Kapitulo Katorse
Sa Unsang Paagi Gitultolan ni Jehova ang Iyang Organisasyon?
1. Unsang impormasyon bahin sa organisasyon ni Jehova ang gibutyag sa Bibliya, ug nganong kini hinungdanon kanato?
ADUNA bay organisasyon ang Diyos? Ang dinasig nga Kasulatan nagsugid kanato nga aduna. Sa iyang Pulong, siya naghatag kanatog mga pasiplat sa kahibulongan nga langitnong bahin sa maong organisasyon. (Ezequiel 1:1, 4-14; Daniel 7:9, 10, 13, 14) Bisan tuod dili nato makita kining dili-makitang bahin, kini nag-apektar ug dako sa tinuod nga mga magsisimba karon. (2 Hari 6:15-17) Ang organisasyon ni Jehova adunay makita nga bahin usab, dinhi sa yuta. Ang Bibliya nagtabang kanato sa pagsabot kon unsa kini ug kon sa unsang paagi gitultolan kini ni Jehova.
Pag-ila sa Makita nga Bahin
2. Unsa ang bag-ong kongregasyon nga gimugna sa Diyos?
2 Sulod sa 1,545 ka tuig ang nasod sa Israel mao ang kongregasyon sa Diyos. (Buhat 7:38) Apan ang Israel napakyas pagtuman sa mga balaod sa Diyos ug nagsalikway sa iyang kaugalingong Anak. Ingong resulta, gisalikway ni Jehova ang maong kongregasyon ug gibiyaan kini. Giingnan ni Jesus ang mga Hudiyo: “Tan-awa! Ang inyong balay mabiniyaan kaninyo.” (Mateo 23:38) Dayon gimugna sa Diyos ang usa ka bag-ong kongregasyon, nga uban niini siya naghimog bag-ong pakigsaad. Kining maong kongregasyon gilangkoban ug 144,000 ka indibiduwal nga gipili sa Diyos aron mahiusa uban sa iyang Anak sa langit.—Pinadayag 14:1-4.
3. Unsay nahitabo sa Pentekostes 33 K.P. isip tin-awng pamatuod nga ang Diyos naggamit niadto ug usa ka bag-ong kongregasyon?
3 Ang unang mga sakop nianang maong bag-ong kongregasyon gidihogan sa balaang espiritu ni Jehova sa Pentekostes 33 K.P. Maylabot sa maong talagsaong hitabo, atong mabasa: “Karon samtang ang adlaw sa pista sa Pentekostes nagapadayon, silang tanan nagkatigom sa samang dapit, ug sa kalit may nahitabong kabanha gikan sa langit sama gayod nianang nagahuros nga makusog nga hangin, ug kini mipuno sa tibuok nga balay diin sila nanglingkod. Ug ang mga dila nga maorag kalayo mipakita kanila ug naapod-apod, ug nagtinagsaay sa pagpatong sa matag usa kanila, ug silang tanan napuno sa balaang espiritu.” (Buhat 2:1-4) Sa ingon ang espiritu sa Diyos naghatag ug tin-awng pamatuod nga kadto mao na ang grupo sa mga tawo nga gamiton sa Diyos sa pagtuman sa iyang katuyoan ilalom sa pagtultol ni Jesu-Kristo sa langit.
4. Kinsa karon ang naglangkob sa makitang organisasyon ni Jehova?
4 Karon, ang nahibilin na lamang sa 144,000 ang ania sa yuta. Apan isip katumanan sa tagna sa Bibliya, ang “usa ka dakong panon” sa “ubang mga karnero,” milyonmilyon kanila, gipauban sa dinihogang nanghibilin. Si Jesus, ang Maayong Magbalantay, naghiusa niining ubang mga karnero uban sa nanghibilin aron sila mahimong usa lamang ka panon ilalom kaniya ingon nga ilang usa ka Magbalantay. (Pinadayag 7:9; Juan 10:11, 16) Silang tanan naglangkob sa usa ka nahiusang kongregasyon, ang makitang organisasyon ni Jehova.
Teokratikanhon nga Gambalay
5. Kinsay nagtultol sa organisasyon sa Diyos, ug sa unsang paagi?
5 Ang Kasulatanhong ekspresyon nga “ang kongregasyon sa buhi nga Diyos” tin-aw nga nagpaila kon kinsay nagatultol niini. Ang organisasyon maoy teokratikanhon, o gimandoan sa Diyos. Si Jehova ang nagtultol sa iyang katawhan pinaagi ni Jesus, ang usa nga Iyang gitudlo nga mahimong dili-makitang Ulo sa kongregasyon, ug pinaagi sa Iyang dinasig nga Pulong, ang Bibliya.—1 Timoteo 3:14, 15; Efeso 1:22, 23; 2 Timoteo 3:16, 17.
6. (a) Sa unsang paagi ang langitnong pagtultol sa kongregasyon nadayag sa unang siglo? (b) Unsay nagpakita nga si Jesus mao gihapon ang Ulo sa kongregasyon?
6 Ang maong pagtultol dayag kaayo panahon sa Pentekostes. (Buhat 2:14-18, 32, 33) Nadayag kadto sa dihang ang manulonda ni Jehova nagsugo sa pagpakaylap sa maayong balita ngadto sa Aprika, sa dihang ang tingog ni Jesus naghatag ug mga pahimangno panahon sa pagkakabig ni Saulo sa Tarso, ug sa dihang gisugdan ni Pedro ang buluhatong pagsangyaw taliwala sa mga Hentil. (Buhat 8:26, 27; 9:3-7; 10:9-16, 19-22) Hinuon, sa kadugayan wala nay mga tingog nga nadungog gikan sa langit, wala nay nakitang mga manulonda, wala nay gihatag nga milagrosong mga gasa sa espiritu. Apan, si Jesus nagsaad: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:20; 1 Corinto 13:8) Karon, ang mga Saksi ni Jehova nag-ila sa pagtultol ni Jesus. Kon wala kana, imposible gayod ang pagwali sa mensahe sa Gingharian atubangan sa mapintas nga pagsupak.
7. (a) Kinsa ang naglangkob sa “matinumanon ug maalamong ulipon,” ug ngano? (b) Unsang asaynment ang gihatag ngadto sa “ulipon”?
7 Sa dayon na siyang mamatay, gisuginlan ni Jesus ang iyang mga tinun-an bahin sa “matinumanon ug maalamong ulipon” diin siya ingon nga Agalon magtugyan ug espesyal nga responsabilidad. Ang maong “ulipon” presente gayod sa dihang ang Ginoo mibalik sa langit ug nagpadayon sa pagkugi panahon sa dili-makitang pagbalik ni Kristo diha sa gahom sa Gingharian. Ang maong kabatbatan dili gayod mohaom sa usa ka indibiduwal, kondili kini mohaom sa dinihogang kongregasyon ni Kristo. Kay kini gipalit pinaagi sa iyang dugo, si Jesus nagtawag niini ingon nga iyang “ulipon.” Iyang gisugo ang mga membro niini sa paghimog mga tinun-an ug pagpakaon kanila sa mauswagon nga paagi, nga maghatag kanila sa “ilang [espirituwal nga] pagkaon sa hustong panahon.”—Mateo 24:45-47; 28:19; Isaias 43:10; Lucas 12:42; 1 Pedro 4:10.
8. (a) Unsang mga kaakohan ang nabatonan karon sa ulipon nga matang? (b) Nganong hinungdanon ang atong pagsanong sa instruksiyon pinaagi sa instrumento sa Diyos?
8 Sanglit ang ulipon nga matang maunongong nagbuhat sa buluhaton sa Agalon panahon sa iyang dili-makitang pagbalik sa 1914, adunay pamatuod nga kini gitugyanan ug nagdakong mga kaakohan sa 1919. Ang nangaging mga tuig maoy panahon sa tibuok-kalibotang pagpamatuod bahin sa Gingharian, ug ang usa ka dakong panon sa mga magsisimba ni Jehova ang ginatigom aron sila maluwas latas sa dakong kasakitan. (Mateo 24:14, 21, 22; Pinadayag 7:9, 10) Sila usab nagkinahanglag espirituwal nga pagkaon, ug kini gisilbi ngadto kanila pinaagi sa ulipon nga matang. Aron pahimut-an si Jehova, angay gayod nga dawaton nato ang instruksiyon nga iyang gihatag pinaagi niining maong instrumento ug molihok uyon niana.
9, 10. (a) Sa unang siglo, unsang kahikayan ang gipatuman aron sa pagsulbad sa mga pangutana bahin sa doktrina ug sa paghatag ug pahimangno bahin sa pagsangyaw sa maayong balita? (b) Unsang kahikayan alang sa pagpahiusa sa kalihokan sa katawhan ni Jehova ang naglungtad karon?
9 Usahay, motungha ang mga pangutana bahin sa doktrina ug pamaagi. Nan unsay buhaton? Ang Buhat kapitulo 15 nagsulti kanato kon giunsa pagsulbad ang isyu maylabot sa Hentil nga mga kinabig. Ang maong isyu gidala ngadto sa mga apostoles ug mga ansiyano sa Jerusalem, nga nag-alagad ingon nga sentrong nagamandong lawas. Kadtong mga lalakiha dili kay dili masayop, apan ang Diyos naggamit kanila. Ilang gisusi ang kasulatan maylabot sa maong isyu ug usab ang ebidensiya bahin sa paglihok sa espiritu sa Diyos sa pagbukas sa Hentil nga natad. Dayon nagpakanaog sila ug desisyon. Gipanalanginan sa Diyos ang maong kahikayan. (Buhat 15:1-29; 16:4, 5) Gikan sa maong nagamandong lawas, ang mga indibiduwal gipadala aron sa pagpalambo sa pagsangyaw sa Gingharian.
10 Sa atong adlaw ang Nagamandong Lawas sa makitang organisasyon ni Jehova gilangkoban sa dinihogan-sa-espiritung mga igsoon gikan sa lainlaing kayutaan ug sila atua karon sa hedkuwarter sa mga Saksi ni Jehova. Ilalom sa pagpangulo ni Jesu-Kristo, ang Nagamandong Lawas nagpauswag sa putling pagsimba sa matag nasod, nga nagpahiusa sa mga kalihokan sa pagsangyaw sa mga Saksi ni Jehova diha sa ilang tinagpulo ka linibong kongregasyon. Silang sakop sa Nagamandong Lawas sama ug panglantaw ni apostol Pablo, nga misulat sa mga isigka-Kristohanon: “Dili nga kami mao ang mga agalon sa inyong pagtuo, kondili kami mga isigkamagbubuhat alang sa inyong kalipay, kay kamo nagabarog tungod sa inyong pagtuo.”—2 Corinto 1:24.
11. (a) Sa unsang paagi gitudlo ang mga ansiyano ug ministeryal nga alagad? (b) Nganong suod kitang makigtambayayong sa gitudlong mga ansiyano?
11 Ang mga Saksi ni Jehova sa tibuok kalibotan nagasalig sa Nagamandong Lawas sa pagpilig takos nga mga lalaki nga, sa baylo, awtorisadong motudlo ug mga ansiyano ug ministeryal nga mga alagad aron sa pag-atiman sa mga kongregasyon. Ang mga kinahanglanon niadtong gitudlo gipahayag diha sa Bibliya ug gikonsiderar nga ang maong mga lalaki dili hingpit ug busa makahimog mga kasaypanan. Ang mga ansiyano nga mohimog mga rekomendasyon ug kadtong mohimo sa pagtudlo nagaabaga ug ugdang nga responsabilidad atubangan sa Diyos. (1 Timoteo 3:1-10, 12, 13; Tito 1:5-9) Busa, sila mag-ampo alang sa tabang sa espiritu sa Diyos ug magpagiya sa iyang dinasig nga Pulong. (Buhat 6:2-4, 6; 14:23) Ipakita nato ang atong pagpabili niining “gasa nga mga lalaki,” nga motabang natong tanan nga makab-ot ang “pagkausa sa pagtuo.”—Efeso 4:8, 11-16.
12. Sa unsang paagi si Jehova naggamit sa mga babaye diha sa teokratikanhong kahikayan?
12 Gilatid sa Kasulatan nga ang pag-atiman sa kongregasyon pagabuhaton sa mga lalaki. Dili kini pagpakamenos sa mga babaye, kay ang uban kanila mga manununod man gani sa langitnong Gingharian, ug dako ang ilang mahimo sa buluhatong pagsangyaw. (Salmo 68:11) Tungod usab sa ilang matinumanong pag-atiman sa mga kaakohan sa pamilya, ang mga babaye makatampo sa maayong dungog sa kongregasyon. (Tito 2:3-5) Apan ang pagtudlo sulod sa kongregasyon giatiman sa mga lalaki nga maoy gitudlo sa pagbuhat niana.—1 Timoteo 2:12, 13.
13. (a) Unsang panglantaw ang giawhag sa Bibliya nga batonan sa mga ansiyano bahin sa ilang katungdanan? (b) Sa unsang pribilehiyo nga kitang tanan mahimong makigbahin?
13 Sa kalibotan, ang tawo nga naggunit ug dakong katungdanan giisip nga importante, apan sulod sa organisasyon sa Diyos ang lagda mao: “Siya nga nagagawi sa iyang kaugalingon ingon nga mas ubos taliwala kaninyong tanan mao ang usa nga dako.” (Lucas 9:46-48; 22:24-26) Ang Kasulatan nagtambag sa mga ansiyano nga mag-amping nga dili magdominar niadtong panulondon sa Diyos kondili, mahimo hinuon nga mga panig-ingnan sa panon. (1 Pedro 5:2, 3) Dili lamang pipila ka tawong pinalabi, kondili ang tanang Saksi ni Jehova, lalaki ug babaye, ang dunay pribilehiyo sa paghawas sa Soberano sa uniberso, nga mapaubsanong mosugid sa iyang ngalan ug mosulti sa mga tawo bisan diin bahin sa iyang Gingharian.
14. Ginamit ang mga kasulatan nga gisitar, hisgoti ang mga pangutana nga gilista sa kataposan sa parapo.
14 Maayong suknaon nato ang atong kaugalingon: ‘Gipabilhan ba gayod nako ang paagi ni Jehova sa pagtultol sa iyang makitang organisasyon? Makita ba kana sa akong mga tinamdan, sinultihan, ug mga linihokan?’ Ang pagpalandong sa mosunod nga mga punto makatabang sa matag usa kanato sa paghimo sa maong pagsusi.
Kon magpasakop gayod ako kang Kristo isip Ulo sa kongregasyon, nan, sumala sa gipakita sa mosunod nga mga kasulatan, unsay akong pagabuhaton? (Mateo 24:14; 28:19, 20; Juan 13:34, 35)
Kon mapasalamaton nakong dawaton ang espirituwal nga mga tagana nga modangat pinaagi sa ulipon nga matang ug sa Nagamandong Lawas niini, kang kinsa ako nagatahod? (Lucas 10:16)
Sa unsang paagi makiglabot sa usag usa ang tanan diha sa kongregasyon, ilabina ang mga ansiyano? (Roma 12:10)
15. (a) Pinaagi sa atong tinamdan sa makitang organisasyon ni Jehova, unsay atong ginapasundayag? (b) Unsang mga kahigayonan ang anaa kanato aron mapamatud-ang bakakon ang Yawa ug magdalag kalipay sa kasingkasing ni Jehova?
15 Si Jehova nagagiya kanato karon pinaagi sa iyang makitang organisasyon ilalom kang Kristo. Ang atong tinamdan ning maong kahikayan magpasundayag sa atong gibati bahin sa isyu sa pagkasoberano. (Hebreohanon 13:17) Si Satanas nagpatuo nga kono ang atong pangunang gikabalak-an mao lang ang atong kaugalingon. Apan kon kita moalagad sa bisan unsang paagi nga gikinahanglan ug maglikay sa mga butang nga magdanig dili angay nga pagtagad sa kaugalingon, kita makapamatuod nga bakakon ang Yawa. Kon kita mahigugma ug magtahod sa mga nanguna sa atong taliwala apan magdumili ‘pagdayeg sa mga personalidad alang sa atong kaayohan,’ kita magdalag kalipay kang Jehova. (Judas 16; Hebreohanon 13:7) Pinaagi sa pagkamaunongon sa organisasyon ni Jehova, gipakita nato nga si Jehova mao ang atong Diyos ug kita nahiusa sa pagsimba kaniya.—1 Corinto 15:58.
Repasong Panaghisgot
• Unsa ang makitang organisasyon ni Jehova karon? Unsa ang katuyoan niini?
• Kinsa ang tinudlong Ulo sa kongregasyon, ug pinaagi sa unsang makitang mga kahikayan nga siya nagtaganag mahigugmaong pagtultol alang kanato?
• Unsang maayong mga tinamdan ang angay natong ugmaron ngadto kanilang sakop sa organisasyon ni Jehova?
[Mga hulagway sa panid 133]
Si Jehova nagagiya kanato pinaagi sa iyang makitang organisasyon ilalom kang Kristo