Usa ka Mas Maayong Kinabuhi Gisaad
BUOT ba nimong mahigawas sa mga suliran nga nagpalisod sa kinabuhi? Buot ba nimong mabuhi diha sa usa ka kalibotan diin ang kinabuhi ingon ka makalilipay sa gihulagway sa talan-awon diha sa mga hapin sa atubangan ug likod niining magasina? Tan-awag maayo kanang hulagwaya. Daghan kaayog pagkaon ang mga tawo. Sila matagbaw gayod nianang lamiang pagkaon. Ang tanan malipayon. Ang mga tawo sa nagkalainlaing rasa makigdaiton sa usag usa. Bisan ang mga hayop makigdaiton! Walay nag-away. Walay kabos. Walay masakiton. Anaa ang maanindot nga mga palibot, matahom nga mga punoan sa kahoy, ug tin-aw, hinlo nga tubig. Pagkamaayong kahimtang!
Maingon ba gayod niana kining yutaa? Oo, kini mahimong usa ka paraiso. (Lucas 23:43) Maoy katuyoan sa Diyos, nga naglalang sa yuta, nga tagamtamon sa mga tawo ang mas maayong kinabuhi diha sa usa ka paraisong yuta. Ug ikaw mahimong maatua didto!
Unsang Kinabuhi ang Imong Gusto?
Sa unsang paagi ang umaabot nga Paraisong yuta mahimong lahi gikan sa kalibotan nga atong ginapuy-an karon? Sa pagkakaron, kapin sa usa ka bilyong tawo ang gigutom kada adlaw. Apan diha sa Paraiso nga gimbut-an sa Diyos alang sa yuta, ang tanan adunay daghang makaon. Ang Bibliya nagasaad: “Si Jehova sa mga panon maghimo gayod alang sa tanang katawhan . . . ug kombira sa matambok nga mga pagkaon, usa ka kombira sa mga bino nga pinalugdang.” (Isaias 25:6) Wala unyay kanihit sa pagkaon, kay ang Bibliya nag-ingon: “Aduna unyay daghang lugas sa yuta; sa ibabaw sa kabukiran aduna unyay pag-awas.”—Salmo 72:16.
Karong adlawa, daghan ang nagpuyo diha sa mga barongbarong ug mga iskuwater, o nangamas silag maayo sa pagbayad sa ilang abang. Ang uban walay mga balay ug nangatulog diha sa dalan. Sumala sa World Health Organization, ingon ka daghan sa 100 ka milyong kabataan sa kalibotan ang walay mga pinuy-anan. Apan sa umaabot nga Paraiso, ang tanan adunay balay nga iyang matawag nga iyang kaugalingon. Ang Pulong sa Diyos nag-ingon: “Sila magatukod ug mga balay ug magapuyo niana; ug sila magatanom ug kaparasan ug magakaon sa ilang bunga.”—Isaias 65:21.
Daghan ang naghago sa mga trabaho nga dili nila gusto. Sagad sila naghago sa pagtrabaho sa daghang oras apan gamay rag kita. Halos 1 sa matag 5 ka tawo sa kalibotan ang nagkinabuhi sa kita nga menos sa $500 sa usa ka tuig. Apan, sa umaabot nga Paraiso ang mga tawo malipay sa ilang trabaho ug makakitag maayong mga resulta gikan niana. Ang Diyos nagsaad: “Ang akong mga pinili magapahimulos pag-ayo sa buhat sa ilang mga kamot. Sila dili magahago sa walay kapuslanan.”—Isaias 65:22, 23.
Karon ang sakit ug balatian anaa bisan asa. Daghan ang mga buta. Ang uban bungol. Ang uban dili makalakaw. Apan sa Paraiso, ang mga tawo walay sakit ug balatian. Si Jehova nag-ingon: “Walay molupyo ang magaingon: ‘Ako masakiton.’” (Isaias 33:24) Alang niadtong baldado na, ang makapalipay nga saad mao: “Nianang panahona ang mga mata sa mga buta mangabuka, ug ang mga igdulungog mismo sa mga bungol makadungog. Nianang panahona ang bakol motungas sama sa usa ka lagsaw [laking osa], ug ang dila sa amang mosinggit sa kalipay.”—Isaias 35:5, 6.
Sa pagkakaron, adunay pag-antos ug kasakit, kasubo ug kamatayon. Apan sa Paraisong yuta, kining tanang mga butanga dili maglungtad. Oo, bisan ang kamatayon mahanaw! Ang Bibliya nag-ingon: “Ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:3, 4.
Nan, tin-aw nga ang gisaad ni Jehova nga yutan-ong Paraiso magkahulogan ug usa ka mas maayong kinabuhi alang sa katawhan. Apan sa unsang paagi kita makaseguro nga kini moabot? Kanus-a kini moabot, ug sa unsang paagi? Unsay kinahanglan nimong buhaton aron maatua didto?