Sundala ang Interes sa Kingdom News
1 Sa Miaging Pipila Ka Semana, Gitagamtam Nato Ang Pribilehiyo Sa Pag-apod-apod Sa Kingdom News No. 35, Nga Nag-ulohang “Maghigugmaay Pa Kaha Ang Tanang Tawo Sa Usag Usa?” Ang Mga Magmamantala Bisan Diin Naningkamot Sa Pag-abot Sa Daghang Takos Nga Mga Tawo Kutob Sa Maarangan Uban Niining Isyu Sa Kingdom News. (Mat. 10:11) Bisan Tuod Ang Kampanya Gieskedyul Nga Matapos Sa Dominggo, Nobyembre 16, Kon Duna Pa Ing Teritoryo Nga Kobrehanan, Ang Mga Ansiyano Hayan Mohangyo Kaninyo Sa Pagpadayon Sa Pag-apod-apod Sa Kingdom News No. 35 Samtang May Suplay Pa Ang Kongregasyon.
2 Kini Nga Isyu Sa Kingdom News Nakapukaw Sa Interes Sa Daghang Tawo. Ilang Nakita Nga Ang Mga Tawo Sa Kinatibuk-an Nawad-an Sa Ilang Natural Nga Pagbati Ug Busa Nahibulong Kon Unsay Anaa Sa Ugma-damlag. (2 Tim. 3:3) Buot Natong Sundalon Ang Interes Nga Nasugdan.
3 Nakabaton ug mga Resulta ang Kingdom News: Sulod sa 1995 nga kampanya sa Kingdom News, usa ka tigulang nga sister nagpadalag pipila ka kopya. Usa ka babayeng nakadawat ug usa mitambong sa tigom sa Kingdom Hall tungod kay buot siyang mokat-on ug dugang bahin sa gituohan sa mga Saksi ni Jehova. Sa maong tigom iyang gidawat ang usa ka pagtuon sa Bibliya ug human niana talagsa rang mipalta sa tigom. Wala madugay, iyang gisulatan ang iyang kanhing iglesya, nga nagtapos sa iyang pagkamembro!
4 Sa pagkakaron, gatosan ka tawo diha sa teritoryo ang nakabasa sa mensahe sa Kingdom News No. 35. Apan unsay ilang sanong niana? Bisan kon sila nakadayeg ug maayo sa ilang nabasa, ang kadaghanan dili molihok hangtod ang usa sa mga Saksi ni Jehova moduaw kanila pag-usab. Nagaplano ka ba sa pagbalik? Ang mahigugmaong kahangawa sa atong isigkatawo angayng magtukmod kanato sa pagbuhat sa ingon. Ang tanang nagpakitag interes sa Kingdom News angayng duawon pag-usab.
5 Unsay Imong Isulti sa Imong Pagbalik? Mohimo ka tingalig pipila ka komento bahin sa mensahe sa Kingdom News ug dayon mosuknag usa ka makapahunahunang pangutana. Paminaw pag-ayo samtang ang tagbalay mopahayag sa iyang kaugalingon aron imong makat-onan kon unsay anaa sa iyang hunahuna. Dayon dad-a ang pagtagad ngadto sa tukmang punto diha sa Gikinahanglan nga brosyur, nga gipakita sa Kingdom News. Kon mabatonan mo ang paborableng sanong, sulayi ang pagsugod ug pagtuon sa Bibliya dihadiha.
6 Aniay pipila ka sinugyot nga mga presentasyon nga imong masulayan sa dihang mobalik niadtong nagpakitag interes sa “Kingdom News” No. 35:
◼ “Tingali imong mahinumdoman ang pinatik nga impormasyon nga akong gibilin kanimo di pa dugay. Ang mensahe niini nagatukbil sa hinungdanong isyu nga nagbahin sa katawhan karon—kakulang sa gugma alang sa uban.” Dad-a ang pagtagad ngadto sa ebidensiya nga gipresentar sa panid 2 sa Kingdom News ilalom sa ulohang “Nabugnaw ang Gugma sa Silingan.” Dayon pangutan-a, “Sa imong hunahuna katuyoan ba sa Diyos nga ang mga tawo mabuhi niining paagiha?” Tugoting motubag. Paklia ang leksiyon 5 sa Gikinahanglan nga brosyur, ug sulayi ang pagsugod ug pagtuon sa Bibliya.
◼ “Sa atong unang panagkita, nakabilin ko nimog pipila ka impormasyon sa ulohang ‘Maghigugmaay pa Kaha ang Tanang Tawo sa Usag Usa?’ Gihunahuna ba nimo nga posible ang maong matang sa kalibotan?” Tugoting motubag. Paklia ang leksiyon 6 diha sa Gikinahanglan nga brosyur, ug basaha ang parapo 6. Dayon basaha ang saad sa Diyos sa Miqueas 4:3, 4. Kon maorag interesado ang tagbalay, itanyag ang brosyur ug ang usa ka pagtuon.
◼ “Sa akong ulahing pagduaw kanimo, nagbilin akog pipila ka materyal nga nag-ulohang ‘Maghigugmaay pa Kaha ang Tanang Tawo sa Usag Usa?’ Nagtanyag kini ug usa ka libreng pagtuon sa Bibliya sa balay. Ako mibalik aron ipakita kanimo ang tabang sa pagtuon nga atong magamit. [Ipakita ang Kahibalo nga libro.] Kining libroha tin-awng nagasaysay bahin sa panahon sa dihang ang tanang tawo maghigugmaay sa usag usa, ug kini nagatubag sa ubang mga pangutana nga tingali imong gikalibgan: Nganong kita matigulang ug mamatay? Nganong gitugotan sa Diyos ang kasakitan? Unsay mahitabo sa atong namatay nga mga minahal? Ako bang ikapasundayag ang kurso sa pagtuon kanimo?” Kon ang tagbalay modumili sa imong tanyag, suknaa siya kon buot ba niyang basahon ang libro sa iyang kaugalingon. Kon gusto niya, tanyagi siyag usa ka kopya. Planoha nga mobalik pag-usab.
7 Sa dihang ang teritoryo makobrehan na sa bug-os sa Kingdom News No. 35, mahimong atong itanyag ang Kahibalo nga libro sulod sa nahibilin sa bulan. Ang daghang kapilian sa gisugyot nga mga presentasyon niining libroha makaplagan sa likod nga panid sa Atong Ministeryo sa Gingharian sa mga isyu sa Marso, Hunyo, ug Nobyembre 1996; ug Hunyo 1997.
8 Kining linaing pag-apod-apod sa Kingdom News angayng magtukmod kanatong tanan sa pagpadako sa atong mga paningkamot diha sa buluhatong pagsangyaw. Uban sa tabang ni Jehova kita makasalig nga kining kampanyaha molampos gayod, nga magtabang sa mga tawo nga makasabot sa katuyoan sa Diyos alang sa tanang katawhan sa paghigugma sa usag usa. Hinaot si Jehova padayong magapanalangin sa atong makugihong mga panikaysikay samtang atong sundalon ang interes sa Kingdom News.