ABIHAIL
[Ang (Akong) Amahan Maoy Kusog].
Usa ka ngalan nga gigamit sa Bibliya alang sa tulo ka lalaki ug duha ka babaye.
1. Usa ka lalaki sa tribo ni Levi ug sa banay (o kabanayan) ni Merari. Siya mao ang amahan ni Zuriel, nga pangulo sa balay sa amahan sa iyang kabanayan panahon sa Pagpanggula.—Num 3:35.
2. Ang asawa ni Abisur, nga naggikan sa tribo ni Juda. (1Cr 2:29) Siya adunay duha ka anak nga lalaki, si Aban ug Molid.
3. Usa ka lalaki sa tribo ni Gad nga nagpuyo sa Basan ug Gilead. Siya mao ang anak ni Huri ug usa ka pangulo o ulo sa banay.—1Cr 5:14-17.
4. Ang anak nga babaye ni Eliab, kamagulangang igsoon ni David. (Apan ang Hebreohanong pulong nga bath [anak nga babaye] sa 2 Cronicas 11:18 mahimong magkahulogan usab nga “apo nga babaye.”)
Ang King James Version sa 2 Cronicas 11:18 nag-ingon: “Ug gikuha ni Rehoboam si Mahalat nga anak nga babaye ni Jerimot nga anak nga lalaki ni David aron mahimong asawa, ug si Abihail nga anak nga babaye ni Eliab nga anak nga lalaki ni Jese.” Sa ingon mopatim-aw nga si Abihail mao ang ikaduhang asawa ni Rehoboam. Hinunoa, ang orihinal nga Hebreohanon motugot alang sa laing paghubad, ug busa sa daghang modernong mga hubad kining tekstoha mabasa: “Si Mahalat nga anak nga babaye ni Jerimot nga anak nga lalaki ni David, ug ni Abihail nga anak nga babaye ni Eliab nga anak nga lalaki ni Jese.” (Tan-awa ang RS, AT, JP, NW, JB.) Mahitungod niini, ang Soncino Books of the Bible nag-ingon diha sa nota o footnote sa 2 Cronicas 11:18: “Ang panugtong o conjuction dinhi gipasabot ra. Si Mahalat mao ang anak nga babaye ni Jerimot ug Abihail. Giisip sa pipila ka komentarista nga ang Abihail maoy lain pang ngalan sa usa sa mga asawa ni Rehoboam.” (Giedit ni A. Cohen, London, 1952) Ang singular nga mga pronombre nga gigamit sa mosunod nga mga teksto (19, 20) nagsuportar sa pagsabot nga usa lamang ka asawa ni Rehoboam ang gipasabot sa bersikulo 18. Busa mopatim-aw nga lagmit gayod nga si Abihail mao ang inahan sa asawa ni Rehoboam nga si Mahalat.
5. Ang amahan ni Rayna Ester ug usa ka kaliwat ni Benjamin. Siya mao ang uyoan sa ig-agaw ni Ester nga si Mardokeo. (Est 2:5, 15; 9:29) Ang Ester 2:7 nagpakita nga siya ug ang iyang asawa namatay sa dihang bata pa ang ilang anak nga babayeng si Ester, ug busa kini maoy sa panahong wala pa si Ester maminyo kang Haring Ahasuero.