Ang Binhi sa Serpente—Unsa ka Dako ang Pagkabutyag?

“Ibutang ko ang panag-away tali kanimo ug sa babaye ug tali sa imong binhi ug sa iyang binhi.”​—GENESIS 3:15.

1. (a) Nganong si Jehova mao ang malipayong Diyos? (b) Unsay iyang nahimo aron kita makaambit sa iyang kalipay?

SI Jehova maoy Diyos nga malipayon ug may angayng katarongan. Siya mao ang labing dako ug kinalabwan nga Tighatag ug maayong mga butang, ug walay arang makapakyas sa pagkatuman sa iyang mga katuyoan. (Isaias 55:10, 11; 1 Timoteo 1:11; Santiago 1:17) Gusto niya nga ang iyang mga alagad makaambit sa iyang kalipay, ug mihatag siya ug angayng mga hinungdan nga magmalipayon sila. Busa, sa usa sa labing masulob-ong mga gutlo sa kasaysayan sa tawo​—ang pagrebelde sa Eden​—iyang gihatag ang pasikaranan aron kita malaomong molantaw sa umaabot.​—Roma 8:19-21.

2. Sa nagpahayag ug paghukom sa mga rebelde sa Eden, sa unsang paagi si Jehova mihatag ug pasikaranan sa paglaom alang sa mga kaliwat ni Adan ug Eva?

² Usa sa espiritung mga anak ni Jehova, tungod sa pagsukol ug pagpasipala sa Diyos, bag-o pang naghimo sa iyang kaugalingon nga Satanas nga Yawa. Ang unang mga tawo, si Eva ug unya si Adan, nailalom sa iyang impluwensiya ug milapas sa tin-aw nga pagkapahayag nga balaod ni Jehova. Sa pagkamatarong sila gisilotan sa kamatayon. (Genesis 3:1-24) Bisan pa, sa dihang gipahayag ang paghukom niadtong mga rebelde, si Jehova mitaganag pasikaranan sa paglaom alang sa mga anak ni Adan ug Eva. Sa unsang paagi? Sumala sa natala sa Genesis 3:15, si Jehova miingon: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magasamad kanimo diha sa ulo ug ikaw magasamad kaniya diha sa tikod.” Ang maong tagna maoy usa ka yawi aron masabtan ang tibuok Bibliya ingon man ang nangagi ug presenteng mga panghitabo nga naglangkit sa kalibotan ug sa mga alagad ni Jehova.

Kon Unsay Kahulogan sa Tagna

3. Sumala sa gihisgotan sa Genesis 3:15, ilha (a) ang Serpente, (b) “ang babaye,” (c) ang “binhi” sa Serpente, (d) ang “binhi” sa babaye.

³ Aron maapresyar ang kahulogan niini, tagda ang lainlaing mga elemento sa tagna mismo. Ang usa nga gisultihan diha sa Genesis 3:15 mao ang Serpente​—dili ang ubos nga halas kondili ang usa nga migamit niini. (Pinadayag 12:9) “Ang babaye” dili mao si Eva kondili ang langitnong organisasyon ni Jehova, ang inahan sa iyang dinihogan-sa-espiritu nga mga alagad sa yuta. (Galacia 4:26) Ang “binhi” sa Serpente, mao ang binhi ni Satanas, ang iyang mga kaliwat​—ang mga demonyo ug mga tawo ingon man ang tawhanong mga organisasyon nga nagpadayag sa mga taras ni Satanas ug nga nagpakitag pagbatok sa “binhi” sa babaye. (Juan 15:19; 17:15) Ang “binhi” sa babaye sa panguna mao si Jesu-Kristo, kinsa gidihogan sa balaang espiritu sa 29 K.P. Ang 144,000, kinsa ‘gipakatawo pag-usab . . . gikan sa tubig ug espiritu’ ug maoy mga manununod sa langitnong Gingharian uban ni Kristo, maoy kaabag nga bahin sa maong binhi sa saad. Sila nagsugod pagkanadugang sa binhi sa babaye sukad sa Pentekostes 33 K.P. paunahan.​—Juan 3:3, 5; Galacia 3:16, 29.

4. Unsay kalangkitan sa Genesis 3:15 sa pagkahimong paraiso sa yuta, nga punog mga tawo nga wala nay sala ug kamatayon?

⁴ Ang literal nga serpente sa Eden gigamit ingong tigpamaba sa usa kansang panglansis mitultol sa pagkawala sa Paraiso sa katawhan. Ang Genesis 3:15 mipunting sa panahon nga dugmokon ang usa nga maoy nagmaneobra sa serpente. Unya maablihan na usab ang dalan aron ang tawhanong mga alagad sa Diyos magapuyo sa Paraiso, nga wala nay sala ug kamatayon. Pagkamalipayon unya kanang panahona!​—Pinadayag 20:1-3; 21:1-5.

5. Unsang mga taras ang nagpaila sa espirituwal nga mga kaliwat sa Yawa?

⁵ Human sa pagrebelde sa Eden, ang mga indibiduwal ug mga organisasyon misugod pagpatim-aw nga nagpadayag sa mga taras nga sama sa iya ni Satanas nga Yawa​—pagrebelde, pagbakak, pagpasipala, ug pagbuno, inubanan sa pagsupak sa kabubut-on ni Jehova ug niadtong nagsimba kang Jehova. Kanang mga tarasa nagpaila sa mga kaliwat, sa espirituwal nga mga anak, sa Yawa. Nahiapil kanila si Cain, kinsa mipatay kang Abel sa dihang si Jehova miuyon sa pagsimba ni Abel inay sa kang Cain. (1 Juan 3:10-12) Si Nimrod maoy tawo kansang ngalan mismo nagpaila nga siya usa ka rebelde ug nahimong gamhanang mangangayam ug magmamando nga supak kang Jehova. (Genesis 10:9) Dugang pa dihay sunodsunod nga karaang mga gingharian, apil ang Babilonya, uban sa ilang gipaluyohan-estado nga mga relihiyon nga gitukod pinasukad sa kabakakan, ug kini sila mapintasong nagdaogdaog sa mga magsisimba ni Jehova.​—Jeremias 50:29.

“Panag-away Tali Kanimo ug sa Babaye”

6. Sa unsang mga paagi si Satanas nagpakitag pagkamakig-awayon sa babaye ni Jehova?

⁶ Sulod nianang tanang panahon, dihay panag-away tali sa Serpente ug sa babaye ni Jehova, tali ni Satanas nga Yawa ug sa langitnong organisasyon sa maunongong espiritung mga linalang ni Jehova. Ang pagkamakig-awayon ni Satanas gipadayag samtang iyang gitamay si Jehova ug gitinguha nga bungkagon ang langitnong organisasyon ni Jehova, nga gibuyo ang mga manulonda nga mobiya sa ilang tukmang dapit nga pinuy-anan. (Proverbio 27:11; Judas 6) Kana napadayag sa dihang si Satanas migamit sa iyang mga demonyo aron sulayan pagbabag ang manulondang mga mensahero nga gisugo ni Jehova. (Daniel 10:13, 14, 20, 21) Kana ilabinang nadayag niining ika-20ng siglo sa dihang si Satanas misulay paglaglag sa Mesiyanikong Gingharian sa pagkatawo niini.​—Pinadayag 12:1-4.

7. Nganong ang maunongong mga manulonda ni Jehova mibatig pagkamakig-awayon sa simbolikong Serpente, apan unsang pagpugong ang ilang gipakita?

⁷ May pagkamakig-awayon usab sa bahin sa babaye ni Jehova, ang pundok sa maunongong mga manulonda, batok sa simbolikong Serpente. Gipasipad-an ni Satanas ang maayong ngalan sa Diyos; giduhaduhaan usab niya ang integridad sa matag usa sa intelihenteng mga linalang sa Diyos, lakip sa tanang manulonda, ug siya aktibong naningkamot nga pukanon ang ilang pagkamaunongon sa Diyos. (Pinadayag 12:4a) Ang maunongong mga manulonda, mga kerubin, ug mga serapin sa tino mobati gayod ug kasilag sa usa nga naghimo sa iyang kaugalingon nga Yawa ug Satanas. Bisan pa niana, gipaabot nila nga si Jehova ang magsulbad sa mga butang sa iyang kaugalingong panahon ug paagi.​—Itandi ang Judas 9.

Pagpakigbatok sa Binhi sa Babaye sa Diyos

8. Kang kinsa si Satanas nagmabinantayon?

⁸ Kasamtangan, si Satanas nagmabinantayon kaayo aron mailhan ang gitagna nga Binhi sa babaye, ang usa nga sumala pa ni Jehova maoy magasamad sa Serpente diha sa ulo. Sa dihang ang manulonda gikan sa langit nagpahibalo nga si Jesus, kinsa natawo sa Betlehem, mao ang “Manluluwas, kinsa maoy Kristo nga Ginoo,” kadto maoy lig-ong pamatuod nga siya ang mahimong gitagna nga Binhi sa babaye.​—Lucas 2:10, 11.

9. Sa pagkatawo ni Jesus, sa unsang paagi si Satanas nagpadayag ug daotang pagkamakig-awayon?

⁹ Ang mapintasong pagkamakig-awayon ni Satanas sa wala madugay nadayag sa dihang gidani niya ang paganong mga astrologo sa usa ka tinong tahas nga nagdala kanila una kang Haring Herodes sa Jerusalem ug dayon sa balay sa Betlehem diin ilang nakaplagan ang batang lalaki nga si Jesus ug ang iyang inahan, si Maria. Wala madugay human niadto gimando ni Haring Herodes nga patyon ang tanang batang lalaki nga gikan sa duha ka tuig ang edad ug ubos pa, sa sulod ug palibot sa Betlehem. Niini, si Herodes nagpadayag ug satanasnong pagdumot alang sa Binhi. Si Herodes lagmit nahibalo pag-ayo nga siya nagsulay sa pagpatay sa Mesiyas. (Mateo 2:1-6, 16) Ang kasaysayan nagpamatuod nga si Haring Herodes maoy walay-konsensiya, malansison, ug matinguhaon sa pagpatay​—usa gayod sa mga binhi sa Serpente.

10. (a) Human sa bawtismo ni Jesus, giunsa ni Satanas sa personal pagpaningkamot nga pakyason ang katuyoan ni Jehova bahin sa sinaad nga Binhi? (b) Giunsa paggamit ni Satanas ang Hudiyong relihiyosong mga pangulo sa pagpangagpas sa iyang mga tumong?

¹⁰ Human madihogi si Jesus sa balaang espiritu sa 29 K.P. ug si Jehova namulong gikan sa langit nga nagpaila kang Jesus ingong iyang Anak, si Satanas balikbalik nga misulay sa pagpahinabo nga si Jesus madaog sa tentasyon, sa ingon nagtinguha sa pagpakyas sa katuyoan ni Jehova mahitungod sa iyang Anak. (Mateo 4:1-10) Kay napakyas man niana, miliso siya nga mogamit sa dugang pa ug tawhanong mga ahente aron makab-ot ang iyang mga tumong. Lakip niadtong gigamit aron sulayan ang pagpakaulaw kang Jesus mao ang salingkapawng mga pangulo sa relihiyon. Sila migamit sa kabakakan ug pagpasipala, ang matang sa mga paagi nga gigamit ni Satanas mismo. Sa dihang giingnan ni Jesus ang usa ka paralitiko, “Pagbatog kaisog, . . . ang imong mga sala gipasaylo na,” ang mga eskriba, nga wala magpaabot aron makita kon tinuod bang naayo na ang tawo, mihukom nga si Jesus maoy mapasipalahon. (Mateo 9:2-7) Sa dihang giayo ni Jesus ang mga tawo sa adlaw nga Igpapahulay, ang mga Pariseo mibadlong kaniya ingong malinapason sa balaod sa Igpapahulay ug nagsabotsabot sa pagpatay kaniya. (Mateo 12:9-14; Juan 5:1-18) Sa dihang si Jesus nagpagulag mga demonyo, ang mga Pariseo miakusar nga siya nakig-anib kang “Beelzebub, ang magmamando sa mga demonyo.” (Mateo 12:22-24) Human banhawa si Lazaro gikan sa mga patay, daghang tawo ang mituo kang Jesus, apan ang pangulong mga saserdote ug mga Pariseo nagsabotsabot sa pagpatay kaniya.​—Juan 11:47-53.

11. Tulo ka adlaw una mamatay si Jesus, kinsay iyang gipaila ingong bahin sa binhi sa Serpente, ug ngano?

¹¹ Sa Nisan 11, 33 K.P., si Jesus, bisan tuod nasayod kaayo sa ilang giplano, sa walay-kahadlok misulod sa dapit sa templo sa Jerusalem ug didto sa publiko mipahayag ug hukom kanila. Ingong usa ka pundok, ang mga eskriba ug mga Pariseo nagpasundayag nga way-kausaban kon unsang matanga sila sa mga tawo; mao nga si Jesus miingon: “Alaot kamo, mga eskriba ug mga Fariseo, mga salingkapaw! tungod kay kamo nagatak-op sa gingharian sa mga langit atubangan sa mga tawo; kay kamo mismo wala magasulod, ni kamo nagatugot niadtong anaa sa agianan pasulod nga makasulod.” Pintok nga gipahayag ni Jesus nga sila maoy bahin sa binhi sa Serpente, nga miingon: “Mga halas, kaliwat sa mga bitin, unsaon ba ninyo pagkalagiw gikan sa paghukom sa Gehenna?” (Mateo 23:13, 33) Ang iyang mga pulong nagpahinumdom sa tagna sa Genesis 3:15.

12, 13. (a) Sa unsang paagi ang pangulong mga saserdote ug mga eskriba mihatag ug dugang ebidensiya bahin sa kon kinsa ang ilang espirituwal nga amahan? (b) Kinsay miduyog kanila? (c) Ingong katumanan sa Genesis 3:15, sa unsang paagi ang Binhi sa babaye nasamaran diha sa tikod?

¹² Sa pagkabati sa mga pulong ni Jesus, sila ba nagbasol, mao nga sila nagpakiluoy sa Diyos? Naghinulsol ba sila sa ilang tumang-pagkadaotan? Wala! Ang Marcos 14:1 nagtaho nga sa sunod gayong adlaw, sa usa ka tigom sa nataran sa hataas nga saserdote, “ang pangulong mga saserdote ug ang mga eskriba nangitag paagi sa pagdakop [kang Jesus] pinaagig malansisong laraw ug patyon siya.” Nagpadayon sila sa pagpadayag sa matinguhaon-sa-pagpatay nga espiritu ni Satanas, si kinsa sayosayo nga gibatbat ni Jesus ingong mamumuno. (Juan 8:44) Sa wala madugay sila gikuyogan ni Judas Iskariote, kinsa gidani ni Satanas nga mahimong apostata. Si Judas mibiya sa walay-sala nga Binhi sa babaye sa Diyos ug mianib sa binhi sa Serpente.

¹³ Sayo sa buntag sa Nisan 14, ang mga membro sa Hudiyonhong relihiyosong hukmanan nagdala kang Jesus ingong binilanggo ngadto sa Romanong gobernador. Niadtong tungora ang pangulong mga saserdote mao ang nanguna sa pagsinggit nga siya ipalansang. Sa nangutana si Pilato, “Ilansang ko ba ang inyong hari?” ang pangulong mga saserdote mao ang mitubag, “Wala kamiy hari gawas kang Cesar.” (Juan 19:6, 15) Sa pagkatinuod, gipamatud-an nila sa tanang paagi nga sila bahin sa binhi sa Serpente. Apan sila wala gayod mag-inusara. Ang dinasig nga talaan sa Mateo 27:24, 25 naghatag niining tahoa: “Mikuha si Pilato ug tubig ug nanghunaw sa iyang mga kamot atubangan sa panon sa katawhan.” Niana ang tanang katawhan miingon: “Maari kanamo ug sa among mga anak ang iyang dugo.” Sa ingon daghang Hudiyo sa maong kaliwatan nagpaila nga sila bahin sa binhi sa Serpente. Sa wala pa matapos kadtong adlawa, si Jesus namatay. Pinaagi sa paggamit sa iyang makita nga binhi, si Satanas nakasamad sa Binhi sa babaye sa Diyos diha sa tikod.

14. Nganong ang pagsamad sa tikod sa Binhi sa babaye wala magkahulogan sa kadaogan alang kang Satanas?

¹⁴ Nakadaog ba si Satanas? Wala gayod! Si Jesu-Kristo nakabuntog sa kalibotan ug nagmadaogon batok sa magmamando niini. (Juan 14:30, 31; 16:33) Nahuptan niya ang iyang pagkamaunongon kang Jehova hangtod gayod sa kamatayon. Ang iyang kamatayon ingong hingpit nga tawo mitagana sa bili sa lukat nga gikinahanglan aron pagtubos sa katungod sa kinabuhi nga giwala ni Adan. Busa iyang gibuksan ang dalan ngadto sa kinabuhing dayon alang niadtong motuo sa maong tagana ug magmasinugtanon sa mga sugo sa Diyos. (Mateo 20:28; Juan 3:16) Gibanhaw ni Jehova si Jesus gikan sa mga patay ngadto sa dili-mamatay nga kinabuhi sa langit. Sa nahaigong panahon ni Jehova, dugmokon ni Jesus si Satanas nga dili na siya maglungtad. Sa Genesis 22:16-18, gitagna nga si Jehova maghatag ug pabor sa tanang pamilya sa yuta nga mohimo sa gikinahanglang lihok aron panalanginan ang ilang kaugalingon pinaagi nianang maunongong Binhi.

15. (a) Human sa kamatayon ni Jesus, sa unsang paagi ang iyang mga apostol nagpadayon sa pagyagyag sa binhi sa Serpente? (b) Unsang dugang nga pagkamakig-awayon ang gipadayag sa binhi sa Serpente hangtod sa atong adlaw?

¹⁵ Human sa kamatayon ni Jesus, ang dinihogan-sa-espiritung mga Kristohanon nagpadayon sa pagyagyag sa binhi sa Serpente, sumala sa gihimo sa ilang Ginoo. Nga gidasig sa balaang espiritu, si apostol Pablo nagpasidaan batok sa “tawo sa kalapasan” kansang presensiya mamahimong “sumala sa pagpalihok ni Satanas.” (2 Tesalonica 2:3-10) Kining tiningob nga “tawo” napamatud-ang mao ang klero sa Kakristiyanohan. Ang binhi sa Serpente, sa baylo, mabangisong naglutos sa mga sumusunod ni Jesu-Kristo. Sa tagna nga natala sa Pinadayag 12:17, si apostol Juan nagtagna nga si Satanas magpadayon sa pagpakiggubat batok sa nahibilin sa binhi sa babaye sa Diyos hangtod sa atong adlaw. Kana sa tukma mao ang nahitabo. Sa daghang kayutaan, ang mga Saksi ni Jehova gidili, giatake sa magubotong panon, gipriso, o gibalhog ngadto sa mga kampo konsentrasyon tungod sa ilang malig-ong pagbarog dapig sa Gingharian sa Diyos ug sa iyang matarong nga mga dalan.

Modernong-Adlawng Pagyagyag sa Binhi sa Serpente

16. Sa modernong kapanahonan, kinsay nayagyag ingong bahin sa binhi sa Serpente, ug sa unsang paagi?

¹⁶ Sa pagsundog kang Jesu-Kristo, ang matuod nga mga Kristohanon wala mohunong sa ilang walay-kahadlok nga pagyagyag sa Serpente ug sa iyang binhi. Sa 1917 ang mga Estudyante sa Bibliya, sumala sa pagkaila niadto sa mga Saksi ni Jehova, nagpatik sa librong The Finished Mystery, diin ilang giyagyag ang pagkasalingkapaw sa klero sa Kakristiyanohan. Kadto gisundan, sa 1924, sa usa ka pinatik nga resolusyon nga nag-ulohang Ecclesiastics Indicted. Kalim-an ka milyong kopya ang giapod-apod sa tibuok kalibotan. Niadtong 1937, si J. F. Rutherford, ang presidente niadto sa Watch Tower Society, mipahayag ug kusganong mga pagyagyag sa binhi ni Satanas diha sa mga diskursong nag-ulohang “Nayagyag” ug “Relihiyon ug Kristiyanidad.” Sa misunod nga tuig, samtang namati ang mga mamiminaw sa 50 ka kombensiyon diha sa lainlaing mga nasod, iyang gipahayag ang diskursong “Atubanga ang mga Kamatuoran” pinaagig radyo-telepono gikan sa London, Inglaterra. Usa ka bulan sa ulahi, ang kaylap nga sistema sa radyo sa Tinipong Bansa nagsibya sa pakigpulong nga “Pasismo o Kagawasan.” Kini sila gibuligan sa kusganong mga pagyagyag diha sa mga libro nga sama sa Enemies ug Religion ug diha usab sa pulyetong Nahiukban. Nahiuyon sa kon unsay napatik sukad sa katuigang 1920, ang librong Pinadayag​—Hingpit nga Sangkoanan Niini Haduol Na!,a nga karon gipatik sa 65 ka pinulongan, nagpaila sa korap nga politikanhong mga magmamando ug sa dalo, way-prinsipyong komersiyanteg kontrabando ingong lakip sa pangunang mga sakop sa makitang binhi sa Serpente. Sa dihang batasanon sa politikanhong mga pangulo ang paggamit ug kabakakan aron lansisan ang ilang mga ginsakpan, pagpakitag kawalay-tahod sa pagkasagrado sa dugo, ug pagdaogdaog sa mga alagad ni Jehova (sa ingon nagapakitag pagdumot alang sa binhi sa babaye sa Diyos), sila tinong nagpaila nga sila bahin sa binhi sa Serpente. Kana tinuod usab sa mga komersiyanteg kontrabando si kinsa, nga dili samokon sa konsensiya, mamakak aron makaganansiya ug manggama o mamaligyag mga produkto nga nasayran nga makahatag ug sakit.

17. Unsang kahigayonan ang abli pa alang sa prominenteng mga indibiduwal nga mahimong mogula sa sistema sa kalibotan?

¹⁷ Dili matag indibiduwal nga nahugawan sa kalibotanong relihiyon, politika, o komersiyo ang isipon sa kataposan ingong bahin sa binhi sa Serpente. Ang pipila niining mga lalakiha ug mga babayhana modayeg sa mga Saksi ni Jehova. Ilang gigamit ang ilang impluwensiya aron tabangan sila ug ngadtongadto midawat sa matuod nga pagsimba. (Itandi ang Buhat 13:7, 12; 17:32-34.) Nianang tanang tawo, kini nga hangyo gipaabot: “Karon, Oh mga hari, gamita ang salabotan; itugot nga kamo matul-id, Oh mga maghuhukom sa yuta. Alagara si Jehova uban ang kahadlok ug magmalipayon uban ang pagkurog. Haloki ang anak, aron Siya dili masuko ug kamo dili mangahanaw gikan sa dalan, kay ang iyang kasuko daling mosilaob. Malipayon ang tanan nga nagapasalipod kaniya.” (Salmo 2:10-12) Sa pagkatinuod, hinungdanon nga ang tanan nga matinguhaon sa pabor ni Jehova molihok na karon, sa dili pa sirhan sa langitnong Maghuhukom ang ganghaan sa kahigayonan!

18. Bisan tuod dili bahin sa binhi sa babaye, kinsa pay mga magsisimba ni Jehova?

¹⁸ Kadto lamang nga maglangkob sa langitnong Gingharian maoy bahin sa binhi sa babaye. Kini sila diyutay ra. (Pinadayag 7:4, 9) Bisan pa niana, adunay usa ka dakong panon sa uban, oo, minilyon kanila, kinsa ingong mga magsisimba ni Jehova nagapaabot sa kinabuhing dayon sa usa ka paraisong yuta. Pinaagi sa pulong ug sa buhat, sila nag-ingon ngadto sa mga dinihogan ni Jehova: “Mouban kami kaninyo, kay kami nakadungog nga ang Diyos nagauban kaninyo.”​—Zacarias 8:23.

19. (a) Unsang pagpili ang kinahanglang himoon sa tanang tawo? (b) Kang kinsa ilabina ang masibotong paghangyo gihimo sa paglihok nga maalamon samtang aduna pay kahigayonan?

¹⁹ Karon na ang panahon nga kinahanglang mopili ang tanang tawo. Buot ba nilang simbahon si Jehova ug ituboy ang iyang pagkasoberano, o itugot ba nila nga si Satanas maoy ilang magmamando pinaagi sa pagbuhat sa mga butang nga makapahimuot kaniya? Mga lima ka milyong tawo gikan sa tanang nasod ang nagbarog na dapig sa kiliran ni Jehova nga nakig-uban sa mga nahibilin sa binhi sa babaye, ang mga manununod sa Gingharian. Walo ka milyon pa nga uban ang nagpakitag interes sa pagtuon sa Bibliya uban nila o sa pagtambong sa ilang mga tigom. Ang mga Saksi ni Jehova moingon kanilang tanan: Abli pa ang ganghaan sa kahigayonan. Sa walay-pagkabalhin barog dapig sa kiliran ni Jehova. Ilha si Kristo Jesus ingong ang sinaad nga Binhi. Malipayong makig-uban sa makitang organisasyon ni Jehova. Hinaot nga ikaw makaambit sa tanang panalangin nga Iyang ihatag pinaagi sa pagmando sa Hari, si Kristo Jesus.

[Footnote]

Nahinumdom Ka Ba?

◻ Kinsa ang Serpente sumala sa gihisgotan sa Genesis 315? Ug kinsa ang babaye?

◻ Unsang mga taras ang nagtimaan sa binhi sa Serpente?

◻ Giunsa pagyagyag ni Jesus ang binhi sa Serpente?

◻ Kinsa ang nayagyag ingong bahin sa binhi sa Serpente sa modernong kapanahonan?

◻ Unsang dinaliang lihok ang gikinahanglan aron malikayan nga mailhang bahin sa binhi sa Serpente?

[Hulagway sa panid 10]

Giyagyag ni Jesus ang salingkapawng relihiyosong mga pangulo ingong bahin sa binhi sa Serpente