ABIB

[Lunhawng mga Uhay].

Ang orihinal nga ngalan sa unang lunar nga bulan sa sagradong kalendaryo sa mga Hudiyo ug sa ikapitong bulan sa sekular nga kalendaryo. (Ex 13:4; 23:15; 34:18; Deu 16:1) Kini kasagaran nga katumbas sa bahin sa Marso ug bahin sa Abril.

Ang ngalang Abib gisabot nga nagkahulogang “Lunhawng mga Uhay,” nga ang mga uhay hinog na apan humok pa. (Itandi ang Lev 2:14.) Kining bulana mao ang ting-ani sa sebada, nga sundan sa pag-ani sa trigo mga pipila ka semana sa ulahi. Ang ulahing ulan o ulan sa tingpamulak magsugod usab ug kini magpaawas sa Suba sa Jordan. (Jos 3:15) Gitudlo kini ni Jehova ingong ang unang bulan sa sagradong tuig sa panahon sa Pagpanggula gikan sa Ehipto. (Ex 12:​1, 2; 13:4) Human sa pagkadestiyero sa Babilonya kining ngalana giilisdan sa ngalan nga Nisan.​—Tan-awa ang NISAN.