AHIMAAZ

1. Amahan sa asawa ni Saul nga si Ahinoam.​—1Sa 14:50.

2. Anak nga lalaki sa saserdote nga si Zadok ug amahan ni Azarias. (1Cr 6:​8, 9, 53) Sa dihang mirebelde si Absalom batok sa iyang amahan nga si David ug miilog sa trono, ang batan-ong si Ahimaaz nagdulag usa ka hinungdanong papel sa pagpasa ug mga sekretong impormasyon ngadto kang David. Sa dihang hapit nang madakpan sa usa ka higayon, siya ug ang iyang kauban mitago sulod sa usa ka atabay, nga ang baba niini gitabonan sa usa ka babaye ug mga lugas. (2Sa 15:​27, 36; 17:17-21) Sa dihang namatay si Absalom, usa ka Cusihanon nga magdadagan ang gipili sa pagdala ug balita ngadto kang David. Nagsigeg hangyo si Ahimaaz nga tugotan usab siya sa pagdagan. Kay gitugotan, iyang naapsan ang unang magdadagan ug, sa pag-abot sa siyudad, nailhan siya sa iyang dinaganan. “Siya usa ka maayong tawo, ug siya moanhi nga may dalang maayong balita,” miingon si David. Tuod man; gitaho ni Ahimaaz ang maayong balita ug ang daotang balita iyang gipataho sa ikaduhang magdadagan. (2Sa 18:19-32) Dili matino kon si Ahimaaz nahimo bang hataas nga saserdote. Ang uban nag-ingon nga tingali siya patay na sa wala pa mamatay ang iyang amahan, sa ingon nagtugot sa anak nga lalaki ni Ahimaaz nga si Azarias nga mopuli kang Zadok.​—1Ha 4:2; 1Cr 6:8-10.

3. Ang bana sa anak nga babaye ni Solomon nga si Basemat, ug usa sa 12 ka luyoluyo nga gitudlo sa pagtagana ug pagkaon alang sa panimalay sa hari usa ka bulan sulod sa usa ka tuig gikan sa teritoryo sa Neptali. (1Ha 4:​7, 15) Ang uban nag-ingon nga siya maoy samang indibiduwal sa Num. 2.