Ang Bibliya—Usa ka Libro nga Angayng Basahon
MAHUTDAN ka dayon ug mga pulong sa pagdayeg kon ang usa maghisgot bahin sa Bibliya. Sa pagkakaron kining libroha mao ang labing kaylap nga nakatag sa tibuok nga kasaysayan. Ang Bibliya mao ang labing karaan, labing daghang nahubad, labing kinutlo, labing impluwensiyado, ug labing tinahod nga libro. Malagmit kini usab maoy labing kontrobersiyal. Ug dayag kini mao ang libro nga nakalahutay sa labing daghang pagdili, pagsunog, ug grabe nga pagsupak. Ikasubo, hinunoa, adunay usa ka pulong sa pagdayeg nga dili na ikapadapat sa Bibliya. Walay kalagmitan nga kini mao gihapon ang labing kaylap nga ginabasa nga libro sa kalibotan.
Samtang ang mga tawo adunay Bibliya diha sa balay, daghan ang mibati nga sila puliki kaayo sa paggugol ug panahon aron basahon kini. Ang pagbasa niadto mao ang popular nga pasatiempo. Karon, hinunoa, ang kadaghanan buot nga mogugol sa ilang libreng panahon sa pagtan-aw ug telebisyon o sa pagbuhat ug bisan unsa na lang. Kadtong kinsa mobasa gihapon sagad mopili sa gaan ug sayon nga basahon. Ang pagbasa sa Bibliya nagkinahanglan ug paminsar, ug ang kadaghanang tawo dili na maminsar ug lalom sa ilang ginabasa.
Bisan pa, ang Bibliya wala molahutay aron pasagdan lang diha sa atong estante sa mga libro. Adunay maayong mga katarongan kon nganong kini angayng basahon. Tagda ang pipila ka kamatuoran bahin niini.
Dili Ikatingalang Kini Nakalahutay!
Ang terminong “Bibliya” nagagikan sa Gregong pulong nga bi·bliʹa, nga nagkahulogang “gagmayng mga libro.” Kini magpahinumdom kanato nga gilangkoban ang Bibliya ug daghang libro—nga ang pipila dili kay gagmay kaayo! Kini gisulat latas sa yugtong napulog-unom ka gatos ka tuig. Samtang mga tawo ang mga magsusulat, sila gidasig sa mas hataas nga Tuboran. Usa ka magsusulat sa Bibliya miingon: “Ang propesiya wala sa bisan kanus-a gipadangat pinaagi sa kabubut-on sa tawo, hinunoa namulong ang mga tawo gikan sa Diyos samtang giagak sila sa balaang espiritu.” (2 Pedro 1:21) Kon unsa ka tinuod ang tagna sa Kasulatan mao usab ka tinuod ang nahibiling bahin sa Bibliya. Kining dinasig sa Diyos nga “gagmayng mga libro” puno sa hataas nga mga hunahuna ni Jehova nga Diyos. (Isaias 55:9) Dili ikatingala nga ang Bibliya nakalahutay sa dugay kaayong panahon!
Alang sa mga alagad sa Diyos, ang Bibliya mao kanunay ang labing hinungdanong libro. Sila miuyon kang apostol Pablo, nga usa mismo sa mga magsusulat sa Bibliya. Siya miingon: “Ang tibuok Kasulatan inspirado sa Diyos ug mapuslanon sa pagpanudlo.” (2 Timoteo 3:16) Sa ingon, ang Bibliya mao ang pasikaranan sa pagtuo sa mga Saksi ni Jehova karong adlawa. Kini ang nagatino sa ilang mga doktrina ug nagamando sa ilang paggawi. Sila kinasingkasing nga nagarekomendar sa tanan sa pagbasa sa pipila ka bahin sa Pulong sa Diyos kada adlaw ug palandongong mapabilhon ang mga kaundan niini.—Salmo 1:1-3.
Ang Batasan sa Pagbasa sa Bibliya
Ang batasan sa pagbasa sa Kasulatan nakahatag ug kaayohan sa panahong miagi. Ang mga hari sa Israel gisugo sa paghimog kaugalingong sinulat-sa-kamot nga kopya sa Kasugoan—nga karon usa na ka hinungdanong bahin sa Bibliya—ug basahon kini kada adlaw ingong usa ka pagpahinumdom kanunay bahin sa kabubut-on sa Diyos alang kanila. (Deuteronomio 17:18-20) Ang dili pagbuhat niini nagpahinabo sa pagkapukan sa daghang hari.
Ang bili sa pagtuon sa Kasulatan giilustrar diha sa kahimtang sa tigulang nga manalagnang si Daniel. Tungod sa iyang personal nga pagtuon sa mga bahin sa Bibliya nga mabatonan sa iyang adlaw, si Daniel, samtang nadistiyero sa Babilonya, nakahimo sa ‘pagsabot pinaagi sa mga libro’ nga ang hinungdanong tagna nga girekord ni Jeremias hapit nang matuman.—Daniel 9:2.
Sa dihang natawo si Jesus, ang “matarong ug tinamod” nga tawong si Simeon masaligong nagpaabot nga makita ang usa kinsa mahimong ang Kristo, o ang Mesiyas. Si Simeon gisaaran nga siya dili mamatay nga dili makita ang Kristo. Ang iyang lakbit nga paghisgot sa tagna ni Isaias sa dihang gikugos ang batang si Jesus nagpakita nga si Simeon maoy usa ka kugihang tigbasa sa mga libro sa Bibliya nga nasulat na sa iyang adlaw.—Lucas 2:25-32; Isaias 42:6.
Sa dihang nagsangyaw si Juan Bawtista, “ang mga tawo nagpaabot” sa Mesiyas. Unsay gipaila niini? Kini nagpasabot nga daghan taliwala sa mga Hudiyo ang pamilyar sa mga tagna bahin sa Mesiyas nga girekord diha sa Kasulatan. (Lucas 3:15) Kini makaiikag, kay niadtong mga adlawa ang mga basahon dili daling mabatonan. Ang mga kopya sa mga basahon sa Bibliya kinahanglang himoon nga may dakong pag-amping pinaagig kamot, ug sa ingon sila mahal ug lisod nga mabatonan. Sa unsang paagi ang mga tawo mahimong pamilyar sa mga kaundan niini?
Sa daghang kahimtang, kini maoy pinaagi sa pagbasa diha sa publiko. Pananglitan, si Moises nagsugo nga sa gitakda nga panahon, ang tibuok Kasugoan nga gihatag sa Diyos kinahanglang basahon ngadto sa nagkatigom nga mga Israelinhon. (Deuteronomio 31:10-13) Sa miabot ang unang siglo K.P., ang publikong pagbasa sa mga basahon sa Bibliya kaylap na. Ang tinun-ang si Santiago nag-ingon: “Sukad sa karaang kapanahonan si Moises aduna nay mga nagamantala kaniya sa siyudad ug siyudad, tungod kay siya kusog nga ginabasa diha sa mga sinagoga sa matag igpapahulay.”—Buhat 15:21.
Karong adlawa, sayon ra ang pagbaton ug personal nga kopya sa Bibliya. Labing menos ang pipila niining “gagmayng mga libro” mabatonan diha sa mga pinulongan sa 98 porsiento sa populasyon sa kalibotan. Busa ikasubo nga daghan ang dili interesado sa pagkat-on kon unsa ang giingon sa Bibliya alang kanila. Mahimong usa kini ka siyentipikanhon nga panahon, apan ang Pulong sa Diyos, ang Bibliya, mao gihapon ang labing “mapuslanon alang sa pagpanudlo.” Kini naghatag ug maayong tambag bahin sa maayong mga pamatasan, tawhanong mga relasyon, ug daghan pang ubang mga ulohan. Dugang pa, ginatanyag sa Bibliya ang bugtong seguradong paglaom alang sa usa ka malinawong umaabot.
Basaha Kini Kanunay
Busa gihimo kini sa mga Saksi ni Jehova nga usa ka dakong bahin sa ilang buluhaton sa pagdasig sa pagbasa kanunay sa Bibliya. Diha sa dagkong mga letra sa pabrika sa ilang punoang mga buhatan sa Brooklyn, New York, makita ang tambag: “READ GOD’S WORD THE HOLY BIBLE DAILY.” Milyon-milyong lumalabay ang nakakita niining mga pulonga, ug gilaoman nga daghan ang namati niini.
Diha sa kapin sa 73,000 ka kongregasyon sa mga Saksi ni Jehova sa tibuok kalibotan, ang mga sesyon sa Tunghaan sa Teokratikanhong Ministeryo ginahimo matag semana. Ang bahin sa pagtuon mao ang publikong pagbasa sa usa ka piniling bahin sa Bibliya. Ang tanang tumatambong usab adunay asaynment sa pagbasa sa pipila ka kapitulo sa Bibliya matag semana diha sa ilang pribadong pinuy-anan. Kadtong kinsa nagasunod niini nga eskedyul sa ngadto-ngadto makabasa sa tibuok nga Bibliya.
Kini nga kahikayan nahiuyon sa usa sa tun-anang mga libro nga gigamit niini nga tunghaan. Ang Giya sa Tunghaan sa Teokratikanhong Ministeryo nag-ingon: “Ang imong personal nga eskedyul angayng maglakip ug panahon alang sa pagbasa sa Bibliya mismo. Adunay dakong bili ang pagbasa niini mismo gikan sa hapin ngadto sa hapin. . . . Bisan pa, ang imong tumong sa pagbasa dili lamang ang pagkobre sa materyal, kondili ang pagkuha sa tibuok nga hunahuna niini uban ang tumong sa paghinumdom. Hatagig panahon ang pagpalandong kon unsa ang ginaingon niini.”
Ang ubang mga publikasyon nga gigama sa mga Saksi ni Jehova sa ingon usab nagdasig sa pagbasa sa Bibliya. Pananglitan, ang kauban niining magasina, ang Pagmata!, makita ang mosunod nga pagdasig alang sa mga batan-on: “Nabasa mo na ba . . . ang tibuok Bibliya? Oo, ang Bibliya maoy usa ka dakong libro, apan nganong dili bahin-bahinon ang pagbasa niini ngadto sa gagmayng mga bahin? . . . Ang ‘hamilig-hunahuna’ nga mga taga-Beria ‘maampingong miusisa sa mga Kasulatan sa adlaw-adlaw.’ (Buhat 17:11) Kon imong sundon ang adlaw-adlaw nga eskedyul sa pagbasa bisag 15 minutos lang sa usa ka adlaw . . . , imong matapos ang pagbasa sa Bibliya sulod sa usa ka tuig.” Oo, gibati sa mga Saksi ni Jehova nga ang modernong-adlaw nga mga Kristohanon angayng masinati pag-ayo sa Kasulatan, sama sa mga alagad sa Diyos sa karaang mga panahon.
Uban niini sa hunahuna, ang mga Saksi ni Jehova nagdasig sa modernong bersiyon sa pagbasa sa Bibliya diha sa publiko. Diha sa daghang pinulongan, ilang ginarekord ang mga pagbasa diha sa cassette nga nagkobre sa tibuok Bibliya. Alang sa daghan kini napamatud-an nga usa ka maayong tabang sa pagbuntog sa pipila ka kababagan sa pagbasa sa Bibliya. Ang uban mamati niini nga mga rekording samtang nagatrabaho sa balay, nagamaneho sa ilang sakyanan, o nagabuhat sa daghang ubang butang. Ang paglingkod ug hilom ug mamati sa pagbasa sa usa ka bahin sa Bibliya samtang hilom nga sundan diha sa imong kaugalingong kopya maoy usa ka makapalipayng kasinatian.
Kon wala ka pa magbasa ug Bibliya adlaw-adlaw, nganong dili nimo himoong batasan ang pagbuhat niana? Dili kini kinahanglang mogugol ug taas nga panahon adlaw-adlaw, apan ang mga kaayohan maoy dako unya, kay ang pagpadapat sa Kasulatan makaarang kanimo sa paglihok nga maalamon ug makatagamtam ug usa ka magantihong kinabuhi sa espirituwal. Ikaw usab magalihok uyon niining sugoa nga gihatag dugay na kanhi ngadto sa lider sa Israel nga si Josue: “Kining basahon sa kasugoan ayaw pag-ibulag gikan sa imong baba, ug kinahanglang basahon mo kinig hinay sa adlaw ug sa gabii, aron makamatngon ka sa pagbuhat sumala sa tanang nahisulat niini; kay unya ikaw magahimo sa imong dalan nga malamposon ug unya ikaw magalihok nga maalamon.”—Josue 1:8.
Gipadayag sa mga panid sa Bibliya ang mahigugmaong katuyoan ni Jehova alang sa masinugtanong katawhan. Ang tukmang kahibalo sa iyang dinasig nga Pulong mosangpot sa matuod nga kalipay ug paglaom sa kinabuhing walay kataposan sa Paraiso diha sa usa ka matahom bag-ong kalibotan sa walay kataposang mga panalangin. (Lucas 23:43; 2 Pedro 3:13) Hinaot imong pahimuslan ang imong kahigayonan sa pagbasa ug pagtuon sa Bibliya ug kab-ota kining kahibulongang kinabuhi.