Si Ezequias Gipanalipdan sa Anghel ni Jehova

Nailog na sa Asirya ang 10 ka tribong gingharian sa Israel. Ug gusto pang ilogon sa hari sa Asirya nga si Senakerib ang duha ka tribong gingharian sa Juda. Gianam-anam niyag ilog ang matag siyudad sa Juda. Pero ang siyudad nga gusto kaayo niyang ilogon mao ang Jerusalem. Galing lang, wala mahibalo si Senakerib nga si Jehova nanalipod sa Jerusalem.

Gihatagan ni Haring Ezequias si Senakerib ug daghang kuwarta aron dili hilabtan ang Jerusalem. Gidawat ni Senakerib ang kuwarta, pero iya gihapong gisulong ang Jerusalem. Ang mga tawo sa Jerusalem nahadlok kay nagkaduol na ang mga Asiryanhon. Pero giingnan sila ni Ezequias: ‘Ayaw mog kahadlok. Bisag gamhanan ang Asirya, tabangan ta ni Jehova nga mapildi sila.’

Gipaadto ni Senakerib didto sa Jerusalem ang Rabsake nga iyang mensahero aron biaybiayon ang mga tawo. Didto sa gawas sa siyudad, ang Rabsake misinggit: ‘Walay mahimo si Jehova. Ayaw mog pailad ni Ezequias. Walay diyos nga makaluwas ninyo.’

Si Ezequias miampo kang Jehova kon unsay himoon. Si Jehova miingon: ‘Ayawg kahadlok sa giingon sa Rabsake. Dili mailog ni Senakerib ang Jerusalem.’ Dayon nakadawat si Ezequias ug mga sulat gikan kang Senakerib. Kini ang giingon: ‘Surender na lang. Dili mo maluwas ni Jehova.’ Miampo si Ezequias: ‘Jehova, palihog luwasa mi aron ang tanan mahibalo nga ikaw lamang ang matuod nga Diyos.’ Dayon si Jehova miingon: ‘Dili makasulod ang Asirya sa Jerusalem. Panalipdan nako ang akong siyudad.’

Segurado kaayo si Senakerib nga mailog na niya ang Jerusalem. Pero usa ka gabii niana, nagpadala si Jehova ug usa ka anghel ngadto sa mga sundalo nga nagkampo sa gawas sa siyudad. Gipatay sa anghel ang 185,000 ka sundalo! Namatay ang pinakamaayong mga sundalo ni Senakerib. Wala na siyay mahimo busa mipauli na lang siya. Gituman gyod ni Jehova ang iyang saad nga panalipdan si Ezequias ug ang Jerusalem. Kon didto ka sa Jerusalem niadtong panahona, mosalig kaha ka ni Jehova?