TUN-ANAN 25
Paggamit ug Laraw
ANG palaaboton nga mosulti gikan sa usa ka laraw makapanerbiyos sa daghang tawo. Mobati silag dakong kasegurohan kon gisulat o nasag-ulo ang tanang isulti nila.
Apan, sa pagkamatuod, kada adlaw kitang tanan nagsulting walay manuskrito. Atong gihimo kini sa pagpakigkabildo sa pamilya ug sa mga higala. Atong gihimo kini sa dihang magpakigbahin sa ministeryo sa kanataran. Ug atong gihimo kini sa dihang naglitok ug kinasingkasing nga mga pag-ampo, sa pribado man o alang sa usa ka grupo.
Kon maghatag kag pakigpulong, may kalainan ba kon mogamit kag manuskrito o usa ka laraw? Bisan pag ang pagbasa gikan sa naandam nga manuskrito makatabang nga matino ang katukma ug magamit ang maayong-pagkahan-ay nga mga pulong, dili kaayo kini makatukbil sa mga kasingkasing. Kon magbasa kag daghang tudling-pulong, kasagarang gamiton mo ang paso ug tonada nga lahi sa imong kinaiyanhong estilo sa pagpakigkabildo. Kon ang imong atensiyon labaw pang mapunting sa imong mga nota inay sa imong mamiminaw, ang daghan tingali dili mamatig maayo sama sa ilang himoon kon mobati silang naghunahuna ka gayod kanila ug nagpahiuyon sa imong materyal nganha sa ilang mga kahimtang. Alang sa makapalihok gayod nga pakigpulong, ang ekstemporanyo nga pagsulti mao ang labing maayo.
Ang Teokratikanhong Tunghaan sa Ministeryo gidisenyo aron tabangan ka sa adlaw-adlaw nga kinabuhi. Sa dihang makahibalag kitag mga higala, dili kita mohulbot ug usa ka palid nga papel ug basahon ang atong mga hunahuna ngadto kanila aron maseguro ang labing maayong kahan-ayan sa mga pulong. Diha sa pag-alagad sa kanataran, dili kita magdalag manuskrito aron basahon, tungod sa kahadlok nga basin atong malimtan ang pipila ka punto nga buot natong ipaambit sa mga tawo. Sa dihang magpasundayag diha sa tunghaan kon unsaon pagsangyaw ubos sa maong mga kahimtang, bansaya ang pagsulti sa kinaiyanhong paagi kutob sa maarangan. Uban ang maayong pagpangandam, masayran nimong ang usa ka laraw, mahimong anaa sa hunahuna o sinulat, kasagarang igo na aron pahinumdoman ka sa pangunang mga ideya nga buot nimong hisgotan. Apan sa unsang paagi makaugmad ka sa pagsalig nga gikinahanglan sa pagsulting ginamit ang laraw?
Organisaha ang Imong mga Ideya. Sa paggamit ug laraw sa dihang magsulti, kinahanglang organisahon mo ang imong mga ideya. Wala kini magpasabot sa pagpili sa mga pulong nga giplano nimong gamiton. Nagpasabot lang kini sa paghunahuna sa dili pa mosulti.
Sa adlaw-adlaw nga kinabuhi, ang mapahinaykong tawo lagmit mosultig mga butang nga sa ulahi siya manghinaot nga wala unta niya isulti. Ang laing tawo basin mosulting walay tunong, nga magsalaag gikan sa usa ka ideya ngadto sa lain. Kining duha ka tendensiya masulbad sa epektibong paagi pinaagi sa paghunong aron han-ayon ang yanong laraw diha sa hunahuna una mosugod sa pagsulti. Sa sinugdan pihoa diha sa hunahuna ang imong tumong, dayon pilia ang mga lakang nga kinahanglang imong himoon aron makab-ot kana, ug unya sugdi ang pakigpulong.
Nagaandam ka ba alang sa pag-alagad sa kanataran? Hatagig panahon dili lamang ang paghikay sa imong bag sa pagsangyaw kondili organisaha usab ang imong mga ideya. Kon mohukom ka sa paggamit sa usa sa gisugyot nga mga presentasyon gikan sa Atong Ministeryo sa Gingharian, basaha kanag daghang higayon aron ang pangunang mga ideya matin-aw diha sa hunahuna. Ipahayag ang mga pangunang punto niana sa usa o duha ka mugbong mga tudling-pulong. Ipahiuyon ang paghan-ay sa mga pulong sa imong kaugalingong personalidad ug sa mga kondisyon diha sa imong teritoryo. Makatabang nga magbaton kag laraw sa hunahuna. Unsay ikalakip niana? (1) Ingong introduksiyon, makahisgot kag butang nga makaikag sa daghang tawo diha sa inyong komunidad. Dapita ang tagbalay sa pagkomento. (2) Ibutang sa hunahuna ang espesipikong butang nga ikapaambit mo bahin sa ulohan, lakip ang usa o duha ka kasulatang magpakita kon unsay gisaad sa Diyos nga himoon sa pagdalag kahupayan. Kon hatagag higayon, ipasiugda nga kini buhaton ni Jehova pinaagi sa iyang Gingharian, nga iyang langitnong kagamhanan. (3) Dasiga ang tawo nga molihok pinasukad sa butang nga imong nahisgotan. Makatanyag ka ug literatura ug/o pagtuon sa Bibliya ug himoa ang tinong kahikayan sa pagpadayon sa panaghisgot.
Ang laraw nga lagmit imong kinahanglanon alang sa maong presentasyon mao lang ang laraw sa hunahuna. Kon buot mong susihon ang sinulat nga laraw una pa sa imong unang pagduaw, ang laraw lagmit adunay pipila lang ka pulong nga magamit alang sa imong introduksiyon, sinulat nga usa o duha ka kasulatan, ug mubong nota kon unsay buot nimong ilakip sa imong konklusyon. Ang pagpangandam ug paggamit sa maong laraw mopugong kanato sa pagsulting walay tunong, nga makatabang kanato sa pagsilsil diha sa hunahuna sa tawo sa tin-awng mensahe nga sayong hinumdoman.
Kon ang usa ka pangutana o pagtutol subsob motungha diha sa inyong teritoryo, makatabang nga ikaw manukiduki bahin niana. Kasagaran, ang imong gikinahanglan lamang mao ang duha o tulo ka paninugdang mga punto uban ang mga kasulatang gipasikaran niana. Ang “Mga Topiko sa Bibliya nga Kahisgotan” o ang tataw kaayong mga sub-ulohan diha sa Nangatarongan Pinasukad sa Kasulatan basin motagana gayod sa laraw nga imong gikinahanglan. Basin ikaw makakitag angayng pangutlo gikan sa laing tinubdan nga buot nimong ilakip. Himoa ang mubong sinulat nga laraw, itapik ang kopya sa pangutlo, ug ibutang kini uban sa imong kasangkapan alang sa pag-alagad sa kanataran. Sa dihang ipatungha sa usa ka tagbalay ang pangutana o pagtutol, sultihi siya nga imong gikalipay ang kahigayonan sa paghatag ug katarongan sa imong gituohan. (1 Ped. 3:15) Gamita ang laraw ingong pasikaranan sa imong tubag.
Kon ikaw mao ang mag-ampo alang sa imong pamilya, grupo sa pagtuon sa libro, o kongregasyon, maayo usab nga organisahon mo ang imong mga ideya. Sumala sa Lucas 11:2-4, si Jesus mihatag sa iyang mga tinun-an ug yanong laraw alang sa makahuloganong pag-ampo. Sa panahon sa pagpahinungod sa templo sa Jerusalem, si Solomon militok ug taas nga pag-ampo. Dayag iyang gihunahuna nga abante ang ulohan. Iyang gitumong ang atensiyon sa sinugdan kang Jehova ug sa Iyang saad kang David; dayon sa templo; ug unya, nga tinagsa, sa espesipikong mga kahimtang ug mga grupo sa mga tawo. (1 Hari 8:22-53) Makabaton kitag kaayohan gikan sa maong mga panig-ingnan.
Himoang Yano ang Laraw sa Imong Pakigpulong. Ang imong laraw ba giplano alang sa paghatag ug pakigpulong? Unsa ka daghan ang angayng ilakip niini?
Hinumdomi nga ang tuyo sa usa ka laraw maoy tabangan ka sa paghinumdom sa mga ideya. Basin mobati ka nga maayong isulat ang pipila ka tudling-pulong nga gamitong introduksiyon. Apan human niana, ipunting ang hunahuna diha sa mga ideya, dili sa mga pulong. Kon ibutang mo ang maong mga ideya sa pormang mga tudling-pulong, pilia ang mugbong mga tudling-pulong. Ang pipila ka pangunang punto nga giplano nimong han-ayon angayng matin-aw diha sa laraw. Kini mahimo pinaagi sa pagsulat kanila sa kapital nga mga letra, pagbadlis sa mga punto, o pagmarka niana nga dekolor. Ubos sa matag pangunang punto, ilista ang mga ideya nga buot nimong gamiton sa dihang han-ayon kana. Isitar ang mga kasulatang giplano nimong basahon. Kasagaran nga labing maayo ang aktuwal nga pagbasa niana sa Bibliya. Inota ang mga ilustrasyong buot nimong gamiton. Basin duna kay hinungdanong sekular nga pangutlo nga nahiangay. Himoang bug-os ang imong mga nota aron adunay espesipikong mga kamatuoran nga ikapresentar. Ang laraw mas sayong gamiton kon kini hapsay.
Ang pipila nagagamit ug mga laraw nga paninugdan kaayo. Ang usa ka laraw mahimong gilangkoban ug pipila ka pangunang pulong, gisulat nga mga kasulatan nga kutloon sa mamumulong nga sinag-ulo, ug mga dibuho o mga hulagway nga makatabang niya sa paghinumdom sa mga ideya. Pinaagi niining yanong mga nota, ang mamumulong makapresentar sa iyang materyal sa makataronganong kahan-ayan ug sa kabildohay nga paagi. Kana mao ang tumong niini nga tun-anan.
Sa mga panid 39 hangtod 42 niining libroha, makita nimo ang paghisgot sa “Paghimog Usa ka Laraw.” Makatabang kaayo ang pagbasa nianang materyala samtang nagapauswag ka niini nga tun-anan, “Paggamit ug Laraw.”
Kon Unsaon Paggamit ang Laraw. Hinuon, ang imong tumong niining tungora maoy dili lamang pag-andam sa imong pakigpulong diha sa pormang usa ka laraw. Kini mao ang paggamit nga epektibo sa laraw.
Ang unang lakang sa paggamit sa imong laraw maoy pagpangandam sa pagpakigpulong. Tan-awa ang tema, basaha ang matag usa sa mga pangunang punto, ug ipahayag sa imong kaugalingon ang koneksiyon sa matag usa sa maong mga pangunang punto sa tema. Isulat kon pila ang panahong ikahatag sa matag pangunang punto. Karon balik ug tun-i ang unang pangunang punto. Repasoha ang mga argumento, mga kasulatan, mga ilustrasyon, ug mga pananglitan nga giplano nimong gamiton sa paghan-ay sa maong punto. Basaha sa daghang beses ang materyal hangtod nga ang maong seksiyon sa imong pakigpulong matin-aw na sa hunahuna. Himoa ang sama sa matag usa sa ubang mga pangunang punto. Tagda kon unsay mahimo nimong laktawan, kon gikinahanglan, aron mahuman ka sa eksaktong panahon. Unya repasoha ang tibuok pakigpulong. Ipunting ang hunahuna diha sa mga ideya, dili sa mga pulong. Ayawg sag-uloha ang pakigpulong.
Sa dihang magpakigpulong ka, angayng ipadayon nimo ang maayong pagkomunikar pinaagi sa pagtan-aw sa imong mamiminaw. Human sa pagbasag kasulatan, kasagarang makaarang ka sa pagpangatarongan pinasukad niana pinaagi sa paggamit sa imong Bibliya apan dili na susihon ang imong mga nota. Sa susama, kon mogamit kag ilustrasyon, iasoy kana nga sama sa pag-asoy ngadto sa mga higala inay kay basahon kana gikan sa imong mga nota. Samtang magasulti ka, ayawg tan-aw sa imong mga nota alang sa matag tudling-pulong. Sulti nga kinasingkasing, ug makatukbil ka sa mga kasingkasing niadtong nagpatalinghog kanimo.
Sa dihang mabatid mo ang arte sa pagpakigpulong gikan sa usa ka laraw, nahimo nimo ang hinungdanon kaayong abanteng lakang sa pagkahimong epektibong mamumulong sa publiko.