Kapitulo Tres

Pangupot nga Hugot sa Pulong sa Diyos

1. (a) Sa unsang paagi ang karaang Israel nakasinati sa pagkatinuod sa pulong sa Diyos? (b) Nganong kana makapaikag kanato?

“KAMO nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo.” (Josue 23:14-16) Kini ang gisulti ni Josue sa mga ansiyano sa Israel human sila mopahiluna sa Yutang Saad. Oo, ang mga saad ni Jehova napamatud-ang kasaligan. Kana nga rekord​—ug ang tanang uban pang rekord sa Bibliya—​gitipigan alang kanato aron “kita makabatog paglaom.”​—Roma 15:4.

2. (a) Sa unsang diwa nga ang Bibliya “inspirado sa Diyos”? (b) Unsang kaakohan ang atong nabatonan sa pagkahibalo nga ang Bibliya inspirado sa Diyos?

² Bisan tuod mga 40 ka tawhanong magsusulat ang gigamit sa pagsulat sa Bibliya, si Jehova mao ang Awtor niini. Nagpasabot ba kini nga aktibo niyang gitultolan ang pagsulat sa tanang impormasyon diha niana? Oo. Gibuhat niya kini pinaagi sa iyang gamhanang balaang espiritu, ang iyang aktibong puwersa. Si apostol Pablo matinud-anong miingon: “Ang tibuok Kasulatan inspirado sa Diyos . . . aron ang tawo sa Diyos mahimong takos gayod, bug-os nga masinangkapan alang sa tanang maayong buhat.” Ang mga tawo bisan diin nga kombinsido niana mosunod sa Bibliya ug magkinabuhi sumala sa mga pagtulon-an niana.​—2 Timoteo 3:​16, 17; 1 Tesalonica 2:13.

Tabangi ang Uban sa Pagpabili Niana

3. Unsa ang labing maayong paagi sa pagtabang sa daghan kinsa dili kombinsido nga ang Bibliya mao ang Pulong sa Diyos?

³ Daghan sa atong sangyawan dili sama kanatog pagtuo nga ang Bibliya mao ang Pulong sa Diyos. Unsaon man nato sila pagtabang? Sagad, ang labing maayong paagi mao ang pagbukas sa Bibliya ug pagpakita kanila sa sulod niini. “Ang pulong sa Diyos buhi ug gamhanan ug mahait pa kay sa espada nga duhay-sulab . . . ug makatugkad sa mga hunahuna ug mga tuyo sa kasingkasing.” (Hebreohanon 4:12) “Ang pulong sa Diyos” dili patay nga kasaysayan; kini buhi! Ang mga saad sa Bibliya dili mapugngan nga mopadulong sa pagkatuman. Ang impluwensiya sa mensahe sa Bibliya diha sa tinuod nga panukmod sa kasingkasing sa tawo mas gamhanan kay sa bisan unsang butang nga tingali atong ikasulti.

4. Unsang mga pagpatin-aw sa mga kamatuoran sa Bibliya ang nakausab sa tinamdan sa pipila ka tawo bahin sa Bibliya, ug ngano?

⁴ Ang pagkakita sa ngalan sa Diyos diha niana nagpalihok sa daghan sa pagtugkad sa Bibliya. Ang uban nakahukom sa pagtuon sa Bibliya sa dihang gipakitaan kon unsay ginaingon niini bahin sa katuyoan sa kinabuhi, kon nganong gitugotan sa Diyos ang pagkadaotan, sa kahulogan sa bag-ong mga hitabo, o sa paglaom sa kinabuhing dayon sa paraisong yuta. Sa kayutaan nga ang relihiyosong mga buhat nagladlad sa mga tawo sa pagpanghasi sa daotang mga espiritu, ang pagpatin-aw sa Bibliya bahin sa hinungdan niini ug kon sa unsang paagi makalingkawas gikan niini nakapukaw sa interes. Nganong nakadayeg niining mga puntoha ang sinserong mga tawo? Kay ang Bibliya mao lamang ang tinubdan sa kasaligang impormasyon nianang tanang hinungdanong mga butang.​—Salmo 119:130.

5. (a) Kon ang mga tawo moingon nga sila dili motuo sa Bibliya, lagmit unsa ang mga katarongan? (b) Unsaon man nato pagtabang ang maong mga tawo?

⁵ Bisan pa niana, unsa na man kon ang mga tawo moingon kanato nga sila dili motuo sa Bibliya? Matapos na ba diha ang kabildohay? Dili kon sila andam mosusi sa mga katarongan. Basin giisip nila ang Bibliya ingong basahon sa Kakristiyanohan. Ang rekord niya sa pagkasalingkapaw ug pag-apil-apil sa politika, ingon man ang kanunay niyang pagpangayog amot nga salapi, basin maoy hinungdan sa ilang negatibong sanong sa Bibliya. Nganong dili pangutan-on kon ingon ba niana? Ang pagsaway sa Bibliya sa kalibotanong mga paagi sa Kakristiyanohan, lakip na ang mga kalainan tali sa Kakristiyanohan ug sa tinuod nga Kristiyanidad, basin makapukaw sa ilang interes.​—Miqueas 3:​11, 12; Mateo 15:​7-9; Santiago 4:4.

6. (a) Sa personal unsay nakapakombinsir kanimo nga ang Bibliya mao ang Pulong sa Diyos? (b) Unsang ubang mga paagi sa pangatarongan ang magamit aron tabangan ang mga tawo sa pagpabili nga ang Bibliya sa pagkatinuod gikan sa Diyos?

⁶ Alang sa uban, ang prangkang paghisgot sa mga pamatuod nga ang Bibliya inspirado sa Diyos tingali makatabang. Alang kanimo, unsay klarong pamatuod nga ang Bibliya gikan kang Jehova nga Diyos? Ang giingon ba sa Bibliya bahin sa sinugdan niini? O ang kamatuoran ba nga ang Bibliya nasudlan ug daghang tagna nga nagbanaag sa detalyadong kahibalo bahin sa umaabot, mga tagna nga naggikan gayod sa labaw-tawhanong tinubdan? (2 Pedro 1:​20, 21) O dili ba kaha nga ang Bibliya nagpasundayag sa katingalahang pagkaharmonya sa sulod niini, bisan tuod gisulat sa 40 ka lalaki latas sa yugto nga mga 1,600 ka tuig? O ang siyentipikanhong katukma niini nga kasukwahi sa ubang mga sinulat gikan sa maong mga panahon? O ang pagkaprangka sa mga magsusulat niini? O ang pagkanatipigan niini bisan pa sa mabangis nga mga paningkamot sa pagdaot niini? Bisan unsay imong nakitang makapadani magamit mo usab sa pagtabang sa ubang mga tawo.a

Atong Pagbasa sa Bibliya

7, 8. (a) Unsay angay natong buhaton bahin sa Bibliya? (b) Unsay atong gikinahanglan dugang pa sa personal nga pagbasa sa Bibliya? (c) Sa unsang paagi personal nimong naangkon ang pagsabot sa mga katuyoan ni Jehova?

⁷ Dugang pa sa pagtabang sa uban nga motuo sa Bibliya, kita mismo kinahanglang mogahin ug panahon sa pagbasa niana nga regular. Nagabuhat ka ba niana? Sa tanang basahon nga nahimo sukad, kini mao ang labing hinungdanon. Siyempre, wala kini magpasabot nga kon magkinaugalingon kita pagbasa niini, dili na kita magkinahanglag bisan unsa pa. Ang Kasulatan nagpasidaan batok sa pagkinaugalingon. Dili gayod kita maghunahuna nga makaplagan nato ang tanang tubag pinaagig independenteng panukiduki. Ang personal nga pagtuon ug regular nga pagtambong sa mga tigom sa katawhan sa Diyos gikinahanglan aron kita mahimong timbang nga mga Kristohanon.​—Proverbio 18:1; Hebreohanon 10:​24, 25.

⁸ Bahin niini, ang Bibliya nagsugid bahin sa usa ka Etiopianhong opisyal nga nagbasa sa tagna ni Isaias. Gitultolan sa manulonda ang Kristohanong ebanghelisador nga si Felipe sa pagsukna sa tawo: “Nakasabot ka ba gayod sa imong ginabasa?” Sa kamapaubsanon, ang Etiopianhon mitubag: “Sa pagkatinuod, unsaon ko man pagkasabot, gawas kon adunay magtudlo kanako?” Iyang giawhag si Felipe nga ipatin-aw ang teksto sa Kasulatan. Matikdi, si Felipe dili lamang independenteng magbabasa sa Bibliya nga naghatag sa iyang opinyon bahin sa Kasulatan. Siya nagpabiling suod sa makitang organisasyon sa Diyos. Mao nga iyang natabangan ang Etiopianhon sa pagbatog kaayohan sa instruksiyon nga gitagana ni Jehova pinaagi sa maong organisasyon. (Buhat 6:​5, 6; 8:​5, 26-35) Susama karon, walay usa ang makabatog hustong pagsabot sa mga katuyoan ni Jehova sa iyang kaugalingon lamang. Kitang tanan nagkinahanglan sa tabang nga mahigugmaong gitagana ni Jehova pinaagi sa iyang makitang organisasyon.

9. Unsang programa sa pagbasa sa Bibliya ang makahatag kaayohan kanatong tanan?

⁹ Aron matabangan kita sa pagsabot sa Bibliya, ang organisasyon ni Jehova nagtaganag ekselenteng Kasulatanhong materyal diha sa nagkadaiyang mga publikasyon. Dugang pa, ang regular nga eskedyul sa pagbasa sa Bibliya giandam alang kanato may kalabotan sa Teokratikanhong Tunghaan sa Ministeryo nga gihimo diha sa tanang kongregasyon sa mga Saksi ni Jehova sa tibuok kalibotan. Dakong kaayohan ang maangkon tungod sa personal nga pagsusi sa Balaang Kasulatan. (Salmo 1:​1-3; 19:​7, 8) Paningkamoti pag-ayo ang pagbasa nga regular sa Bibliya. Bisan tuod dili nimo masabtan ang tanan sa bug-os, ang pagbaton nimog katibuk-ang panglantaw sa Kasulatan mapuslanon kaayo. Pananglitan, kon mobasa ka lamag upat o lima ka panid sa usa ka adlaw, mabasa nimo ang Bibliya sa halos usa ka tuig.

10. (a) Kanus-a nimo buhaton ang imong pagbasa sa Bibliya? (b) Kinsa pa ang angayng paapilon sa pagbasa sa Bibliya, ug nganong ang pagkaregular hinungdanon?

¹⁰ Kanus-a nimo mahimo ang imong pagbasa sa Bibliya? Kon mag-eskedyul kag bisan 10 o 15 minutos sa usa ka adlaw alang niini, ikaw makabatog dakong kaayohan. Kon dili man, labing menos pag-eskedyul ug regular nga mga panahon alang niana kada semana, ug dayon sunda kanang eskedyula. Kon ikaw minyo, ikaw ug ang imong kapikas makapahimulos sa pagbasa nga kusog sa Bibliya ngadto sa usag usa. Kon may dagko nang mga anak nga makabasa, mahimo silang magpulihanay sa pagbasag kusog. Ang pagbasa sa Bibliya angay nga mahimong tibuok-kinabuhing batasan, sama sa pagkaog kalan-on. Segun sa imong nahibaloan, kon ang mga batasan sa pagkaon sa usa ka tawo dili maayo, ang panglawas madaot. Mao man usab, ang atong espirituwalidad, ug ang atong kinabuhing dayon, nag-agad sa atong pagkaon nga regular sa “matag pulong nga magagula sa baba ni Jehova.”​—Mateo 4:4.

Atong Tumong

11. Unsay angay natong tumong sa pagbasa sa Bibliya?

¹¹ Unsay angay natong tumong sa pagbasa sa Bibliya? Ang atong tumong dili lamang pagbasa ug tinong gidaghanon sa mga panid. Ang atong motibo mao ang pagkaila ug maayo sa Diyos aron mapalambo nato ang atong gugma kaniya ug magasimba kaniya sa dalawatong paagi. (Juan 5:39-42) Ang atong tinamdan angay nga mahisama sa magsusulat sa Bibliya nga miingon: “Ipaila kanako ang imong mga dalan, Oh Jehova; tudloi ako sa imong mga alagianan.”​—Salmo 25:4.

12. (a) Nganong ang pagbaton sa “tukmang kahibalo” kinahanglanon, ug sa dihang magabasa, unsang paningkamot ang gikinahanglan aron mabatonan ang maong kahibalo? (b) Pinaagi sa paggamit sa unsang upat ka punto de bista nga atong masusi sa mapuslanong paagi kon unsay atong pagabasahon sa Bibliya? (Tan-awa ang kahon sa panid 30.) (c) Iilustrar kining mga puntoha pinaagi sa pagtubag sa mga pangutanang gipakita niining parapoha. Susiha ang mga kasulatan nga gisitar apan wala kutloa.

¹² Samtang dawaton nato ang mga pagtulon-an gikan kang Jehova, kinahanglang maoy atong tinguha ang pagbaton sa “tukmang kahibalo.” Kon wala kini, unsaon man nato pagpadapat ang Pulong sa Diyos sa tukmang paagi sa atong mga kinabuhi o pagpatin-aw niana sa hustong paagi ngadto sa uban? (Colosas 3:​10; 2 Timoteo 2:15) Aron makabaton ug tukmang kahibalo kinahanglan nga kita mobasa sa maampingong paagi, ug kon ang usa ka bahin lisod sabton, basin kinahanglang sublion nato kinig basa aron ato kining masabtan. Makapahimulos usab kita kon gahinan natog panahon ang pagpamalandong sa materyal, nga maghunahuna bahin niana pinasukad sa nagkalainlaing mga punto de bista. Ang upat ka hinungdanong paagi sa pagpamalandong nga atong masusi gipakita sa panid 30. Daghang bahin sa Kasulatan ang masusi sa mapuslanong paagi pinaagi sa paggamit sa usa o labaw pa niini nga mga punto de bista. Samtang tubagon nimo ang mga pangutana sa mosunod nga mga panid, imong makita kon sa unsang paagi kana tinuod.

(1) Kasagaran, ang bahin sa Kasulatan nga imong ginabasa may ikasugilon kanimo kon unsang matanga sa persona si Jehova. Pananglitan, sa Salmo 139:​13, 14, atong makat-onan ang bahin sa dakong kahangawa sa Diyos alang sa mga gisabak pa: “Gisalipdan mo ako sa sulod sa tiyan sa akong inahan. Pagadayegon ko ikaw tungod kay sa makalilisang nga paagi ako katingalahan nga pagkabuhat. Ang imong mga buhat katingalahan, ingon sa nasayran pag-ayo sa akong kalag.” Pagkakahibulongan sa mga gilalang ni Jehova! Ang pagkalalang sa mga tawo nagpamatuod sa iyang dakong gugma kanato.

Tungod sa giingon sa Juan 14:​9, 10, sa dihang atong basahon kon sa unsang paagi si Jesus nakiglabot sa uban, ato gayong masabtan kon sa unsang paagi si Jehova molihok. Uban niana sa hunahuna, unsay atong ikahinapos bahin kang Jehova pinasikad sa mga hitabo nga narekord sa Lucas 5:​12, 13 ug Lucas 7:​11-​15?

(2) Matikdi kon sa unsang paagi ang asoy nalangkit sa tema sa Bibliya: ang pagbindikar sa pagkasoberano ni Jehova ug pagbalaan sa iyang ngalan pinaagi sa Gingharian ubos ni Jesu-Kristo, ang gisaad nga Binhi.

Sa unsang paagi ang tema sa Bibliya gipasiugda ni Ezequiel ug Daniel? (Ezequiel 38:21-​23; Daniel 2:​44; 4:​17; 7:​9-​14)

Sa unsang paagi ang Bibliya tin-awng nagpaila kang Jesus ingon nga sinaad nga Binhi? (Galacia 3:16)

Sa unsang paagi gibatbat sa Pinadayag ang kinatayuktokan sa tema sa Gingharian? (Pinadayag 11:15; 12:​7-​10; 17:16-​18; 19:11-​16; 20:​1-3; 21:1-5)

(3) Suknaa ang imong kaugalingon kon sa unsang paagi ikapadapat mo sa personal ang imong ginabasa. Pananglitan, atong mabasa sa Exodo hangtod sa Deuteronomio ang bahin sa imoralidad ug kamasukihon sa Israel. Nasayran nato nga ang maong mga tinamdan ug mga aksiyon nagdalag daotang mga sangpotanan. Busa, kita angayng matukmod sa pagpahimuot kang Jehova pinaagi sa dili pagsundog sa daotang panig-ingnan sa Israel. “Kining mga butanga nahitabo kanila ingong mga panig-ingnan, ug kini gisulat ingong pasidaan kanato nga naabtan sa mga kataposan sa mga sistema sa mga butang.”​—1 Corinto 10:11.

Ang rekord bahin sa pagpatay ni Cain kang Abel adunay unsang leksiyon alang kanato? (Genesis 4:​3-​12; Hebreohanon 11:4; 1 Juan 3:​10-​15; 4:​20, 21)

Ang tambag sa Bibliya sa mga Kristohanon nga dunay langitnong paglaom mapadapat ba usab ngadto kanilang dunay paglaom sa kinabuhing dayon sa yuta? (Numeros 15:16; Juan 10:16)

Bisan tuod maayo ang atong pagbarog diha sa Kristohanong kongregasyon, nganong angay natong konsiderahon kon unsaon pagpadapat sa mas bug-os pa sa tambag sa Bibliya nga ato nang nahibaloan? (2 Corinto 13:5; 1 Tesalonica 4:1)

(4) Palandonga kon unsaon nimo paggamit ang imong ginabasa sa pagtabang sa uban. Ang tanang tawo mabalak-on bahin sa mga sakit, busa atong mabasa ngadto nila ang gibuhat ni Jesus aron iilustrar ang iyang pagabuhaton sa mas dakong sukod inigmando niya ingong hari sa Gingharian: “Ang dakong mga panon sa katawhan miduol kaniya, nga nagdala ug mga tawong bakol, pungkol, buta, amang, ug daghang uban pa, . . . ug iyang giayo sila.”​—Mateo 15:30.

Kinsa ang lagmit matabangan sa asoy bahin sa pagkabanhaw sa anak nga babaye ni Jairo? (Lucas 8:​41, 42, 49-​56)

13. Unsang mga sangpotanan ang atong madahom sa padayong programa sa pagbasa ug pagtuon sa Bibliya uban sa organisasyon ni Jehova?

¹³ Mahimo gayong magantihon kaayo ang pagbasa sa Bibliya kon atong konsiderahon ang upat ka puntong gihisgotan sa ibabaw! Sa pagkatinuod, usa ka hagit ang pagbasa sa Bibliya. Apan kini makahatag kanatog kaayohan sa tibuok kinabuhi, kay sa dihang kita magabasa sa Kasulatan, kita motubo nga mas lig-on sa espirituwal. Ang regular nga pagbasa sa Bibliya magpasuod kanato sa atong mahigugmaong Amahan, si Jehova, ug sa atong Kristohanong mga igsoon. Motabang kini kanato sa pagsunod sa tambag nga magpadayon sa “pagpangupot nga hugot sa pulong sa kinabuhi.”​—Filipos 2:16.

[Footnote]

Repasong Panaghisgot

• Nganong ang Bibliya gisulat ug gitipigan hangtod sa atong panahon?

• Unsaon nato pagtabang ang uban sa pagpabili sa Bibliya?

• Nganong mapuslanon ang personal nga pagbasa sa Bibliya nga regular? Pinaagi sa paggamit sa unsang upat ka punto de bista nga atong masusi ang atong gibasa sa mapuslanong paagi?

[Kahon/Hulagway sa panid 30]

SA DIHANG BASAHON NIMO ANG USA KA BAHIN SA BIBLIYA, MATIKDI

Kon unsay gisulti niini kanimo bahin kang Jehova ingong persona

Kon sa unsang paagi kini nalangkit sa katibuk-ang tema sa Bibliya

Kon sa unsang paagi kini makaapektar gayod sa imong kinabuhi

Kon unsaon nimo kana paggamit sa pagtabang sa uban