Kingdom News Num. 36

Ang Bag-ong Milenyo—Unsay Anaa sa Umaabot Alang Kanimo?

Ang Bag-ong Milenyo—Sinugdanan sa Usa ka Bag-ong Panahon?

SA TUNGANG gabii sa Disyembre 31, 1999, ang ika-20ng siglo natapos.a Kadto maoy usa ka siglo nga nakasinati ug daghang kaguliyang. Apan nakasinati usab kini sa pagsugod sa bag-ong mga teknolohiya, dagkong medikal nga mga kauswagan, pagkaylap sa impormasyon, ug kusog nga pag-uswag sa tibuok-kalibotang ekonomiya. Busa ang bag-ong milenyo gidawat sa daghan ingong simbolo sa paglaom ug kausaban. Masinati na kaha niini ang kataposan sa gubat, kakabos, polusyon sa kalikopan, ug sakit?

Daghan ang naglaom sa ingon. Apan unsay purohan nga ang bag-ong milenyo magpatunghag mga kausaban nga makabenepisyo kanimo—mga kausaban nga maghimo sa kinabuhi nga hilwas ug layo sa peligro alang kanimo ug sa imong pamilya? Tagda ang kadako sa gilapdon sa pipila lamang sa mga suliran nga atong ginaatubang.

Polusyon

Ang industriyalisadong kayutaan “nagpahinabog kadaot sa kalikopan sa tibuok-kalibotang sukod ug kaylap nga polusyon ug pagkadaot sa mga ekosistema.” Kon magpadayon ang presenteng kiling, “ang kinaiyanhong kalikopan mag-anam ka daot.”—“Global Environment Outlook—2000,” United Nations Environment Programme.

Sakit

“Sa tuig 2020, ang dili-makatakod nga mga sakit gidahom nga maoy mahimong hinungdan sa pito sa matag napulo ka kamatayon diha sa nagakaugmad nga mga rehiyon, kon itandi sa wala pay katunga karon.”—“The Glob­al Burden of Disease,” Harvard University Press, 1996.

Giangkon sa pipila ka eksperto nga “sa tuig 2010, mas ubos pa sa 66 ka milyong tawo [ang mabuhi] diha sa 23 ka nasod nga adunay kinagrabehang mga epidemya [sa AIDS].”—“Confronting AIDS: Evidence From the De­ve­lop­ing World,” taho sa European Commission ug sa World Bank.

Kakabos

“Duolan sa 1.3 bilyones ka tawo ang nabuhi ug ubos sa usa ka dolyar sa usa ka adlaw, ug halos 1 ka bilyon ang dili makabaton sa ilang pangunang mga panginahanglan sa pagkaon.”—“Human Development Report 1999,” United Nations Development Programme.

Gubat

“Ang kapintasan diha sa [nagkalainlaing kayutaan] mahimong moabot sa wala-hitupnging mga sukod. Kay mitungha tungod sa etniko, tribonhon, ug relihiyosong [mga pagkabahinbahin], . . . ang maong kapintasan magpahinabo . . . sa labing komon nga matang sa panagbangi sa mosunod nga ikaupat ka bahin sa siglo . . . , nga magpatay sa ginatos ka libong katawhan matag tuig.”—“New World Coming: American Security in the 21st Century,” U.S. Commission on National Security/21st Century.

Busa ang kasadya ug kahinam tungod sa bag-ong milenyo nagtaptap sa kamatuoran nga ang polusyon, sakit, kakabos, ug gubat mas tataw pa kay sukad masukad. Ang gamot niining mga sulirana mao ang kadalo, pagkawalay-pagsalig, ug kahakog—mga taras nga dili mahanaw pinaagi lamang sa siyentipikanhong panukiduki, teknolohiya, o politika.

Ang Milenyo nga Magpanalangin sa Katawhan

USA ka karaang magsusulat kas-a miingon: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang tawo nakulangan dili lamang sa katakos kondili sa katungod usab nga momando sa yuta. Ang atong Magbubuhat, si Jehova nga Diyos, mao lamang ang adunay katungod ug kahibalo sa pagsulbad sa mga suliran sa katawhan.—Roma 11:33-36; Pinadayag 4:11.

Apan kanus-a? Sa unsang paagi? Daghan kaayo ang ebidensiya nga kita duol na sa kataposan sa “kataposang mga adlaw.” Buksi ang imong Bibliya, palihog, ug basaha ang 2 Timoteo 3:1-5. Kini tin-awng naghubit sa mga taras nga ipasundayag sa mga tawo niining “makuyaw nga mga panahon.” Ang Mateo 24:3-14 ug Lucas 21:10, 11 naghubit usab sa “kataposang mga adlaw.” Dinha gisentro ang pagtagad sa makitang mga hitabo nga nahitabo sukad sa 1914, sama sa tibuok-kalibotang gubat, mga kamatay, ug kaylap nga mga kanihit sa pagkaon.

Sa dili madugay ang “kataposang mga adlaw” matapos. Matod sa Daniel 2:44: “Ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magatapos niining tanang [yutan-ong] gingharian, ug kini mobarog hangtod sa panahong walay tino.” Busa gitagna nga ang Diyos magtukod ug usa ka Gingharian, o kagamhanan, nga magmando sa yuta. Sumala sa Pinadayag 20:4, kini nga kagamhanan magmando sulod sa usa ka libo tuig—usa ka milenyo! Matikdi ang pipila lamang sa mga paagi nga ang mga kahimtang sa kinabuhi mouswag alang sa tanang tawo sulod niining mahimayaong Milenyo:

Ekonomiya. “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon.”—Isaias 65:21, 22.

Kahimsog. “Nianang panahona ang mga mata sa mga buta mangabuka, ug ang igdulungog sa mga ­bungol mabuksan. Nianang panahona ang piang ­mokatkat ingon sa laking osa, ug ang dila sa amang ­mosinggit sa kasadya.” “Ug walay pumoluyo nga moingon: ‘Ako masakiton.’”—Isaias 33:24; 35:5, 6.

Kalikopan. Ang Diyos ‘magalaglag niadtong nagalaglag sa yuta.’—Pinadayag 11:18.

Tawhanong Relasyon. “Sila dili mohimo ug bisan unsang kadaot o mopahinabog bisan unsang kagun-oban sa tibuok nakong bukid nga balaan; kay ang yuta mapuno gayod sa kahibalo kang Jehova.”—Isaias 11:9.

Milyonmilyon ang mituo niining mga saara sa Bibliya ug busa nakabatog masanagon, masaligong panglantaw sa umaabot. Ingong sangpotanan, mas dali silang makasagubang sa mga kapit-os ug mga suliran sa kinabuhi. Sa unsang paagi ang Bibliya mahimong usa ka nagagiyang puwersa sa imong kinabuhi?

Kahibalo nga Motultol sa Kinabuhi!

ANG siyensiya ug teknolohiya usahay makapahingangha! Sa gihapon, ang kahibalo sa tawo wala makahimo sa kinabuhi nga layo sa peligro ug malipayon alang sa kadaghanang tawo. Ang bugtong kahibalo nga makapalampos niini gihubit diha sa Bibliya sa Juan 17:3, nga nag-ingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”

Ang maong kahibalo makaplagan diha sa mga panid sa Bibliya. Bisan ug daghan ang mipahayag ug kusganong pagsupak bahin nianang sagradong basahon, pipila ra gayod ang nakasusi mismo niana. Komosta sa imong bahin? Itugot nato, ang pagbasa sa Bibliya nagkinahanglag dakong paningkamot. Apan kini takos niana. Ang Bibliya mao lamang ang basahon nga “inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong.”—2 Timoteo 3:16.

Nan, sa unsang paagi masugdan nimo ang pagbaton ug kahibalo bahin sa Bibliya? Nganong dili dawaton ang tabang sa mga Saksi ni Jehova? Sila nagtaganag instruksiyon ngadto sa milyonmilyong tawo diha sa ilang mga balay, nga walay bayad. Aron matabangan ka niining bahina, ilang gigamit ang nagkalainlaing pinasukad-sa-Bibliyang mga publikasyon, sama sa brosyur nga Unsay Gikinahanglan sa Diyos Kanato? Naghatag kinig laktod nga mga tubag sa daghang pangutana nga tingali imong gisukna bahin sa Bibliya, sama sa: Kinsa ang Diyos? Unsay katuyoan sa Diyos alang sa yuta? Unsa ang Gingharian sa Diyos? Sa unsang paagi mapaarang-arang sa Bibliya ang imong pamilyahanong kinabuhi?

Kon gusto nimo nga usa sa mga Saksi ni Jehova ang moduaw sa imong balay, palihog pil-api ang kupon sa ubos. Malipay sila nga mohatag nimo ug dugang impormasyon bahin sa mahimayaong Milenyal nga Pagmando sa Gingharian sa Diyos!

□ Gusto nakong makadawat sa brosyur nga Unsay Gikinahanglan sa Diyos Kanato?

□ Palihog kontaka ako bahin sa usa ka libreng pagtuon sa Bibliya sa balay

[Footnote]