AKIS

Usa ka Filistehanong hari sa Gat nga naghari sa panahon ni David ug Solomon. Siya mao ang anak nga lalaki ni Maok o Maaca, ug diha sa superskripsiyon sa Salmo 34 siya gitawag ug Abimelek, lagmit usa ka titulo nga susama sa Paraon o Czar.​—1Sa 27:2; 1Ha 2:39.

Duha ka higayon sa dihang si David mikalagiw gikan kang Saul siya midangop sa dominyo ni Haring Akis. Sa unang higayon, sa dihang gidudahan nga usa ka kaaway, si David nagpabuangbuang, ug gipalakaw siya ni Akis nga wala unsaa ingong tawong buang. (1Sa 21:10-15; Sal 34:Sup; 56:Sup) Sa pag-adto sa ikaduhang higayon giubanan si David sa 600 ka manggugubat ug sa ilang mga banay, ug busa gipapuyo sila ni Akis sa Ziklag. Sulod sa usa ka tuig ug upat ka bulan sa ilang pag-estar didto, nagtuo si Akis nga ang pundok ni David misulong sa mga lungsod sa Juda, samtang sa pagkatinuod si David misulong sa mga Gesurihanon, Girzihanon, ug mga Amalekanhon. (1Sa 27:1-12) Nagmalamposon gayod ang maong panglimbong nga tungod niana gihimo ni Akis si David nga iyang personal nga bantay sa dihang ang mga Filistehanon nag-organisar ug pag-atake kang Haring Saul. Ug sa kataposang gutlo lamang, tungod sa pag-insistir sa ubang “manag-abin nga mga ginoo” sa mga Filistehanon, gipapauli si David ug ang iyang mga tawo ngadto sa Ziklag. (1Sa 28:2; 29:1-11) Sa dihang si David nahimong hari ug nakiggubat batok sa Gat, dayag nga si Akis wala patya. Siya nabuhi hangtod sa paghari ni Solomon.​—1Ha 2:39-41; tan-awa ang GAT.