Ugmara ang Interes nga Napadasig sa Kingdom News Num. 36
1 Nakompleto na ba nimo ang pagpang-apod-apod sa imong pahat sa Kingdom News Num. 36? Kini nagsuknag usa ka tukma-sa-panahon nga pangutana nga pamalandongon sa tanan: “Ang Bag-ong Milenyo—Unsang Kaugmaon ang Gitanyag Niini Alang Kanimo?” Samtang ang tuig 2000 ania na, ang mga pagdahom kon unsay ipahinabo sa bag-ong milenyo nagkalainlain kaayo. Ang Kingdom News Num. 36 naghisgot sa pipila niana nga mga pagdahom ug nagpahinumdom kanato nga ang mga kahimtang sa kalibotan dili magtaganag pasukaranan sa masanagong panglantaw. Ang bugtong milenyo nga magpahinabog kalinaw ug kasegurohan nga gitinguha sa kadaghanang tawo mao ang Milenyong Pagmando ni Kristo Jesus. Ang atong pagsalig sa katinuoran sa iyang Gingharian nagpadasig kanato sa pag-apod-apod ug Kingdom News Num. 36 ngadto sa tanan nga atong maarangan.
2 Mga Sanong sa Kingdom News: Ang nangaging mga pagpang-apod-apod sa Kingdom News napamatud-ang usa ka maayong panukmod kanato diha sa atong buluhaton. Mahitungod sa Kingdom News Num. 35, ang sangang buhatan sa Canada misulat: “Kining linaing kampanya madasigong gipaluyohan sa mga magmamantala ug mga payunir diha sa kanataran, ug daghang makapadasig nga mga kasinatian ang napahimuslan.” Walay duhaduha imong gipakita ang samang kadasig alang sa pagpang-apod-apod sa Kingdom News Num. 36.
3 Ang kampanya sa bag-ong Kingdom News gieskedyul nga matapos sa Nobyembre 17, 2000. Ang tanan bang natudlong teritoryo sa inyong kongregasyon nakobrehan na? Kon wala pa, ang mga ansiyano tingali mohangyo kanimo nga ipadayon ang kampanya hangtod sa kataposan sa Nobyembre.
4 Unsa may sanong hangtod karon sa pagpang-apod-apod sa Kingdom News Num. 36 sa inyong lugar? Ang pipila ka tawo mopil-ap sa kupon ug mohangyo ug usa ka kopya sa brosyur nga Gikinahanglan ug/o usa ka pagtuon sa Bibliya sa balay. Apan, ang kadaghanan niadtong nagpakitag pasiunang interes sa ulohang milenyo lagmit dili molihok hangtod nga usa sa mga Saksi ni Jehova mobalikduaw. Ang tanang nagpakitag interes angayng duawon pag-usab. Kanus-a man ang maayong panahon sa pagbuhat niini? Ang pagpaloap kinahanglang himoon sa labing madali nga maarangan.
5 Matikdi kini nga mga kasinatian nga miresulta gumikan sa pagbalik sa mga napahimutangan ug Kingdom News Num. 35. Usa ka payunir sa Irlandia nagbilin ug Kingdom News sa tag-iya sa usa ka restawran. Ang babaye nakadayeg sa mensahe ug nagdapit sa sister nga mobalik. Ang sister mibalik human sa duha ka adlaw, ug ang pagtuon sa Bibliya nasugdan. Sa Denmark, usa ka kopya sa Kingdom News gibilin diha sa usa ka balay nga walay tawo. Nianang samang adlaw ang babaye nga nagpuyo didto mipadala sa kupon ngadto sa sangang buhatan, nga miduso niana ngadto sa lokal nga kongregasyon. Una pa matapos ang semana, duha ka sister ang miduaw, ang usa ka pagtuon gihikay, ug ang babaye mitambong sa iyang unang tigom sa Kingdom Hall!
6 Kon Unsay Isulti sa Dihang Mobalik Ka: Ang paghimog mga pagbalikduaw sa mga napahimutangan ug Kingdom News sayon ra ug makalingaw nga bahin sa atong ministeryo. Sa dihang buhaton kana, makaayo nga magdala ka ug kopya sa Kingdom News Num. 36, sanglit ang tagbalay tingali wala maghupot sa iyang kopya. Mahimo nimong sulayan kini nga mga sugyot.
7 Human nimo ipahinumdom sa tagbalay kon kinsa ka, ikaw makaingon:
◼ “Nagbilin ako ug usa ka tract nga nag-ulohang ‘Ang Bag-ong Milenyo—Unsang Kaugmaon ang Gitanyag Niini Alang Kanimo?’ Dili ba makapalig-on ang pagbasa nga sa dili madugay ang Milenyong Pagmando ni Kristo Jesus mosugod, nga magpahinabo sa Paraisong mga kahimtang sa yuta? [Ipakita ang mga ilustrasyon sa Paraiso diha sa Kingdom News Num. 36.] Sa likod nga panid, gidapit ka sa paghangyo ug usa ka kopya sa brosyur nga Unsay Gikinahanglan sa Diyos Kanato?” Ipakita ang brosyur, paklia sa leksiyon 5, basaha ang unang pangutana ug mga parapo 1 ug 2, ug hangyoa ang tagbalay nga magkomento. Basaha ug hisgoti ang usa o duha ka kasulatan. Kon posible, tagda ang laing pangutana ug parapo, dayon hikaya nga mobalik ug ipadayon ang panaghisgot.
8 Sanglit ang paloap nga tanyag sa Nobyembre mao ang brosyur nga “Gikinahanglan” o ang librong “Kahibalo,” mahimong moingon ka:
◼ “Sa dihang ako miduaw kanimo di pa dugay, nagbilin ako ug usa ka kopya sa ‘Ang Bag-ong Milenyo—Unsang Kaugmaon ang Gitanyag Niini Alang Kanimo?’ May usa ka tanyag kini nga usa ka pagtuon sa Bibliya sa balay nga walay bayad. Mibalik ako aron ipakita kanimo ang tabang sa pagtuon nga atong gamiton. [Ipakita ang brosyur nga Gikinahanglan, ug paklia ang likod nga hapin; o ipakita ang librong Kahibalo, ug paklia ang mga panid 188-9.] Ang Milenyo nga gihisgotan sa Bibliya magpahinabog mga kahimtang sama sa imong makita niini nga ilustrasyon. Aron mahimong takos alang sa kinabuhi sa Paraiso, kita kinahanglang mokuha ug tukmang kahibalo sa Diyos. Palihog tugoting ipasundayag ko sa mubo kon sa unsang paagi atong tun-an ang Bibliya.”
9 Ang pagpang-apod-apod sa Kingdom News Num. 36 nagtukmod kanato sa pagpadako sa atong pagpakig-ambit diha sa ministeryo, nga mopatunghag usa ka dakong pagpamatuod. Lagmit napadasig niini ang interes sa daghang indibiduwal diha sa teritoryo. Ang atong hiniusang paningkamot sa pag-ugmad niini nga interes, uban sa tabang ni Jehova, moresulta sa atong malipayong pagpangita ug dugang samag-karnero nga mga tawo.—Mat. 10:11; Buh. 13:48, 49, 52.