Organisado Aron Buhaton ang Kabubut-on ni Jehova

SA TIBUOK kalibotan, dunay daghang relihiyoso, politikal, komersiyal, ug publiko nga organisasyon nga lainlaig tumong, panglantaw, ug pilosopiya. Pero dunay usa ka organisasyon nga lahi kaayo sa uban. Klarong gipaila sa Pulong sa Diyos ang maong organisasyon ingong mga Saksi ni Jehova.

² Ikalipay nga nakig-uban na ka sa organisasyon ni Jehova. Kay nasabtan na nimo ang kabubut-on sa Diyos, imo na kanang ginahimo karon. (Sal. 143:10; Roma 12:2) Ikaw usa ka aktibong ministro nga nag-alagad uban sa mga igsoon sa tibuok kalibotan nga may gugma sa usag usa. (2 Cor. 6:4; 1 Ped. 2:17; 5:9) Tungod niini imong natagamtam ang daghang panalangin ug dakong kalipay, sumala sa gisaad sa Pulong sa Diyos. (Prov. 10:22; Mar. 10:30) Pinaagi sa matinumanong pagbuhat sa kabubut-on ni Jehova karon, ginaandam nimo ang imong kaugalingon para sa malungtaron ug nindot kaayo nga kaugmaon.​—1 Tim. 6:18, 19; 1 Juan 2:17.

³ Ang atong Dakong Maglalalang dunay talagsaong organisasyon sa yuta nga gidumala sa teokratikanhong paagi. Kini nagpasabot nga gimandoan kini ni Jehova, nga maoy Ulo sa tanan. Bug-os ang atong pagsalig kaniya. Siya ang atong Maghuhukom, Tighatag ug Balaod, ug Hari. (Isa. 33:22) Kay siya maoy Diyos sa kahapsay, naghimo siyag mga kahikayan aron mahimo ta niyang “mga isigkamagbubuhat” sa pagtuman sa iyang katuyoan.​—2 Cor. 6:1, 2.

⁴ Samtang mas nagkaduol ang kataposan sa presenteng sistema sa mga butang, padayon tang nag-alagad ubos sa pagpanguna sa tinudlong Hari, si Kristo Jesus. (Isa. 55:4; Pin. 6:2; 11:15) Si Jesus mismo ang mitagna nga mas labaw pa ang malampos sa iyang mga sumusunod kay sa iyang nalampos sa ministeryo sa dinhi pa siya sa yuta. (Juan 14:12) Tinuod kana kay latas sa mas taas nga panahon, makobrehan sa nagkadaghang sumusunod ni Jesus ang nagkadakong teritoryo. Ilang isangyaw ang maayong balita sa Gingharian hangtod sa kinalay-ang bahin sa yuta.​—Mat. 24:14; 28:19, 20; Buh. 1:8.

⁵ Kini natuman na. Pero sumala sa klarong giingon ni Jesus, ang pagsangyaw sa maayong balita matapos sa gitakdang panahon ni Jehova. Ang katumanan sa mga tagna sa Pulong sa Diyos nagpaila nga duol na gyod ang dako ug makalilisang nga adlaw ni Jehova.​—Joel 2:31; Sof. 1:14-18; 2:2, 3; 1 Ped. 4:7.

⁶ Samtang masabtan nato ang kabubut-on ni Jehova niining ulahing bahin sa kataposang mga adlaw, kinahanglang mas maningkamot ta sa pagbuhat sa mga gikinahanglan sa Diyos kanato. Busa angayng masinati ta pag-ayo kon sa unsang paagi naglihok ang organisasyon sa Diyos ug bug-os mokooperar niini. Ang organisasyon naglihok base sa mga prinsipyo sa Bibliya, apil na sa mga sugo, balaod, regulasyon, ug mga pagtulon-an nga makita sa Pulong sa Diyos.​—Sal. 19:7-9.

⁷ Dihang sundon sa katawhan ni Jehova ang maong binase sa Bibliya nga direksiyon, sila magkauban sa pag-alagad nga may kalinaw ug panaghiusa. (Sal. 133:1; Isa. 60:17; Roma 14:19) Unsay nakapalig-on sa panaghiusa sa atong mga igsoon sa tibuok kalibotan? Ang gugma. Ang tanan natong ginahimo gipalihok sa gugma. (Juan 13:34, 35; Col. 3:14) Pinaagi niini, kita padayong nagaduyog sa langitnong bahin sa organisasyon ni Jehova.

ANG LANGITNONG BAHIN SA ORGANISASYON NI JEHOVA

⁸ Ang propetang si Isaias, Ezequiel, ug Daniel nakakitag mga panan-awon sa langitnong bahin sa organisasyon ni Jehova. (Isa., kap. 6; Ezeq., kap. 1; Dan. 7:9, 10) Sa susama, si apostol Juan nakakita sab ug panan-awon bahin niining langitnong kahikayan ug gisulat niya kini sa basahon sa Pinadayag. Iyang nakita si Jehova nga naglingkod sa mahimayaong trono uban sa mga anghel, nga nag-ingon: “Balaan, balaan, balaan si Jehova nga Diyos, ang Labing Gamhanan, nga mao ang kaniadto ug ang karon ug ang moabot.” (Pin. 4:8) Nakita sab ni Juan nga “sa taliwala sa trono . . . nagbarog ang usa ka kordero,” ang Kordero sa Diyos, si Jesu-Kristo.​—Pin. 5:6, 13, 14; Juan 1:29.

⁹ Ang panan-awon bahin kang Jehova nga naglingkod sa trono nagpaila nga siya ang Ulo niini nga organisasyon. Bahin kaniya ug sa iyang labaw kaayo nga posisyon, ang 1 Cronicas 29:11, 12 nag-ingon: “Imo, Oh Jehova, ang kabantog ug ang gahom ug ang katahom ug ang himaya ug ang kahalangdon, kay imo ang tanang butang sa langit ug sa yuta. Imo ang gingharian, Oh Jehova. Ikaw ang Usa nga nagbayaw sa imong kaugalingon ingong pangulo ibabaw sa tanan. Gikan kanimo ang mga bahandi ug ang himaya, ug ikaw ang nagmando sa tanan, ug anaa sa imong kamot ang gahom ug ang pagkagamhanan, ug ang imong kamot makahimo sa pagtuboy ug sa paghatag ug kusog sa tanan.”

¹⁰ Ingong isigkamagbubuhat ni Jehova, si Jesu-Kristo dunay taas nga posisyon sa langit ug gihatagag dakong awtoridad. Gani, ‘gipasakop sa Diyos ang tanang butang ilalom sa iyang mga tiil ug gihimo siyang ulo ibabaw sa tanang butang maylabot sa kongregasyon.’ (Efe. 1:22) Si apostol Pablo miingon bahin kang Jesus: “Gibayaw siya sa Diyos ngadto sa mas taas nga posisyon, ug sa kaayo sa Diyos gihatagan siyag ngalan nga labaw sa tanang ubang ngalan aron nga sa ngalan ni Jesus moluhod ang tanang naa sa langit, sa yuta, ug ilalom sa yuta ug ang tanan dayag nga moila nga si Jesu-Kristo maoy Ginoo para sa kahimayaan sa Diyos nga Amahan.” (Filip. 2:9-11) Busa makasalig gyod ta sa matarong nga pagpanguna ni Jesu-Kristo.

¹¹ Nakita ni propetang Daniel diha sa panan-awon ang Karaan sa mga Adlaw nga naglingkod sa Iyang langitnong trono ug ang mga anghel nga “kaliboan ka libo nga nag-alagad kaniya, ug napulo ka libo ka napulo ka libo nga nagtindog sa iyang atubangan.” (Dan. 7:10) Gitawag sa Bibliya kining panon sa mga anghel ingong “mga espiritu para sa balaang pag-alagad, nga gipadala aron mag-alagad niadtong manunod sa kaluwasan.” (Heb. 1:14) Kining tanan nga espiritung linalang giorganisar sa lainlaing katungdanan.​—Col. 1:16.

¹² Dihang mamalandong ta kon unsa ang langitnong bahin sa organisasyon ni Jehova, masabtan nato ang reaksiyon ni Isaias bahin sa panan-awon diin iyang ‘nakita si Jehova nga naglingkod sa habog ug tinuboy nga trono,’ ug “ang mga serapin nagbarog ibabaw kaniya.” Si Isaias miingon: “Alaot ko! Daw mora na kog patay, kay usa ko ka tawong hugaw ug mga ngabil, ug nagpuyo ko taliwala sa katawhan nga hugaw ug mga ngabil; kay nakita sa akong mga mata ang Hari, si Jehova sa mga panon!” Si Isaias nahingangha gyod ug mibating ubos dihang nasabtan niya kon unsa ka dako ang organisasyon ni Jehova. Siya natandog pag-ayo niini nga panghitabo maong dihang nagkinahanglag boluntaryo para sa usa ka espesyal nga asaynment sa pagmantalag mga paghukom ni Jehova, si Isaias mitubag: “Ania ko! Ipadala ko.”​—Isa. 6:1-5, 8.

¹³ Sa susama, dihang ilhon ug pabilhan sa katawhan ni Jehova ang iyang organisasyon, kini makapadasig kanila. Samtang ang organisasyon nagalihok, maningkamot ta sa pagduyog niini. Manlimbasog ta nga ipakita ang atong pagsalig sa organisasyon ni Jehova karon.

NAGALIHOK ANG ORGANISASYON NI JEHOVA

¹⁴ Sa kapitulo 1 sa tagna ni Ezequiel, si Jehova gihulagway ingong nagsakay sa dako kaayong langitnong karo. Kining halangdong karo nagsimbolo sa dili makitang bahin sa organisasyon ni Jehova. Ang iyang pagsakay niini nagpasabot nga siya mahigugmaong nagagiya ug nagagamit niini sumala sa iyang katuyoan.​—Sal. 103:20.

¹⁵ Sulod sa matag ligid sa karo dunay laing ligid nga pababag. Kini silang tanan parehog gidak-on. Tungod niini, ang mga ligid ‘makaadto bisan asa sa upat ka direksiyon.’ (Ezeq. 1:17) Ang mga ligid niini daling makausab ug direksiyon. Pero wala ni magpasabot nga walay nagkontrol o nagmaniobra niini. Dili motugot si Jehova nga bisag asa na lang mopaingon ang iyang organisasyon. Ang Ezequiel 1:20 nag-ingon: “Sila nagpadulong sa direksiyon nga gipaadtoan kanila sa espiritu.” Busa si Jehova ang nagpalihok sa iyang organisasyon bisan asa kini giyahan sa iyang espiritu. Pangutan-on nato ang atong kaugalingon, ‘Ako ba nagaduyog niini?’

¹⁶ Dili lang kay motambong ta sa mga tigom ug mosangyaw aron ikaingong nagaduyog ta sa organisasyon ni Jehova. Ang atong pagduyog nagpasabot nga angay tang mouswag sa espirituwal. Atong ‘seguroon ang mas importanteng mga butang’ ug pahimuslan ang kinabag-ohang espirituwal nga mga tagana. (Filip. 1:10; 4:8, 9; Juan 17:3) Hinumdoman sab nato nga ang maayong koordinasyon ug kooperasyon importante sa usa ka organisasyon. Busa kinahanglang masabtan nato nga importanteng gamiton sa labing maayong paagi ang espirituwal ug materyal nga katigayonan nga gitugyan ni Jehova kanato aron molampos ang iyang buluhaton. Samtang nagduyog kita sa langitnong karo ni Jehova, kita nagkinabuhi sumala sa mensahe nga atong ginasangyaw.

¹⁷ Sa tabang sa organisasyon ni Jehova, padayon natong ginabuhat ang kabubut-on sa Diyos. Hinumdomi nga si Jehova ang nagsakay sa langitnong karo. Busa ang pagduyog sa iyang karo nagpakita nga duna tay pagtahod ug pagsalig kang Jehova, ang atong Bato. (Sal. 18:31) Ang Bibliya nagsaad: “Hatagan ni Jehova ug kusog ang iyang katawhan. Panalanginan ni Jehova ug pakigdait ang iyang katawhan.” (Sal. 29:11) Ingong bahin sa organisasyon ni Jehova karon, kita napalig-on ug nakapahimulos sa kalinaw nga iyang gihatag sa iyang organisadong katawhan. Oo, padayon gyod natong mapahimuslan ang dagayang panalangin samtang ginabuhat nato ang kabubut-on ni Jehova karon ug hangtod sa hangtod.