Ang Bibliya—Ang Libro nga Basahon

ANG Bibliya mao ang labing kaylap nga pagkaapod-apod nga libro sa tibuok nga kasaysayan. Kini ang labing ginahubad ang labing ginakutlo, ug ang labing karaang libro. Oo, ug mao usab kini ang libro nga nakalahutay sa labing mapintas nga pagsupak. Apan, makasubo, tingali ang Bibliya dili mao ang kaylap nga pagkabasa nga libro sa kalibotan.

Apan ang Bibliya kinahanglang basahon. Tagda ang pipila ka kamatuoran bahin niini.

Nganong Basahon Kini sa Regular?

Ang atong Ingles nga pulong “Bible,” nagagikan sa Gregong terminong bi·bli’a, nga nagkahulogang “gamayng mga libro.” Kini makapahinumdom kanato nga ang Bibliya gilangkoban sa daghang mga libro—hinuon dili usab hilabihan ka “gamay” ang uban! Kini gisulat kapin sa usa ka yugto sa panahon nga kapin sa usa ka libo ka tuig. Bisag gisulat sa tawo, sila dinasig sa usa ka hataas nga Tuboran. Bisan karon, minilyon ang mouyon nga ang “tanang Kasulatan dinasig sa Diyos ug mapuslanon.” (2 Timoteo 3:16) Oo, kining “gamayng mga libro” napuno sa mga hunahuna ni Jehova nga Diyos mismo. (Isaias 55:6) Dili ikatingala nga nakalahutay kini sa hataas kaayong panahon!

Ang praktis sa pagbasa sa Kasulatan sa regular tinuod nga mapuslanon sa nangaging panahon. Ang mga hari sa Israel gisugo sa paghimog personal nga mga kopya sa Kasugoan, nga karon nahimong hinungdanong bahin sa Bibliya. Kinahanglang basahon nila kini kada adlaw, sa pagpahinumdom kanunay sa pag-alagad nga mapainubsanon ug sa pagsunod sa mga sugo sa Diyos. (Deuteronomio 17:18-20) Sa pagkatinuod, makakuha kitag sama niini nga mga kaayohan gikan sa regular nga pagbasa sa Bibliya.

Ug unsa ka hinungdanon sa paghatag pagtagad sa mga tagna sa Bibliya! Tungod sa personal nga pagtuon ni manalagnang Daniel sa Kasulatan, nakasabot siya nga ang hinungdanong tagna diha sa basahon ni Jeremias hapit nang matuman.—Daniel 9:1, 2; Jeremias 29:10.

Sa nagsangyaw si Juan Bawtista, “ang katawhan nagpaabot” sa Mesiyas. (Lucas 3:15) Kini nagsugyot nga daghan sa ilang taliwala sinati sa mga tagna bahin kang Kristo nga natala sa Kasulatan. Makapaikag kaayo kini, sanglit wala kaayoy mga libro nga mabatonan niadtong mga panahona. Ang mga kopya sa mga basahon sa Bibliya kinahanglang hagoan sa pagsulat pinaagig kamot. Busa sa unsang paagi nasinati ang katawhan kanila?

Diha sa kadaghanang bahin pinaagi sa pagbasa diha sa publiko. Ang tinun-ang Santiago miingon: “Sukad pa sa karaang kapanahonan si Moises aduna nay iyang tigmantala niini matag siyudad, sanglit ang iyang mga sinulat ginabasa man sulod sa sinagoga sa tanang adlawng igpapahulay.”—Buhat 15:21.

Karon masayon alang sa mga indibiduwal sa pagpanag-iyag personal nga kopya sa Bibliya, ug sa labing menos sa “gagmayng mga libro” nga mabatonan diha sa mga pinulongan sa 97 porsiento sa populasyon sa kalibotan. Busa makasubo nga ang kadaghanan dili interesado sa pagsusi kon unsay gipamulong sa Bibliya ngadto kanila.

Gidasig sa Pagbasa Niini

Gihimo sa mga Saksi ni Jehova kini ingong pangunang bahin sa ilang buluhaton sa regular sa pagdasig sa pagbasa sa Bibliya. Diha sa dagkong mga letra sa usa sa ilang imprintahan sa ilang mga hedkuwarter sa tibuok kalibotan sa Brooklyn, New York, makita ang pulong “READ GOD’S WORD THE HOLY BIBLE DAILY.”

Diha sa kapin sa 46 ka kongregasyon sa mga Saksi ni Jehova sa tibuok-yuta, adunay senemanang Teokratikong Ministeryo sa Tunghaan. Ang pagbasa sa publiko sa piniling bahin sa Bibliya sa matag semana maoy bahin sa maong kurso. Ang tanang tumatambong adunay asaynment sa senemanang pagbasa sa pipila ka kapitulo sa personal sa ilang balay, ug kadtong mosubay niini nga iskedyol sa ulahi makabasa sa enterong Bibliya.

Kaharmoniya kini sa “Theocratic Ministry School Guidebook,” ang usa sa mga tun-anang basahon nga gigamit niining kursoha. Kini nag-ingon: “Kinahanglang ilakip sa imong personal nga iskedyol ang panahon sa pagbasa sa Bibliya. Adunay dakong bili ang pagbasa niini sa sinugdanan ngadto sa kataposan. . . . Apan, ang imong tumong sa pagbasa kinahanglang dili lamang sa sinugdanan sa unang panid sa materyal, apan sa pagkuha sa tibuok panglantaw niini nga may intensiyon sa paghinumdom. Paggahin ug panahon sa pagpalandong kon unsay gipamulong niini.”—Panid 21.

Gibati sa mga Saksi ni Jehova nga ang modernong adlawng mga Kristohanon kinahanglang daghag kahibalo sa Bibliya. Ilang gituboy ang ika-20ng bersiyon sa pagbasa sa Bibliya sa publiko. Nakarekord sila niini nga pagbasa sa daghang “gamayng mga libro” sa Bibliya diha sa cassette tapes. Busa kadtong mibati nga dili sila makapanahon sa paglingkod ug sa pagbasa sa taas nga yugto karon makapaminaw sa mga rekording sa mga basahon sa Bibliya samtang magtrabaho sa balay, samtang magmaneho sa sakyanan, o sa pagbuhatbuhat sa daghan pang ubang mga butang. Sa pagkatinuod, ang mga teyp maoy maayong tabang usab kon kita molingkod sa pagbasa sa Bibliya. Makawili nga eksperyensiya ang pagpamati sa pagbasa sa Kasulatan samtang subayon usab kini diha sa imong kopya sa Bibliya.

Sa tanang paagi, pahimusli sa bug-os ang espirituwal nga giya nga gitagana diha sa tinuod Kristohanong mga publikasyon nga gitagana sa Diyos pinaagi sa “matinumanon ug maalamong ulipon.” (Mateo 24:45-47) Apan nganong dili nimo himoong batasan ang pagbasa sa Bibliya kada adlaw. Dako ang mga kaayohang makuha, sumala sa atong mamatikdan diha sa sugo nga gihatag dugay na kanhi ngadto sa lider sa mga Israelitas nga si Josue: “Ayaw pag-ibuglag kining basahon sa kasugoan gikan sa imong baba, ug kinahanglang basahon mo kini sa hilom sa adlaw ug sa gabii, aron himatngonan mo sa pagbuhat sumala sa tanan nga gisulat dinha; kay sa ingon niana ikaw magmauswagon sa imong panaw ug molihok kang maalamon.”—Josue 1:8.

[Hulagway sa panid 30]

Sa dugay nang katuigan, ang karatula sa imprintahan sa Watch Tower Society diha sa 117 Adams Street, Brooklyn, New York, nag-awhag sa mga lumalabay sa pagbasa sa Balaang Kasulatan