Pagsaludar sa Bandera, Pagbotar, ug Serbisyo Publiko

Pagsaludar sa bandera. Nagtuo ang mga Saksi ni Jehova nga ang pagsaludar niini, nga sagad inubanan ug nasodnong awit, maoy usa ka relihiyosong buhat, nga ang kaluwasan gipasidungog ngadto sa Estado o mga lider niini ug dili sa Diyos. (Isaias 43:11; 1 Corinto 10:14; 1 Juan 5:21) Si Haring Nabucodonosor sa karaang Babilonya usa sa maong mga lider. Aron ipaila sa katawhan ang iyang kahalangdon ug pagkarelihiyoso, gipatindog niining gamhanang hari ang usa ka dakong larawan ug gipugos ang iyang ginsakpan nga moyukbo niana samtang may musikang gitugtog nga samag nasodnong awit. Apan ang tulo ka Hebreohanon nga si Sadrak, Mesak, ug Abednego midumili sa pagyukbo sa maong larawan, bisan pag kamatayon ang silot niana.​—Daniel, kapitulo 3.

Sa atong panahon, “ang bandera mao ang pangunang simbolo sa nasyonalismo ug sentro sa pagsimba,” misulat ang historyanong si Carlton Hayes. “Ang mga lalaki motukas sa ilang mga kalo iniglabay sa bandera; ug ang mga magbabalak mosulat ug mga balak ug ang mga bata mokantag nasodnong mga awit agig pagdayeg sa bandera.” Siya midugang pag-ingon nga ang nasyonalismo may “mga balaang adlaw” usab, sama sa Ika-4 sa Hulyo sa Tinipong Bansa, ingon man “mga bayani” ug “mga halaran.” Sa usa ka publikong seremonyas sa Brazil, ang usa ka taas nga opisyal sa kasundalohan miadmitir: “Ang bandera gitahod ug gisimba . . . sama ra nga ang Yutang Natawhan atong gisimba.” Oo, “ang bandera sagrado, sama sa krus,” kas-a miingon ang The Encyclopedia Americana.

Ang nahisgotan nga ensiklopedia nag-ingon di pa dugay nga ang nasodnong mga awit “maoy pagpahayag sa nasyonalismo ug kasagarang naglakip sa pangaliyupo nga giyahan ug panalipdan unta sa Diyos ang katawhan o ilang mga magmamando.” Busa, makataronganon diay ang mga alagad ni Jehova kon isipon nilang relihiyoso ang patriotikong mga seremonyas nga naglakip sa pagsaludar sa bandera ug nasodnong mga awit. Sa pagkamatuod, bahin sa dili pagsaludar sa bandera sa mga anak sa mga Saksi ni Jehova o sa pagpanumpa nga magmaunongon niana diha sa mga tunghaan sa Tinipong Bansa, ang librong The American Character mikomento: “Sa daghang kaso, midesisyon na gayod ang Korte Suprema nga kining adlaw-adlaw nga mga rituwal maoy relihiyoso.”

Bisag dili moapil ang katawhan ni Jehova sa mga seremonyas nga giisip nilang dili-Kasulatanhon, sila nagtahod gayod sa katungod sa uban nga moapil. Gitahod usab nila ang nasodnong mga bandera isip mga emblema ug giila ang mga gobyerno isip “labaw nga mga awtoridad” nga nag-alagad ingong “ministro sa Diyos.” (Roma 13:1-4) Busa, gisunod sa mga Saksi ni Jehova ang awhag nga iampo ‘ang mga hari ug ang tanan nga anaa sa hataas nga katungdanan.’ Hinuon, ang atong motibo maoy “aron kita magpadayon sa pagkinabuhi nga mahusay ug malinawon uban ang bug-os nga diyosnong pagkamahinalaron ug pagkaugdang.”​—1 Timoteo 2:2.

Pagbotar panahon sa eleksiyon. Gitahod sa matuod nga mga Kristohanon ang katungod sa uban nga mobotar. Dili sila moprotesta batok niana, ug mokooperar sila sa napili nga mga awtoridad. Bisan pa niana, magpabilin silang neyutral sa politikanhong kahikayan sa mga nasod. (Mateo 22:21; 1 Pedro 3:16) Unsay angayng buhaton sa usa ka Kristohanon diha sa mga nasod diin pinugos ang pagbotar o kayugtan kadtong dili moadtog presinto aron sa pagbotar? Kay nahinumdom nga si Sadrak, Mesak, ug Abednego nangadto man sa kapatagan sa Dura, ang Kristohanong anaa sa susamang kahimtang makaadto sa presinto kon motugot ang iyang tanlag. Hinuon, angay niyang ampingan nga dili malapas ang iyang pagkaneyutral. Angay niyang hinumdoman kining unom ka prinsipyo:

1. Ang mga sumusunod ni Jesus “dili bahin sa kalibotan.”​—Juan 15:19.

2. Ang mga Kristohanon naghawas kang Kristo ug sa iyang Gingharian.​—Juan 18:36; 2 Corinto 5:20.

3. Ang Kristohanong kongregasyon nagkahiusa sa pagtuo, ug ang mga membro niini nagkahiusa tungod sa gugma nga sama sa kang Kristo.​—1 Corinto 1:10; Colosas 3:14.

4. Kadtong mopilig usa ka opisyal manubag usab sa iyang mga buhat.​—Matikdi ang mga prinsipyo luyo sa gipamulong sa 1 Samuel 8:5, 10-18 ug 1 Timoteo 5:22.

5. Giisip ni Jehova ang tinguha sa Israel nga makabaton ug makitang hari ingong pagsalikway Kaniya.​—1 Samuel 8:7.

6. Sa dihang magsangyaw bahin sa Gingharian sa Diyos, ang mga Kristohanon kinahanglang dili magpanuko sa pagpakigsulti sa mga tawo nga lainlaig politikanhong ideolohiya.​—Mateo 24:14; 28:19, 20; Hebreohanon 10:35.

Serbisyo publiko. Diha sa pipila ka nasod, ang Estado nagbaod nga ang dili magsundalo mohimog usa ka matang sa serbisyo publiko sulod sa usa ka yugto sa panahon. Kon modesisyon bahin niini, angay nato kining iampo, nga makigsulti tingali sa hamtong nga Kristohanon, ug human niana modesisyon sumala sa imong tanlag.​—Proverbio 2:1-5; Filipos 4:5.

Ang Pulong sa Diyos nagsugo kanato nga ‘magmasinugtanon sa mga kagamhanan ug sa mga awtoridad ingon nga mga magmamando, nga andam alang sa tanang maayong buhat, . . . nga magmakataronganon.’ (Tito 3:1, 2) Uban niana sa hunahuna, makapangutana kita: ‘Kon dawaton ko ang gisugyot nga serbisyo publiko, makompromiso ko ba ang akong pagkaneyutral o malangkit ba ko sa bakak nga relihiyon?’ (Miqueas 4:3, 5; 2 Corinto 6:16, 17) ‘Ang maong serbisyo publiko makapalisod o makapugong ba kanako sa pagtuman sa akong Kristohanong mga responsabilidad?’ (Mateo 28:19, 20; Efeso 6:4; Hebreohanon 10:24, 25) ‘Sa laing bahin, mapauswag ko ba hinuon ang akong pag-alagad, nga tingali makapayunir pa?’​—Hebreohanon 6:11, 12.

Kon modesisyon ang usa ka Kristohanon sumala sa iyang tanlag nga makahimo siyag serbisyo publiko inay magpapriso, angay kanang tahoron sa mga isigka-Kristohanon. (Roma 14:10) Apan, kon mobati siyang dili siya makahimo niana, angay usab kanang tahoron sa uban.​—1 Corinto 10:29; 2 Corinto 1:24.