Kapitulo Kuwatro
Ang Usa nga Bahin Kaniya ang Tanang Manalagna Nagpamatuod
1. Unsay gipakita sa mga kamatuoran bahin sa una-tawhanong paglungtad ni Jesus bahin sa iyang relasyon kang Jehova?
“ANG Amahan nagmahal sa Anak ug nagpakita kaniya sa tanang butang nga iyang ginabuhat.” (Juan 5:20) Mainiton gayod ang relasyon nga gitagamtam sa Anak uban sa iyang Amahan, si Jehova! Ang kasuod sa maong relasyon nagsugod sa paglalang kaniya, sa di-maihap nga mga milenyo una pa sa iyang pagkahimugso ingong tawo. Siya mao ang bugtong Anak sa Diyos, ang bugtong usa nga direktang gilalang ni Jehova. Ang tanang ubang butang sa langit ug yuta gilalang pinaagi nianang gipangga pag-ayong panganay nga Anak. (Colosas 1:15, 16) Siya nagsilbi usab ingong Pulong sa Diyos, o Tigpamaba, ang Usa nga kaniya ang kabubut-on sa Diyos gibutyag ngadto sa uban. Kini siya, ang Anak nga gikahimut-an pag-ayo sa Diyos, nahimong tawo nga mao si Jesu-Kristo.—Proverbio 8:22-30; Juan 1:14, 18; 12:49, 50.
2. Sa unsang gilapdon ang mga tagna sa Bibliya nagtumong kang Jesus?
2 Sa wala pa ipanamkon ang panganay nga Anak sa Diyos sa milagrosong paagi ingong tawo, daghang inspiradong tagna ang gitala bahin kaniya. Si apostol Pedro nagpamatuod kang Cornelio: “Kaniya ang tanang manalagna nagpamatuod.” (Buhat 10:43) Ang papel ni Jesus gipakita sa Bibliya sa gilapdon nga ang usa ka manulonda miingon kang apostol Juan: “Ang pagpamatuod bahin kang Jesus maoy nagdasig sa pagpanagna.” (Pinadayag 19:10) Kadtong mga tagnaa tin-aw nga nag-ila kaniya ingong Mesiyas. Nagpunting kini sa nagkadaiyang mga papel nga iyang dulaon sa pagtuman sa mga katuyoan sa Diyos. Kining tanan angay gayod nga makapaikag kanato karon.
Kon Unsay Gibutyag sa mga Tagna
3. (a) Diha sa tagna sa Genesis 3:15, kinsay gihawasan sa halas, “sa babaye,” ug sa ‘binhi sa halas’? (b) Nganong ang ‘pagsamad sa ulo sa halas’ makapaikag kaayo sa mga alagad ni Jehova?
3 Ang una sa maong mga tagna gilitok human sa rebelyon sa Eden. Si Jehova miingon sa halas: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Genesis 3:15) Kanang tagnaa gitumong gayod kang Satanas, nga maoy gihawasan sa halas. Ang “babaye” mao ang maunongong langitnong organisasyon nga iya ni Jehova, nga samag iyang matinumanong asawa. Ang ‘binhi sa halas’ naglakip sa tanang manulonda ug mga tawo nga magpakita sa espiritu ni Satanas, silang mosupak kang Jehova ug sa Iyang katawhan. Ang ‘pagsamad sa ulo sa halas’ nagpasabot sa ultimang kalaglagan sa rebeldeng si Satanas, nga nagpasipala kang Jehova ug nagdalag tumang kagul-anan sa katawhan. Apan kinsa man ang pangunang bahin sa “binhi” nga maoy mosamad sa halas? Sulod sa kasiglohan, kana nagpabilin nga “sagradong tinago.”—Roma 16:20, 25, 26.
4. Sa unsang paagi ang linya sa kaliwat ni Jesus mitabang sa pag-ila kaniya ingong sinaad nga Binhi?
4 Human sa mga 2,000 ka tuig sa tawhanong kasaysayan, si Jehova nagtaganag dugang mga detalye. Gipakita niya nga ang Binhi motungha sa banay ni Abraham. (Genesis 22:15-18) Bisan pa niana, ang banay nga motultol sa Binhi nag-agad, dili sa unodnong kagikan, kondili sa pagpili sa Diyos. Bisan pa sa gugma ni Abraham sa iyang anak nga si Ismael, nga natawo kang Agar, si Jehova miingon: “Ang akong pakigsaad akong himoon uban kang Isaac, nga ipanganak ni Sara kanimo.” (Genesis 17:18-21) Sa ulahi kana nga pakigsaad gilig-on, dili ngadto sa panganay ni Isaac nga si Esau, kondili ngadto kang Jacob, nga gikan kaniya nahimugso ang 12 ka tribo sa Israel. (Genesis 28:10-14) Sa lakat sa panahon, gipakita nga ang Binhi mahimugso sa tribo ni Juda, sa banay ni David.—Genesis 49:10; 1 Cronicas 17:3, 4, 11-14.
5. Sa dihang gisugdan ni Jesus ang iyang yutan-ong ministeryo, unsay nagpadayag nga siya mao ang Mesiyas?
5 Unsang ubang mga ilhanan ang gihatag bahin sa ilhanan sa Binhi? Kapin sa 700 ka tuig nga abante, ang Bibliya nagngalan sa Betlehem ingong dapit sa pagkahimugso ingong tawo sa sinaad nga Binhi. Kini nagbutyag usab nga ang Binhi daan nang naglungtad “gikan sa mga adlaw sa panahong walay tino,” sukad sa panahon nga siya gilalang sa langit. (Miqueas 5:2) Ang eksaktong panahon sa iyang pagtungha sa yuta ingong Mesiyas gitagna usab, pinaagi sa manalagnang si Daniel. (Daniel 9:24-26) Ug sa dihang si Jesus gidihogan sa balaang espiritu, nga nahimo gayong Dinihogang Usa ni Jehova, ang tingog mismo sa Diyos gikan sa langit klarong nag-ila kaniya ingong Iyang Anak. (Mateo 3:16, 17) Ang Binhi gibutyag! Busa, si Felipe nakasulti uban ang hugot nga pagtuo: “Nakaplagan namo ang usa nga bahin kaniya si Moises, diha sa Balaod, ug ang mga Manalagna misulat, si Jesus.”—Juan 1:45.
6. (a) Sumala sa Lucas 24:27, unsay naamgohan sa mga sumusunod ni Jesus? (b) Kinsa ang pangunang bahin sa ‘binhi sa babaye,’ ug unsay ipasabot sa iyang pagsamad sa ulo sa halas?
6 Human niadto, ang mga sumusunod ni Jesus nakasabot nga sa literal kapid-ang matagnaong mga reperensiya bahin kaniya ang gihimong bahin sa inspiradong Kasulatan. (Lucas 24:27) Natin-aw pa gayod nga si Jesus mao diay ang pangunang bahin sa ‘binhi sa babaye,’ ang usa nga maoy magsamad sa ulo sa halas, nga magdugmok kang Satanas ngadto sa pagkahanaw. Pinaagi kang Jesus, ang tanang saad sa Diyos sa mga tawo, ang tanang butang nga dugay na natong gipangandoy pag-ayo, mamatuman.—2 Corinto 1:20.
7. Dugang pa sa ilhanan sa Usa nga gipunting diha sa mga tagna, unsa pa ang mapuslanong masayran?
7 Sa unsang paagi ang pagkahibalo niini makaapektar kanato? Ang Bibliya nagsugid bahin sa Etiopianhong eunuko nga nakabasa sa pipila niining mga tagnaa bahin sa umaabot nga Manunubos ug Mesiyas. Kay nalibog, iyang gisukna ang ebanghelisador nga si Felipe: “Kang kinsa nagsulti ang manalagna niini?” Apan sa dihang nakadawat siya sa tubag, wala isipa sa eunuko nga mao na kadto ang kataposan. Human mamati pag-ayo sa pagpatin-aw nga gihatag ni Felipe, ang tawo nakaamgo nga ang pagpabili alang niining natuman nga tagna nagkinahanglag aksiyon sa iyang bahin. Iyang nasabtan nga siya kinahanglang bawtismohan. (Buhat 8:32-38; Isaias 53:3-9) Mosanong ba kita sa samang paagi?
8. (a) Unsay gilandongan sa pagsulay ni Abraham sa paghalad kang Isaac? (b) Nganong gisultihan ni Jehova si Abraham nga ang tanang nasod magapanalangin sa ilang kaugalingon pinaagi sa Binhi, ug sa unsang paagi kini mapadapat kanato karon?
8 Tagda usab ang makapatandog nga asoy sa pagsulay ni Abraham sa paghalad kang Isaac, ang iyang bugtong anak kang Sara. (Genesis 22:1-18) Naglandong kana sa gibuhat ni Jehova—ang paghalad sa iyang bugtong Anak: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Nagpasalig kini kanato nga maingon nga si Jehova naghatag sa iyang bugtong Anak sa pagtuman sa Iyang katuyoan, Siya usab “malulotong maghatag kanato sa tanang ubang butang.” (Roma 8:32) Unsay gikinahanglan sa atong bahin? Segun sa natala sa Genesis 22:18, giingnan ni Jehova si Abraham nga ang tanang nasod magapanalangin sa ilang kaugalingon pinaagi sa Binhi, “tungod kay [si Abraham] namati sa tingog [sa Diyos].” Kita usab kinahanglang mamati kang Jehova ug sa iyang Anak: “Siya nga magpasundayag ug pagtuo sa Anak adunay kinabuhing walay kataposan; siya nga dili mosugot sa Anak dili makakita sa kinabuhi, apan ang kapungot sa Diyos magpabilin diha kaniya.”—Juan 3:36.
9. Kon kita mapasalamaton sa paglaom sa walay kataposang kinabuhi nga naposible tungod sa halad ni Jesus, unsay atong buhaton?
9 Kon kita mapasalamaton sa paglaom sa walay kataposang kinabuhi nga naposible tungod sa halad ni Jesus, buot gayod natong buhaton ang mga butang nga gisulti ni Jehova kanato pinaagi ni Jesus. Kini nalangkit pag-ayo sa atong gugma sa Diyos ug sa atong mga silingan. (Mateo 22:37-39) Gipakita ni Jesus nga ang atong gugma kang Jehova magpalihok nato sa pagtudlo sa uban “sa pagtuman sa tanang butang nga gisugo [ni Jesus kanato].” (Mateo 28:19, 20) Ug buot natong ipaambit kanang gugmaha ngadto sa mga isigkaalagad ni Jehova pinaagi sa regular nga ‘pagpakigtigom’ uban kanila. (Hebreohanon 10:25; Galacia 6:10) Sa pagpatalinghog sa Diyos ug sa iyang Anak, kita usab dili gayod maghunahuna nga sila mangayog kahingpitan gikan kanato. Ang Hebreohanon 4:15 nag-ingon nga si Jesus, ingon nga atong Hataas nga Saserdote, mahimong “mobati sa atong mga kaluyahon.” Pagkamakapahupay niana, ilabina sa dihang moduol kita sa Diyos sa pag-ampo pinaagi kang Kristo alang sa tabang sa pagbuntog sa atong mga kahuyangan!—Mateo 6:12.
Ipakita ang Pagtuo Kang Kristo
10. Nganong walay kaluwasan nga bulag kang Jesu-Kristo?
10 Human isaysay ngadto sa Hudiyohanong hataas nga korte sa Jerusalem nga ang tagna sa Bibliya natuman kang Jesus, si apostol Pedro kusganong nanghinapos: “Walay kaluwasan diha kang bisan kinsa pang lain, kay walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas.” (Buhat 4:12) Sanglit ang tanang kaliwat ni Adan mga makasasala, ang ilang kamatayon walay bili nga mahimong ipadapat ingong lukat alang sa tanang tawo. Apan si Jesus hingpit, ug ang iyang kinabuhi adunay haladnong bili. (Salmo 49:6-9; Hebreohanon 2:9) Gihalad niya sa Diyos ang usa ka lukat nga katumbas gayod sa bili sa hingpit nga kinabuhi nga giwala ni Adan. (1 Timoteo 2:5, 6) Kini nagbukas sa dalan aron atong mabatonan ang walay kataposang kinabuhi sa bag-ong kalibotan sa Diyos.
11. Isaysay kon sa unsang paagi ang halad ni Jesus makahatag kanatog dakong kaayohan.
11 Ang lukat nagbukas usab sa dalan aron madawat nato ang ubang mga kaayohan, bisan karon. Pananglitan, bisan pag kita mga makasasala, ang halad ni Jesus nagpaposible nga atong mabatonan ang hinlong tanlag tungod sa kapasayloan sa mga sala. Kini labaw pa kaayo kay sa nakab-ot sukad alang sa mga Israelinhon pinaagi sa mga halad nga hayop nga gibaod sa Moisesnong Balaod. (Buhat 13:38, 39; Hebreohanon 9:13, 14; 10:22) Bisan pa niana, ang pagbaton sa maong kapasayloan nagkinahanglan nga matinud-anon natong ilhon kon unsa ka dako ang atong panginahanglan sa halad ni Kristo: “Kon kita magapahayag: ‘Kita walay sala,’ kita nagpahisalaag sa atong kaugalingon ug wala kanato ang kamatuoran. Kon atong isugid ang atong mga sala, siya kasaligan ug matarong nga mopasaylo kanato sa atong mga sala ug mohinlo kanato gikan sa tanang pagkadili-matarong.”—1 Juan 1:8, 9.
12. Nganong ang bawtismo sa tubig maoy usa ka hinungdanong kinahanglanon sa pagbaton ug maayong tanlag atubangan sa Diyos?
12 Sa unsang paagi ang mga makasasala makapakitag pagtuo kang Kristo ug sa iyang halad? Sa dihang ang mga tawo sa unang siglo nahimong mga magtutuo, gipakita nila kana diha sa publiko. Sa unsang paagi? Sila nagpabawtismo. Ngano? Tungod kay si Jesus nagsugo nga ang tanan niyang mga tinun-an bawtismohan. (Mateo 28:19, 20; Buhat 8:12; 18:8) Ang usa ka tawo dili magpanuko kon ang iyang kasingkasing mapalihok gayod pinaagi sa mahigugmaong tagana nga gihimo ni Jehova pinaagi kang Jesus. Siya mohimog bisan unsang gikinahanglang pagpasibo sa iyang kinabuhi, magpahinungod sa iyang kaugalingon ngadto sa Diyos pinaagi sa pag-ampo, ug magpasimbolo sa iyang pahinungod pinaagi sa bawtismo sa tubig. Pinaagi sa iyang pagpakitag pagtuo niining paagiha siya naghimog “paghangyo sa Diyos alang sa usa ka maayong tanlag.”—1 Pedro 3:21.
13. Kon kita nakaamgo nga kita nakahimog sala, unsay angay natong buhaton bahin niana, ug ngano?
13 Siyempre, bisan human niini, ang makasasalang mga hiyas motumaw gihapon. Nan unsa na man? Si apostol Juan miingon: “Ako nagsulat kaninyo niining mga butanga aron kamo dili makasala. Apan, kon adunay makasala, kita adunay usa ka magtatabang ngadto sa Amahan, si Jesu-Kristo, usa nga matarong. Ug siya usa ka halad pasig-uli alang sa atong mga sala.” (1 Juan 2:1, 2) Nagpasabot ba kini nga bisag unsay atong buhaton, kon mag-ampo kita sa Diyos alang sa kapasayloan, kini pasayloon? Dili gayod. Ang yawi sa kapasayloan mao ang tim-os nga paghinulsol. Basin kinahanglanon usab ang tabang gikan sa mas gulang, mas eksperyensiyadong mga igsoon sa Kristohanong kongregasyon. Kinahanglang atong ilhon ang pagkasayop sa kon unsay nahimo ug mobatig dulot nga pagbasol niana aron makahimo kitag masibotong paningkamot sa paglikay nga kana masubli. (Buhat 3:19; Santiago 5:13-16) Kon buhaton nato kini, kita makaseguro sa tabang ni Jesus ug kita mahibalik sa pag-uyon ni Jehova.
14. (a) Ipatin-aw ang usa ka hinungdanong paagi nga niana ang halad ni Jesus nakahatag kanatog kaayohan. (b) Kon kita aduna gayoy pagtuo, unsay atong buhaton?
14 Ang halad ni Jesus nagbukas sa dalan sa kinabuhing dayon sa langit alang sa usa ka “gamayng panon,” ang ikaduhang bahin sa binhi nga gihisgotan sa Genesis 3:15. (Lucas 12:32; Galacia 3:26-29) Nagbukas usab kini sa dalan sa kinabuhing dayon sa paraisong yuta alang sa uban pang bilyonbilyong katawhan. (Salmo 37:29; Pinadayag 20:11, 12; 21:3, 4) Ang kinabuhing dayon mao “ang gasa nga ginahatag sa Diyos . . . pinaagi ni Kristo Jesus nga atong Ginoo.” (Roma 6:23; Efeso 2:8-10) Kon kita may pagtuo nianang gasaha ug pagpabili sa paagi nga niana kini nahimong posible, atong himoon nga kini madayag. Kay nakasabot kon unsa ka kahibulongan nga gigamit ni Jehova si Jesus sa pagpalampos sa Iyang katuyoan ug kon unsa ka bililhon nga kitang tanan mosunod pag-ayo sa mga lakang ni Jesus, atong himoon ang Kristohanong ministeryo nga usa sa labing hinungdanong mga kalihokan sa atong kinabuhi. Ang atong pagtuo madayag diha sa atong makapakombinsir nga pagsulti sa uban bahin niining kahibulongang gasa gikan sa Diyos.—Buhat 20:24.
15. Sa unsang paagi ang pagtuo kang Jesu-Kristo adunay makapahiusang epekto?
15 Pagkamaayo, pagkamakapahiusa ang epekto sa maong pagtuo! Pinaagi niana, kita masuod pa gayod kang Jehova, sa iyang Anak, ug sa usag usa sulod sa Kristohanong kongregasyon. (1 Juan 3:23, 24) Makapalipay kanato nga si Jehova malulotong naghatag sa iyang Anak “sa ngalan nga labaw sa tanang uban pa nga ngalan [gawas sa ngalan sa Diyos], aron nga sa ngalan ni Jesus moluhod ang tanang tuhod nilang anaa sa langit ug nilang anaa sa yuta ug nilang anaa ilalom sa yuta, ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.”—Filipos 2:9-11.
Repasong Panaghisgot
• Sa dihang mitungha ang Mesiyas, nganong siya tin-awng nailhan sa mga tawong tinuoray nga nagtuo sa Pulong sa Diyos?
• Unsa ang pipila ka butang nga angay natong buhaton aron ipakita ang atong pagpabili sa halad ni Jesus?
• Sa unsang mga paagi ang halad ni Jesus nakahatag na kanatog kaayohan? Sa unsang paagi makatabang kini kanato inig-ampo nato kang Jehova alang sa kapasayloan sa mga sala?
[Hulagway sa panid 36]
Giingnan ni Jesus ang iyang mga sumusunod nga angay nilang tudloan ang uban sa pagtuman sa mga sugo sa Diyos