Gipili ni Jehova si Josue

Taas nga panahon nga si Moises ang lider sa nasod sa Israel, ug karon hapit na siyang mamatay. Giingnan siya ni Jehova: ‘Dili na ikaw ang magdala sa mga Israelinhon sa Yutang Saad. Pero pakit-on ti ka sa maong yuta.’ Dayon gihangyo ni Moises si Jehova nga magpilig bag-ong lider sa katawhan. Si Jehova miingon: ‘Adtoa si Josue ug sultihi nga siya ang akong gipili.’

Gipahibalo ni Moises ang mga Israelinhon nga hapit na siyang mamatay ug si Josue ang gipili ni Jehova nga mahimong ilang lider pasulod sa Yutang Saad. Dayon giingnan ni Moises si Josue: ‘Ayawg kahadlok. Tabangan ka ni Jehova.’ Human niana, miadto si Moises sa tumoy sa Bukid sa Nebo. Didto gipakita ni Jehova kang Moises ang yuta nga Iyang gisaad kang Abraham, Isaac, ug Jacob. Namatay si Moises sa edad nga 120.

Si Jehova miingon kang Josue: ‘Tabok sa Suba sa Jordan, ug adto sa Canaan. Tabangan ti ka pareho sa akong pagtabang kang Moises. Ayawg kalimot sa pagbasa sa akong Balaod kada adlaw. Ayawg kahadlok. Magmaisogon. Lakaw ug buhata ang akong gisugo nimo.’

Nagpadala si Josue ug duha ka espiya sa siyudad sa Jerico. Sa sunod nga leksiyon, atong mahibaloan kon unsay nahitabo didto. Pagbalik nila, ilang gireport nga panahon na para mosulod sa Canaan. Pagkasunod adlaw, giingnan ni Josue ang nasod nga manghipos. Dayon gipauna niya ang mga saserdote nga nagdala sa kaban sa pakigsaad sa pagtabok sa Suba sa Jordan. Nagbaha ang suba. Pero dihang mitunob sa tubig ang mga saserdote, mihubas ang suba! Mibarog ang mga saserdote sa tunga sa suba hangtod nga nakatabok ang tanang Israelinhon. Nagpahinumdom kaha ni nila sa gihimo ni Jehova didto sa Pulang Dagat?

Nakasulod na gyod ang mga Israelinhon sa Yutang Saad. Makatukod na sila ug mga balay ug siyudad, ug makauma na sila. Makatanom na silag mga ubas ug lainlaing klase sa prutas. Nagbaha ang gatas ug dugos niining yutaa.