PANGUTANA 2
Nganong Mabalaka Ko sa Akong Hitsura?
UNSAY IMONG HIMOON?
Handurawa kini: Pagtan-aw ni Julia sa samin, tambok na kaayo siya. “Kinahanglan kong magpaniwang,” siya miingon—bisag gisultihan na siya sa iyang ginikanan ug mga higala nga siya mora nag “tukog.”
Si Julia naghunahuna ug sobrang paagi sa pagpaniwang aron mous-os ang iyang timbang bisag “mga dos kilos lang.” Kinahanglang dili siya mokaon sulod sa pipila ka adlaw . . .
Kon sama ka kang Julia, unsay imong himoon?
HUNONG UG PAMALANDONG!
Ang imong pagtan-aw sa kaugalingon basin sama nianang imong makita sa samin nga makausab ug dagway
Normal lang nga mabalaka ka sa imong hitsura. Gani, ang Bibliya naghisgot ug mga babaye ug lalaki nga guwapa ug guwapo, lakip niana si Sara, Raquel, Abigail, Jose, ug David. Ang Bibliya nag-ingon nga si Abisag guwapa kaayo.—1 Hari 1:4.
Pero, daghang batan-on walay laing gihunahuna kondili ang ilang hitsura. Kana makahatag ug dakong problema. Tagda kini:
Sa usa ka pagtuon, 58 porsiyento sa mga babaye miingon nga sila sobra ka tambok, pero ang tinuod, 17 porsiyento lang kanila ang tambok.
Sa laing pagtuon, 45 porsiyento sa mga babaye nga niwang nagtuo nga sila tambok kaayo!
Kay gustong moniwang, ang ubang batan-on nagsakit ug anorexia—makamatayng sakit diin pagutman nila ang ilang kaugalingon.
Kon duna kay mga simtomas sa anorexia o sa ubang sakit maylabot sa pagkaon, pangayog tabang. Pakigsulti sa imong ginikanan o sa ubang kasaligang hamtong. Ang Bibliya nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.”—Proverbio 17:17.
ANG LABING MAAYONG HIMOON!
Sa tinuod lang, ang personalidad o pagkatawo maoy makapahimo sa usa nga matahom o dili. Tagda pananglitan ang anak ni David nga si Absalom. Ang Bibliya nag-ingon:
“Walay usa nga gidayeg pag-ayo tungod sa iyang kaguwapo. . . . Walay ikasaway kaniya.”—2 Samuel 14:25, Maayong Balita Biblia.
Apan kining batan-ona hambogiro, ambisyoso, ug traydor! Busa negatibo ang Bibliya kon maghisgot na bahin kang Absalom; siya traydor ug madumtanon nga andam mopatay.
Ang Bibliya nagtambag kanato:
“Isul-ob ang bag-ong pagkatawo.”—Colosas 3:10.
“Himoa nga ang pagpaanyag sa inyong kaugalingon dili sa gawas lamang . . . Hinunoa, tinguhaa ang katahom nga naggikan sa sulod ninyo.”—1 Pedro 3:3, 4, Maayong Balita Biblia.
Normal lang nga gusto nimong moarang-arang ang imong hitsura, pero mas importante ang imong pagkatawo kay sa imong hitsura. Ang imong maayong mga kinaiya mas makapatahom nimo kay sa nindot nga lawas! “Ang kaguwapa makakuha dayon ug atensiyon. Pero ang imong pagkatawo ug maayong mga kinaiya maoy mahinumdoman dayon sa uban,” miingon si Phylicia.
SUSIHA KON UNSAY IMONG HITSURA
Kontento ka ba sa imong hitsura?
Nakahunahuna ka bang magparetoke o magpaniwang aron maremedyohan ang imong depekto sa lawas o hitsura?
Unsay gusto nimong usbon sa imong lawas o hitsura kon mahimo? (Pilia ang imong tubag.)
GITAS-ON
TIMBANG
BUHOK
KORTE SA LAWAS
NAWONG
KUTIS
Kon oo ang imong tubag sa unang duha ka pangutana ug nakapili kag tulo o sobra pa sa ikatulong pangutana, palandonga kini: Dakog posibilidad nga ang uban dili negatibog hunahuna bahin nimo, basig ikaw ray naghunahuna ug negatibo bahin sa imong kaugalingon. Tingali sobra ra kaayo kang nabalaka sa imong hitsura.—1 Samuel 16:7.