Paggamit sa Bibliya Gidasig

ATONG tinguha nga ipunting ang pagtagad sa tanan nganha sa Pulong sa Diyos, ang Bibliya. Kanang sagradong basahon mao ang pasukaranan sa mensaheng atong giwali, ug buot natong ang mga tawo makaamgo nga ang atong gisulti wala magagikan sa atong kaugalingon kondili nagagikan sa Diyos. Kinahanglang maugmad sa mga tawo ang pagsalig sa Bibliya.

Diha sa Ministeryo sa Kanataran. Sa dihang mangandam alang sa ministeryo sa kanataran, pagpili kanunay ug usa o daghan pang kasulatan aron ipaambit sa mga tawo nga gustong mamati. Bisan kon naghunahuna ka sa paghatag ug mubong presentasyon sa pagtanyag ug basahon sa Bibliya, kasagarang maayo ang pagbasag usa ka nahiangayng teksto sa Bibliya. Ang Bibliya mas epektibo nga motultol sa karnerohong mga tawo kay sa bisan unsa pa nga atong ikasulti tingali sa personal. Kon dili posible ang pagbasa gikan sa Bibliya, basin palabihon mo ang pagkutlo gikan niana. Sa unang siglo, ang mga kopya sa linukot nga mga basahon sa Kasulatan dili lapnag. Bisan pa niana, si Jesus ug ang iyang mga apostoles kanunayng nagkutlo gikan sa Kasulatan. Kita usab angayng maningkamot nga makasag-ulo ug mga kasulatan ug gamiton kana sa angayang paagi diha sa atong ministeryo, nga usahay magkutlo lang niini.

Sa dihang makahimo ka sa pagbasa gikan sa Bibliya, kupti kini aron makasunod pagbasa ang tagbalay sa imong pagbasa. Kon ang tagbalay makasunod sa pagbasa diha sa iyang kaugalingong kopya sa Bibliya, basin mas paborable pa ang iyang pagsanong sa iyang mabasa.

Hinunoa, angay nimong masayran nga ang pipila ka tighubad sa Bibliya nagmabuotbuoton sa paghubad sa Pulong sa Diyos. Ang ilang mga paghubad tingali dili uyon sa tanang bahin sa orihinal nga mga pinulongan sa Bibliya. Ang ubay-ubayng modernong mga hubad nagtangtang sa personal nga ngalan sa Diyos, naglubog sa gisulti sa orihinal-pinulongan nga teksto bahin sa kahimtang sa patay, ug naglilong sa gisulti sa Bibliya bahin sa katuyoan sa Diyos alang sa yuta. Aron ikapakita sa usa ka tawo kon unsay nahimo, gikinahanglan tingali nga imong itandi ang paninugdang mga teksto sa nagkadaiyang mga Bibliya o sa sayosayong mga hubad diha sa mao mismong pinulongan. Bahin sa ubay-ubayng ulohan, ang Nangatarongan Pinasukad sa Kasulatan naghimog usa ka pagtandi sa mga paagi sa paghubad sa nagkadaiyang mga hubad sa Bibliya sa paninugdang mga pulong sa mga bersikulo nga kanunayng gigamit. Si bisan kinsang nahigugma sa kamatuoran magmapasalamaton tungod kay nasayran ang mga tinuod nga nahitabo.

Panahon sa mga Tigom sa Kongregasyon. Ang tanan angayng dasigon sa paggamit sa ilang mga Bibliya panahon sa mga tigom sa kongregasyon. Daghang kaayohan ang malampos niini. Kini makatabang sa pagpunting sa pagtagad sa mamiminaw nganha sa ginahisgotan. Madugangan ang kaepektibo sa binabang pagpanudlo sa mamumulong tungod sa butang nga nakita sa mata. Ug masilsil sa mga alimpatakan sa mga bag-ong interesado nga ang Bibliya, sa tinuoray, mao ang gibasehan sa atong mga tinuohan.

Kon kaha ang imong mamiminaw mosunod sa imong pagbasa sa mga teksto sa Kasulatan diha sa ilang kaugalingong mga Bibliya magdependeg dako sa pagdasig nimo kanila. Ang direktang pagdapit maoy usa sa labing maayong mga paagi.

Anaa ra kanimo, nga mamumulong, ang pagdesisyon kon unsang mga tekstoha ang gusto nimong ipasiugda pinaagi sa pagpatan-aw sa mamiminaw niana. Labing maayo nga basahon ang mga kasulatang makatabang sa imong paghan-ay sa imong pangunang mga punto. Unya, sumala sa itugot sa panahon, idugang ang pipila ka tekstong mosuportar sa imong argumento.

Siyempre, ang pagsitar lamang sa teksto o pagdapit sa mamiminaw nga tan-awon ang kasulatan kasagarang dili pa igo. Kon ikaw mobasag usa ka teksto ug dayon mobasag lain sa dihang wala pa makita sa imong mamiminaw ang unang teksto, sa taudtaod sila mawad-ag kadasig ug dili na mosunod sa pagbasa sa Bibliya. Magmapaniiron. Sa dihang ang kadaghanan nakakita na sa teksto, basaha kini.

Paghunahunang abante. Abanteng isitar ang imong kasulatan una kini basahon. Mamenosan niini ang mausik nga panahon tungod sa paghulat nga makaplagan sa mamiminaw ang teksto. Bisan kon diyutay ra ang impormasyon nga kahisgotan kon hatagan nimog panahon ang mamiminaw sa pagpangita sa mga kasulatan, kini mapuslanon tungod sa mga kaayohan nga mahatag niini.