krimen misulbong ug 560 porsiento, ang mga anak sa gawas 400 porsiento, ang mga diborsiyo 300 porsiento, ang gidaghanon sa pagtubok sa mga tin-edyer kapin sa 200 porsiento. Ang kahimtang maoy susama sa ubang mga nasod.

Nganong Misamot ang mga Suliran?

Ang atong Maglalalang nagtaganag tubag. Ang Iyang Pulong nagtawag niining punog-sulirang mga panahon ug “ang kataposang mga adlaw,” usa ka yugto sa dihang moabot ang “makuyaw nga mga panahong lisod sagubangon.” (2 Timoteo 3:1) Ang kataposang mga adlaw sa unsa? Aw, ang Bibliya nagahisgot bahin sa “kataposan sa kalibotan.”—Mateo 24:3, King James Version.

Ang nagatubong mga suliran karong adlawa maoy tin-aw nga pamatuod nga ang kataposan niining sistema sa mga butang haduol na, lakip na ang kataposan sa pagkadaotan ug niadtong nagapahinabo niana. (Mateo 24:3-14; 2 Timoteo 3:1-5; Pinadayag 12:7-12) Sa dili madugay motabang ang Diyos ug iyang tinoon nga kining tanang suliran karon masulbad sa hingpit.—Jeremias 25:31-33; Pinadayag 19:11-21.

MGA RELIHIYON NIINING KALIBOTANA NAPAKYAS

Inay motabang sa pagsulbad sa mga suliran karong adlawa, ang relihiyosong mga sistema niining kalibotana nagdugang pa niini. Panahon sa mga gubat, ang mga Katoliko nagpatay ug mga Katoliko, mga Protestante nagpatay ug mga ProtestanteC—sa minilyon. Sa dili pa dugay sa Rwanda, diin kadaghanan maoy mga Katoliko, ang mga tawo nagpinatyanay sa usag usa sa taggatosan ka linibo! (Tan-awa ang letrato sa wala.)

Si Jesus ba moadto sa gubat nga magbitbit ug pusil o pulang ug pamatyon ang iyang mga tinun-an tungod kay ang ilang nasyonalidad lahi kay sa iyaha? Dili gayod! “Ang usa kinsa nahigugma sa Diyos,” ang Bibliya nagaingon, “kinahanglan usab magahigugma sa iyang igsoon.” (1 Juan 4:20, 21) Ang mga relihiyon niining kalibotana napakyas sa paghimo niana. “Sila nagpahayag sa dayag nga sila nakaila sa Diyos, apan sila wala-magaangkon kaniya pinaagi sa ilang mga buhat.”—Tito 1:16.

Dugang pa, pinaagi sa dili gayod pagsunod sa mga sukdanan sa moralidad sa Bibliya, ang mga relihiyon sa kalibotan nakaamot sa makapakugang nga pagkahugno sa moral sa tibuok yuta.

Si Jesus nag-ingon nga imong mailhan ang bakak nga relihiyon gikan sa tinuod nga relihiyon ‘pinaagi sa mga bunga niini’—pinaagi sa ginahimo sa mga sakop niini. Siya usab nag-ingon: “Ang matag kahoy nga wala magapatunghag maayong bunga ginaputol ug ginasalibay ngadto sa kalayo.” (Mateo 7:15-20) Ang Pulong sa Diyos nagaawhag kanato sa pagkalagiw gikan sa relihiyon nga nagapamungag daotang bunga ug busa nagaatubang sa kalaglagan.—Pinadayag 18:4.

Matuod nga Relihiyon Wala Mapakyas

Ang matuod nga relihiyon “nagapamungag maayong bunga,” ilabina ang gugma. (Mateo 7:17; Juan 13:34, 35) Unsang nahiusang internasyonal nga panag-igsoonay sa mga Kristohanon ang nagatuman sa maong gugma? Kinsay midumili sa pagpatay niadtong sakop sa ilang kaugalingong relihiyon o kang bisan kinsa?—1 Juan 3:10-12.

Ang mga Saksi ni Jehova ilado nga nagapamunga nianang “maayong bunga.” Sa tibuok kalibotan, diha sa kapin sa 230 ka kayutaan, ‘ilang gisalsal ang ilang mga espada ug gihimong mga lipya sa daro.’ (Isaias 2:4) Ang ilang gugma alang sa katawhan gipakita usab pinaagi sa ilang pagsugot sa sugo ni Kristo nga iwali ang “maayong balita” sa Gingharian sa Diyos sa tibuok kalibotan. (Mateo 24:14) Gituman usab nila ug gituboy ang hataas nga sukdanan sa moral nga gitudlo sa Bibliya.—1 Corinto 6:9-11.

Ang matuod nga relihiyon wala mapakyas. Kini nagapunting sa mga tawo ngadto sa Usa lamang nga dunay katakos sa pagsulbad sa mga suliran sa katawhan. Sa dili madugay kining maong Usa magapatungha sa usa ka bug-os bag-ong kalibotan. Kinsa kanang maong Usa? (Palihog tan-awa ang panid sa likod.)

USA KA WALAY-SULIRANG PARAISO SEGURADO

Kon mahimo nimo, dili ba nimo sulbaron ang tanang suliran nga naghampak sa katawhan? Natural nga imo kanang himoon! Angay ba kitang maghunahuna nga ang atong mahigugmaong Maglalalang, nga mao lamang ang adunay gahom ug kaalam sa pagsulbad sa mga suliran sa katawhan, dili mohimo sa ingon?

Gipadayag sa Bibliya nga ang Diyos mobalda sa tawhanong mga kalihokan pinaagi sa iyang langitnong kagamhanan diha sa mga kamot ni Jesu-Kristo. Kini “magadugmok” sa dunot nga mga kagamhanan sa yuta. (Daniel 2:44; Mateo 6:9, 10) Ug ngano? Nga nagasulti ngadto sa Diyos, ang salmista mitubag: “Aron ang mga tawo makaila nga ikaw, kansang ngalan mao si Jehova, ikaw lamang ang Hataas Uyamot ibabaw sa tibuok yuta.”—Salmo 83:18.

Sa dihang matapos kining maong kalibotan, duna bay mga makalabang buhi? “Ang kalibotan nagataliwan,” matud sa Bibliya, “apan siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:17) Asa man mopuyo hangtod sa hangtod kining maong mga makalabang buhi? “Ang mga matarong mismo magapanag-iya sa yuta, ug sila magapuyo sa ibabaw niini sa walay kataposan,” tubag sa Bibliya.—Salmo 37:9-11, 29; Proverbio 2:21, 22.

Sa bag-ong kalibotan sa Diyos, “wala na unyay kamatayon, ni pagbangutan ni pagtiyabaw ni may kasakit pa.” (Pinadayag 21:4) Wala nay krimen, kawalad-on, gutom, sakit, kasub-anan, o kamatayon! Aw, bisan ang mga patay mabuhi pag-usab! “Aduna unyay pagkabanhaw.” (Buhat 24:15) Ug ang yuta mismo mausab ngadto sa usa ka literal nga paraiso.—Isaias 35:1, 2; Lucas 23:43.

Unsay angay natong buhaton aron makatagamtam sa kinabuhi sa bag-ong kalibotan sa Diyos? Si Jesus miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Minilyong tawo nga matinud-anon ug kasingkasing sa tibuok kalibotan ang nagakuha nianang maong kahibalo. Kini nakapaarang kanila sa pagsagubang sa daghan nilang personal nga mga suliran karon, apan labing hinungdanon, kini naghatag kanila ug bug-os nga pagsalig nga ang mga sulirang saylo na sa ilang katakos sa pagsulbad maoy sa hingpit pagasulbaron sa bag-ong kalibotan sa Diyos.

[Picture Credit Line sa panid 2]

Letrato sa WHO ni P. Almasy

[Picture Credit Line sa panid 3]

Jerden Bouman/Sipa Press