Pangutana

◼ Nganong mapuslanon alang sa mamiminaw ang pagpangita sa mga kasulatan sa dihang dapiton sa mamumulong nga buhaton ang ingon sa panahon sa iyang pakigpulong?

Ang mga butang sama sa ulohan nga gihisgotan ug kon kaha ang pakigpulong naglakip sa bersikulo-por-bersikulo nga pagtagad sa usa ka bahin sa Pulong sa Diyos mao ang motino sa gidaghanon sa mga kasulatan nga ang mamiminaw mahimong dapiton sa pagpangita.

Hinungdanon nga ibutang sa hunahuna nga ang usa ka katarongan sa pagpangita sa mga kasulatan maoy sa pagseguro nga ang gisulti maoy gikan sa Bibliya. (Buh. 17:11) Ang laing tuyo mao ang pagsusi sa Kasulatanhong pamatuod agig pagpalig-on sa ginahisgotan aron ang pagtuo sa tanan mapalig-on. Ang pagkakita kon unsay aktuwal nga giingon sa Bibliya samtang ang yawing teksto gibasa mohimog dobleng pagtisok diha sa hunahuna. Dugang pa sa pagpangita sa mga kasulatan, mapuslanon ang pagkuhag mga nota ug pagsunod sa dagan sa mga ideya nga gipahayag.

Bisan kon ang laraw sa Sosyedad tingali mogamit ug daghang teksto sa Kasulatan sa pag-ugmad sa usa ka ulohan, kini gitagana alang sa kaayohan sa mamumulong, sa pagtabang kaniya sa iyang pagpangandam. Kini tingali maghatag ug dugang impormasyon ug sa laing paagi magtabang kaniya nga masabtan sa bug-os ang paninugdang Kasulatanhong mga prinsipyo ug masabtan ang kaugmaran sa ulohan. Tinoon sa mamumulong kon unsang mga tekstoha ang hinungdanon sa pag-ugmad sa pakigpulong ug dapiton ang mamiminaw sa pagsunod uban kaniya samtang ang maong mga teksto ginabasa ug ginapatin-aw. Ang ubang mga teksto nga nagpaluyo sa materyal mahimong isulti ug batbaton sa laing mga pulong, apan nianang mga kahimtanga ang mamiminaw dili na kinahanglang mangita niana.

Sa dihang basahon sa mamumulong ang piniling mga kasulatan, basahon niya kana nga deretso gikan sa Bibliya, dili gikan sa inimprenta sa kompiyuter. Sa dihang dapiton sa mamumulong ang mamiminaw sa pagduyog sa pagbasa, isulti niya sa tin-aw ang basahon sa Bibliya, ang kapitulo, ug ang (mga) bersikulo. Pinaagi sa paghunong aron magbangon ug pangutana o magkomento sa mubo kon nganong ang teksto kinahanglang basahon, siya magtugot ug panahon sa mamiminaw sa pagpangita sa kasulatan. Ang pagsubli sa teksto motabang sa mamiminaw nga mahinumdoman ang reperensiya. Apan, wala isugyot nga isulti ang numero sa panid, sanglit magkalahi kini depende sa partikular nga edisyon sa Bibliya nga gigamit sa mga indibiduwal nga mamiminaw. Ang pagpangita sa mga kasulatan sa dihang dapiton sa pagbuhat sa ingon motabang sa mamiminaw nga makakuhag kaayohan gikan sa gahom sa Pulong sa Diyos samtang ipatin-aw kini sa panahon sa pakigpulong.​—Heb. 4:12.