Ang mga Higala sa Diyos Magpuyo sa Paraiso

Ang Paraiso dili mahisama sa kalibotan nga atong gipuy-an karon. Dili gayod buot sa Diyos nga ang yuta mapuno sa kasamok ug kasubo, kasakit ug pag-antos. Sa umaabot, himoon sa Diyos ang yuta nga usa ka paraiso. Mahisama unya sa unsa ang Paraiso? Atong susihon kon unsay giingon sa Bibliya:

Maayong mga tawo. Ang paraiso mahimong pinuy-anan sa mga higala sa Diyos. Ilang buhaton ang maayong mga butang alang sa usag usa. Magkinabuhi sila sumala sa matarong nga mga paagi sa Diyos.​—Proverbio 2:21.

Dagayang pagkaon. Sa Paraiso, wala na unyay gutom. Ang Bibliya nag-ingon: “Dagaya na unya ang mga lugas [o, pagkaon] sa yuta.”​—Salmo 72:16.

Nindot nga mga balay ug makapahimuot nga trabaho. Sa Paraisong yuta, ang matag pamilya makabatog kaugalingong puy-anan. Ang matag usa mohimog buluhaton nga maghatag ug tinuod nga kalipay.​—Isaias 65:21-23.

Tibuok-kalibotang pakigdait. Dili na mag-awayay ug mangamatay sa gubat ang mga tawo. Ang Pulong sa Diyos nag-ingon: “Pahunongon [sa Diyos] ang mga gubat.”​—Salmo 46:8, 9.

Maayong panglawas. Ang Bibliya nagsaad: “Walay pumoluyo [sa Paraiso] nga moingon: ‘Ako masakiton.’” (Isaias 33:24) Wala na usab unyay bakol o buta o bungol o amang.​—Isaias 35:5, 6.

Kataposan sa kasakit, kasubo, ug kamatayon. Ang Pulong sa Diyos nag-ingon: ‘Wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang nangagi na.’​—Pinadayag 21:4.

Mahanaw na ang daotang mga tawo. Si Jehova nagsaad: “Ang mga daotan . . . pagaputlon gikan sa yuta; ug kon bahin sa mga maluibon, sila pagalukahon gikan niini.”​—Proverbio 2:22.

Ang mga tawo mahigugma ug motahod sa usag usa. Wala na unyay inhustisya, pagpanglupig, kahakog, ug pagdumot. Ang mga tawo mahiusa ug magkinabuhi uyon sa matarong nga mga dalan sa Diyos.​—Isaias 26:9.